1 ຕສ໊ຽວ ກ໊ອງ, “ປ້າມ ມ່ຽນ ອ້າ! ເມີ່ຍ ອ໋ອຍ ຕສຸ ເຕສ໊າະ ຕສູງ ດສຸ ດ໊າວ ໄຫລ່ ເຍີຍ. ອ໋ອຍ ຕສຸ ຫລົ່ງ ຮນັ້ງ ຈັ໊ບ ບະເປຢີຍ ຕສັ່ງ ເຍີຍ ເຖີຍ-ໂຕ ເຖີຍ ເມີ່ຍ ເຍີຍ ບະເປຢີຍ ເຖສົາ ຊຢາມ. ຫລົ່ງ ທິນ-ແປ້ງ ຕັ໊ງ ດສຢັງ ບະເປຢີຍ ເຖສົາ ຊຢາມ ປຸນ ອກອຍ. 2 ຕສົ໊ວ ເວີ່ຍ ກ໋ອມ ຕສີ້ງ ເຍີຍ ຮນອຍ-ເຫຍັຍ ປວັ໊ງ, ເມີ່ຍ ອ໋ອຍ ຕສຸ ເຕສ໊າະ ບະເປຢີຍ ເຖສົາ ຊຢາມ ປົວ ໂກ໊ວ ເຍີຍ ຢຽດ ໂກ໊ວ ຢຽມ ຕສີ້ງ ບຸດົ໋ງ ຫລົ່ງ ໂຕ໌ວ ປົ໊ວ. ເຕສ໊າະ ປົວ ໂກ໊ວ ເຍີຍ ຢຽດ ໂກ໊ວ ຢຽມ ຕສີ້ງ ກະເຫຍ່ຍ ຫລົ່ງ ດສຸ ດ໊າວ ຮງະ ບະເປຢີຍ ຮວີງ ກ໋ອມ ຕສີ້ງ. ແອ໋ງ ເຕສ໊າະ ປົວ ໂກ໊ວ ເຍີຍ ຢຽດ ໂກ໊ວ ຟາດ ປຸນ ດສຢ໋າວ ປ່ວນ ດສ໋ານ ມີ່ງ. ເຢຍ ຕສ່ຽວ ແປງ ດສຸ ດ໊າວ ຕສຸ່ນ ຈ໊ຽນ ມີ່ງ. 3 ເມີ່ຍ ຢ່າ ອ໋ອຍ ຕສຸ ເຕສ໊າະ ອີ ເຕສ໋ຍ ຕິ້ວ ນ້າຍ ເຕີ໋ຍ ບະເປຢີຍ ຍັດ ຈ໊ຽນ ລຸຍ-ຈົ໊ວະ. 4 ຢຽມ ນ້າຍ ເຕີ໋ຍ ບະເປຢີຍ ກະຍົ໌ວ ແອ໋ງ ເຕສ໊າະ ອີ ເຕສ໋ຍ ຕິ້ວ ຕສອຍ ເປັຍ ໂຕ໌ວ ປົ໊ວ. ຢຽມ ໜ່າຍ ມ່າຍ ໂຕ໌ວ ອ໋ອຍ ທສວດ ຕ້າຍ ມີ່ງ ກ໋ອມ ອິ^ສະ^ລາ^ເອນ ເຍີຍ ຢຽດ ຕສູ໊ງ ເຕສີ໊ຍ-ຟຸນ.
5 “ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ. ‘ນ້າຍ ເຊ ເຢ^ລູ^ຊາ^ເລມ ຕສີ້ງ. ເຢຍ ຫລຽບ ນ້າຍ ນອມ ຕສີ້ງ ຢຽມ ໝ່ານ ກົ໊ວະ ມ່ຽນ ບຸດົ໋ງ ຢ່າ ມ່າຍ ເຕສ໋ຍ ນອມ ກົ໊ວະ ເວີ່ຍ ກ໋ອມ. 6 ມປ່າ ເຢ^ລູ^ຊາ^ເລມ ແຫງ່ງ ເຢຍ ເຍີຍ ເລີ໌ຍ ເກົ້າ ທສ້ຳ ເຈ໋ຍ ກັ້ນ ກົ໊ວະ ມ່ຽນ. ນິ່ນ ຢ່າ ແຫງ່ງ ເຢຍ ເຍີຍ ເລີ໌ຍ-ຫລັດ ເກົ້າ ທສ້ຳ ເວີ່ຍ ກ໋ອມ ເຍີຍ ກົ໊ວະ, ເຫວີ່ຍ ຕສຸ ນິ່ນ * ເອກ້ມ ເຢຍ ເຍີຍ ເລີ໌ຍ ຢ່າ ໄມ້ ກັນ ເຢຍ ເຍີຍ ເລີ໌ຍ-ຫລັດ.’
