ซา^โล^มอน เญย ฑูง 8 (Song Of Solomon 8)

ซา^โล^มอน เญย ฑูง 8

¹ ปาน ไม้ ตุ๊ เม่ย โหฒว เยีย เญย ก๋อ,

เซ จวั่ง มา ฮบ หญอ เญย มั์ว-ต่อย.

สี ก๊อง ฮนั้ง หน่าย เยีย เยียม กะเหญี่ย แหมง ปวั้ง เม่ย,

เยีย ฯฒฯ ฒม เม่ย,

หย่า ไม้ ม่าย หาย เต้า หมั่ง เผีย เยีย.

² เยีย ฯฒฯ ต้อ เม่ย,

ต้อ เม่ย เปียะ เยีย เญย มา เญย เปย๊า,

เซ ต้อ มี่ง เถา หฌาว เยีย วั้ว เต้า. *

เยีย อ๋อย ปุน เม่ย ฮบ ดาง เญย กะน้าย เผว ต้าย
เญย ติ๊ว,

ปุน เม่ย ฮบ เยีย เญย หฒิ เลี่ยว เปี๊ยว เญย ติ๊ว.

³ นิ่น เญย หฒาย เจี๊ยะ ปั์ว เยียม เยีย เญย มฆ้อง กะเดี๊ย.

นิ่น เญย บย่าว เจี๊ยะ ปั์ว ชัม เจี๊ยน เยีย.

⁴ โอ เย^ลู^ซา^เลม เญย หฒวัง เซียะ อ่า,

เยีย ขวิน เม่ย บัว,

ไม้ ตู๋ง หละเญ้า เยีย บัว,

เซว่ย เยีย บัว ฮนั้ม เถา ปวั๊ง เฮญี้ยว.

ตะหลัวะ ติ้ว ฑูง

หฒวัง เซียะ

⁵ หาย เต้า เปว่ย เจี๊ยน นิ่น ฮนั้ม เญย เมี่ยน

เยียม เต่ย-ปูง-ฮวาง ฝาว ต้าย?

เซียะ

เยีย เยียม ปะจ้าว * ไฟ อา^เป้น. เดี๋ยง กะเดี๊ย เห่ว เม่ย เญีย.

เยียม วั้ว เม่ย เญย มา เหว่ย เม่ย มุน โค้ว,

เยียม วั้ว เม่ย เญย มา ยู์ง เม่ย ต้าย.

⁶ โท้ ปุน เยีย เยียม เม่ย เญย เฮญี้ยว ฮนั้ง เบ๊าะ เจี๊ยน เหยียน นอ,

ฮนั้ง เหยียน เยียม เม่ย เญย ปั์ว โหฒว นอม จั๋ง-โห่,

เหว่ย หฒุ ฮนั้ม เญย เจ๊า ด่ง ไต่ เญย เจ๊า เฮ้น,

เหมว่ย เจี๊ยะ หั่น ด่ง เยี่ยม เกน เธี้ยว.

นิ่น หฌบ ธ้วด ฮนั้ง โต์ว-เบียด,

ฮนั้ง หฮยาง ไห่ เญย โต์ว. *

⁷ ววม ธั้ม ไม้ ไฮ่ เหมียด ฮนั้ม เญย เฮญี้ยว,

ววม เหยียม หย่า ไม้ ไฮ่ เหฒียม ไต่.

สี ก๊อง หาย เต้า ต้อ นิ่น เญย จา-ตี้ง กะน้าย เหยียด ฒู้ง

อ๋อย เหยี่ยน ฮนั้ม เญย เฮญี้ยว,

วั้ว เต้า ฯฒฯ หฒุ หฒวัง เมี่ยน หมั่ง เผีย เถา ต้าว.

เซียะ เญย ก๋อ

⁸ เยีย บัว ม่าย เต้า หมั่ว-ไฝ,

นิ่น เญย หญอ ไม้ แก้ง โฮล,

เมี่ยน ต้าย โท้ นิ่น วั้ว ฮนอย,

เยีย บัว เหว่ย เยีย บัว เญย หมั่ว อ๋อย หฒุ ฮนั้ง หาย นอ โหฒว?

⁹ สี ก๊อง นิ่น เป๋น ฒี่ง หลาด,

เยีย บัว ฯฒฯ เยียม กู้ หงว่าย เหธย ญ่าน ล่าว.

สี ก๊อง นิ่น เป๋น แก้ง,

เยีย บัว หล่ง สี^ดา ฒ่ง เดี๋ยง-เป๊น เว่ย เจี๊ยน.

เซียะ

¹⁰ เยีย เซ ฒี่ง หลาด,

เยีย เญย หญอ หย่า ฮนั้ง ล่าว.

เหว่ย น้าย, หฒิว เยีย ฮนั้ม เญย เมี่ยน เญย มฒีง หมั่ง,

เยีย ปุน นิ่น ตุ๊ แป้ง ออน.

ตอน

¹¹ ซา^โล^มอน ม่าย ฑง อะหงุ่น หฮวีง เยียม บา^อัน^ฮา^โมน.

นิ่น เฒาะ นิ่น เญย อะหงุ่น หฮวีง ปุน เมี่ยน โก๊ว.

หฮวีง-กะญั์ว เญย เปี๊ยว,

เต้าๆ โก๋ว หฮวีง เญย เมี่ยน อ๋อย หฒุ ธ้วด เหยียด ธิน นอม ฒิ่น * ปุน นิ่น.

¹² มป่า เยีย กั้น ม่าย เยีย กั้น เญย อะหงุ่น หฮวีง

เยียม เยีย เญย หฑะเฮมียน.

โอ ซา^โล^มอน อ่า, วั้ว เต๋ย เหยียด ธิน นอม ฒิ่น เซ ปุน เม่ย,

วั้ว เต๋ย หญี่ แป๊ะ นอม ปุน โก๋ว เปี๊ยว เญย เมี่ยน.

¹³ โอ เยียม หฮวีง กะญั์ว เญย เซียะ อ้า!

เหธา เยีย โหฒว ต่อย เญย เมี่ยน อ๋อย หมวัง เม่ย เญย ซีง-เฉีย.

โท้ ปุน เยีย หมวัง ไฮ์ เม่ย เญย เฉีย.

เซียะ

¹⁴ เยีย ฮนั้ม เญย เมี่ยน อ้า! โท้ เม่ย เซี้ยบๆ เญย ต้าย

ฮนั้ง เต้า จูง,

ไฟ ฮนั้ง เต้า ไฌ่ โก๊ว หลุน

กัน เมี้ย ดาง เญย บง ต้าย.