7 “ຫລາຍ ນ້າຍ, ຕສ໊ຽວ ທິນ-ຮູ່ງ ກ໊ອງ, ເມີ່ຍ ໂຕສ໋ວ ຫລຸ່ນ ເກົ້າ ທສ້ຳ ເວີ່ຍ ກ໋ອມ ເມີ່ຍ ວົ້ວ ເຕີ໋ຍ ກົ໊ວະ. ເມີ່ຍ ໄມ້ ເອີຍ ເຢຍ ເຍີຍ ເລີ໌ຍ ຢ່າ ໄມ້ ກັນ ເຢຍ ເຍີຍ ເລີ໌ຍ-ຫລັດ, ຂູງ ເອີຍ ຈ໊ຽນ ເວີ່ຍ ກ໋ອມ ວົ້ວ ເຕີ໋ຍ ກົ໊ວະ ເຍີຍ ເລີ໌ຍ ໂຕສ໋ວ ຮນັ້ງ.
8 “ເຫວີ່ຍ ນ້າຍ ຕສ໊ຽວ ທິນ-ຮູ່ງ ກ໊ອງ, ‘ໝັ່ງ ມ່າະ! ເຢຍ, ເຊ ເຢຍ ກັ້ນ, ອ໋ອຍ ເຖສົາ ເມີ່ຍ ຕ໋ອຍ-ເຕກ. ເຢຍ ອ໋ອຍ ຕອງ ຈ໊ຽນ ໝ່ານ ກົ໊ວະ ມ່ຽນ ຢຽມ ເມີ່ຍ ບຸດົ໋ງ ປຸນ ເມີ່ຍ ຕສຸ ຕີ່ງ ຕສຸ໌ຍ. 9 ຫລາຍ ເມີ່ຍ ໂຕສ໋ວ ເຍີຍ ຢຽດ ຕສູ໊ງ ກ້ຳ ເດສ໊ຍ ເຍີຍ ສີ່, ເຢຍ ອ໋ອຍ ຢຽມ ເມີ່ຍ ບຸດົ໋ງ ໂຕສ໋ວ ປຸນ ເມີ່ຍ ຮນັ້ງ ເຢຍ ໄມ້ ໂຕສ໋ວ ເຈ໋ຍ. ເຢຍ ຢຽດ ລິ໌ວ ຢ່າ ໄມ້ ແອ໋ງ ຮນັ້ງ ນ້າຍ ນໍ ໂຕສ໋ວ. 10 ຢຽມ ເມີ່ຍ ບຸດົ໋ງ ເຕ໋ຍ ໝ່າ ອ໋ອຍ ຫຍັ່ນ ກັ້ນ ເຍີຍ ຕອນ-ເຈວີ໊ຍ, ຕອນ-ເຈວີ໊ຍ ຢ່າ ອ໋ອຍ ຫຍັ່ນ ກັ້ນ ເຍີຍ ເຕ໋ຍ ໝ່າ. * ເຢຍ ອ໋ອຍ ຕີ່ງ ເມີ່ຍ ເຍີຍ ຕສຸ໌ຍ. ຫາຍ ເຕົ້າ ຢຽມ ເມີ່ຍ ບຸດົ໋ງ ຕຸ໊ ແໝ່ງ ທສວດ, ເຢຍ ອ໋ອຍ ປຸນ ຟາດ ດສ໋ານ ມີ່ງ ເປຢີຍ ປູງ.’ * 11 ເຫວີ່ຍ ນ້າຍ ຕສ໊ຽວ ທິນ-ຮູ່ງ ກ໊ອງ, ‘ເຢຍ ຕສຢັ໊ງ ຈ໊ຽນ ເຢຍ ກັ້ນ ເຍີຍ ແໝ່ງ ໂຮ້ວ ຫວ່າ, ເຫວີ່ຍ ຕສຸ ເມີ່ຍ ຫລົ່ງ ຢຽດ ຕສູ໊ງ ກ້ຳ ເດສ໊ຍ ເຍີຍ ກະນ້າຍ ເຖສົາ ຢຽດ ຕສູ໊ງ ໂຢ໋ວ ໄຫ່ ເຍີຍ ສີ່ ປຸນ ເຢຍ ເຍີຍ ສີງ ຕິ່ນ ມ່າຍ ຫວຸຍ, ເຢຍ ອ໋ອຍ ປຸນ ເມີ່ຍ ເຍີຍ ມ່ຽນ ໂສວ ໂຕສະ ເດສ່ງ. * ເຢຍ ເຍີຍ ມຕສີງ ຕສູ໊ງ ໄມ້ ຄໍ້-ຟິ ເມີ່ຍ. ເຢຍ ຢ່າ ໄມ້ ຄໍ້-ລ່ຽນ ເມີ່ຍ. 12 ເມີ່ຍ ເຍີຍ ແປະ ຝີງ ປົວ ໂກ໊ວ ເຍີຍ ຢຽດ ໂກ໊ວ ອ໋ອຍ ຕສຸ ວວນ-ແປ່ງ ໄຕ່ ຢ່າ ຢຽມ ເມີ່ຍ ບຸດົ໋ງ ຕສຸ ຫງໍ່ ຫຮນາງ ໄຕ່. ປົວ ໂກ໊ວ ເຍີຍ ຢຽດ ໂກ໊ວ ອ໋ອຍ ຢຽມ ເມີ່ຍ ເວີ່ຍ ກ໋ອມ ເຍີຍ ຕ໋ອງ ຕສຸ ດສຸ ດ໊າວ ໄຕ໋ ໄຕ່. ປົວ ໂກ໊ວ ເຍີຍ ຢຽດ ໂກ໊ວ ເຢຍ ອ໋ອຍ ປຸນ ຟາດ ດສ໋ານ ມີ່ງ ເຖົາ ລູ່ງ ເດ໊ຍ ນອມໆ ຕ໋ອງ. * ເຢຍ ຢ່າ ອ໋ອຍ ແປງ ທສວດ ເຢຍ ເຍີຍ ດສຸ ດ໊າວ ຕສຸ່ນ ນິ່ນ ບົວ.
13 “‘ຮນັ້ງ ໜ່າຍ ເຢຍ ເຍີຍ ກະເຖຈຍ ຕສ່ຽວ ຟິວ. ເຢຍ ເຖຈຍ ເຈ໌ຍ, ໂນ໌ວ ເຍີຍ ເຈົ໊າ ເຢຍ ໂຕສ໋ວ ປຸນ ນິ່ນ ບົວ ເຖົາ ຕ້າວ, ເຖົາ ເຢຍ ໂຮຍ້ວ ອກາຍ ອ໊ະ. ເຢຍ ເຍີຍ ກະເຖຈຍ ໂຕສ໋ວ ປຸນ ນິ່ນ ບົວ ເຖົາ ຟິວ ມີ່ງ, ນິ່ນ ບົວ ຕສ່ຽວ ຮິ້ວ ຕຸ໊ ເຢຍ, ຕສ໊ຽວ, ກ໊ອງ ລິ໌ວ ເຍີຍ ຫວ່າ ເຊ ເຫວີ່ຍ ຕສຸ ເຢຍ ແດສງ ຈ໊ຽນ ນິ່ນ ບົວ.
14 “‘ໄມ້ ຕານ ບົວະ ນ້າຍ. ເຢຍ ອ໋ອຍ ປຸນ ເມີ່ຍ ຕສຸ ປ່າຍ ຮວາງ, ປຸນ ຮວີງ ກ໋ອມ ເຍີຍ ກົ໊ວະ ເຍີຍ ມ່ຽນ ເຖສົາ ເຈ໋ຍ ເຈົ໊າ ເຍີຍ ມ່ຽນ ໝັ່ງ ເຜຍ. 15 ເຢຍ ເຖຈຍ ເຈ໌ຍ ໂນ໌ວ ຈ໊ຽນ ຕີ່ງ ເມີ່ຍ ເຍີຍ ຕສຸ໌ຍ ເຮນ້ຍ ເຍີຍ ຕສຢັ້ງ ໂຫ່, ເມີ່ຍ ຕສ່ຽວ ຕສຸ ຮວີງ ກ໋ອມ ເຍີຍ ກົ໊ວະ ເຍີຍ ມ່ຽນ ໝັ່ງ ເຜຍ, ຮວວດ ເມີ່ຍ, ຢ່າ ຕົ໊ນ ຕສຸ ນິ່ນ ບົວ, ແຮະ ນິ່ນ ບົວ ກ້ຳ ເດສ໋ຍ. ນ້າຍ ເຊ ເຢຍ, ຕສ໊ຽວ, ກ໊ອງ ລິ໌ວ ອ໊ະ. 16 ວົ້ວ ຕສັ່ນ ເຢຍ ອ໋ອຍ ປຸນ ເມີ່ຍ * ຕສຸ ຫງໍ່ ຫຮນາງ, ຕສຸ ໝຽດ, ຮນັ້ງ ປ໊ວນ ຟອງ-ທສັງ ມີ່ງ ໝຽດ ເມີ່ຍ ບົວ ນໍ. ເຢຍ ອ໋ອຍ ປຸນ ເມີ່ຍ ບົວ ກຸ໊ນ ໂຕສ໋ວ ກຸ໊ນ ຫງໍ່ ເຖົາ ເມີ່ຍ ບົວ ເຂົາ ເຍີຍ ລ່າງ ຕສິ ຕັ໋ງ ເດສ່ງ. 17 ເຢຍ ອ໋ອຍ ປຸນ ເມີ່ຍ ບົວ ຫງໍ່, ປຸນ ເຮ່ຍ ຕສ້ອຍ ຕ້າຍ ຫ່ອຍ ເມີ່ຍ ບົວ. ໝຽດ ເມີ່ຍ ບົວ ເຍີຍ ຝຸຈ໊ວຍ. ເມີ່ຍ ບົວ ອ໋ອຍ ຕສຸ ວວນ-ແປ່ງ, ຕສຸ ໄຕ໋ ໄຕ່, ດສຢ໊າມ ຫລ່ຽວ ທສວດ ເຍີຍ ສີ່. ເຢຍ ອ໋ອຍ ປຸນ ເມີ່ຍ ບົວ ຕສຸ ດສຸ ດ໊າວ ໄຕ໋. ນ້າຍ ເຊ ເຢຍ, ຕສ໊ຽວ, ກ໊ອງ ລິ໌ວ ອ໊ະ.’” *