สีง ฑูง 40 (Psalms 40)

สีง ฑูง 40

สีง ฑูง 40

เธง เฒี้ยว หย่า โท้ นิ่น เถง

จิว ปุน ต้อ ฑูง เญย เมี่ยน.
ดา^วิด โหฒ่ เญย สีง ฑูง.

¹ เยีย หล่ง หน่อย ฒั้ว เจี๊ยน เฒี้ยว,

นิ่น ปู๋ง มน่อม หมวัง ไฮ์ เยีย โท้ เญย หว่า.

² นิ่น เธีย เยีย เยียม หฒุ เหมียด เญย ค้วด ธ้วด ต้าย,

เซ โด ไห่, โญ่ว ไห่ เญย ววม-ปั่ม,

ปุน เยีย เญย เหฒา โซ้ว ว้วน เยียม หละเปย๊ย-ฒอง กู้ หงว่าย,

ปุน เยีย เญย เหฒา-เบี่ย ธ้าย ตุ๊ ว้วน.

³ นิ่น ปุน เยีย เญย ฑุ่ย ป๋าว ติ้ว เซียง-ฑูง,

เซ เธง เยีย บัว เญย ทิน-ฮู่ง เญย ฑูง.

ม่าย เมี่ยน ธั้ม เญย ตุ๊ ปวัด

ฯฒฯ กั้ม เหฑีย แอ๋ง เสียน เขา เฒี้ยว.

⁴ หาย เต้า เสียน เขา เฒี้ยว,

ไม้ ฮวิน มี่ง ล์อ โหฒว เหมา, เธง-โฮล เญย เมี่ยน,

เหธา ต่อง เจ๊า กัน จ๊า เฒี่ยน เญย เมี่ยน,

วั้ว เต้า ตุ๊ ออน-เหลาะ อ๊ะ.

⁵ โอ เฒี้ยว, เยีย เญย ทิน-ฮู่ง อ้า!

เม่ย เหว่ย เยีย บัว โหฒว บัวะ ฮ่อง เญย สี่ ธั้ม.

เม่ย เหว่ย เยีย บัว ฮนั้ม ธ้วด เญย หฒะเอ๋ย

ไม้ ม่าย หาย เต้า ไฮ่ เป๊ย ตุ๊ เถา เม่ย.

สี ก๊อง เยีย มี่ง ฒุ่น บั๋ว เมี่ยน,

ฒู้ง ไม้ ไฮ่ ซ้าว ไม้ เฒี์ยน.

⁶ เม่ย ไม้ เฒ์ย อ๋อย เมี่ยน ปั๊ว เหฒี่ย เหธา ฝ่ง ห่อ เญย กะน้าย,

เม่ย ไม้ เฒ์ย ล์อ เฒี่ยง เต้า ปั๊ว เหฒี่ย เญย แซง-คู้ ไฟ ฟิ ฒุ์ย เญย กะน้าย,

มป่า เม่ย ปุน เยีย ม่าย มน่อม หมวัง ตุ๊ ไฮ์ เม่ย เญย เฉีย. * ฮิบ^ลู 10:5-7

⁷ เยีย ฯฒฯ ก๊อง, ``หมั่ง ม่าะ! เยีย ต้าย อ๊ะ.

เยียม วั้ว โซว-หฌุ่น เฟี้ย เจี๊ยน เยีย เญย เจ๊า-โหล่ว.''

⁸ โอ เยีย เญย ทิน-ฮู่ง อ้า! เม่ย เญย เล์ย-หลัด เยียม เยีย เญย เฮญี้ยว กะญั์ว.

เยีย อะเฮน้ย เอย เจี๊ยน เม่ย เญย เอ๋ย โหฒว.

⁹ เยีย เยียม เมี่ยน ธั้ม กั๊บ ฒุ้น เญย ต๋อง ฒุ่น เหฌียว เอน เญย คู้ เฝียน.

โอ เฒี้ยว อ้า! เม่ย ฮิ้ว ตุ๊ เยีย เญย ฑุ่ย เหมย ไม้ ตี้ง เลี่ยว เญย ฒุ่น.

¹⁰ เยีย ไม้ เฒาะ เม่ย เถง เยีย บัว เญย เหฌียว เอน ปี๋ง เจี๊ยน เยีย เญย เฮญี้ยว.

เยีย ก๊อง เม่ย เหฒียบ ฒัวะ เญย เฮญี้ยว เหธา เม่ย เญย เหฌียว เอน.

เยีย เยียม เมี่ยน ธั้ม กั๊บ ฒุ้น เญย ต๋อง,

ไม้ เกม เจี๊ยน เม่ย เหฒียบ ฒัวะ เญย ฮนั้ม เมี่ยน เหธา เฮญี้ยว หฒีง เญย เจ๊า.

¹¹ เฒี้ยว อ่า, โท้ เม่ย ไม้ ตู๋ง แหง่ง เจี๊ยน ไม้ ค้อ-เลี่ยน เยีย.

เม่ย เหฒียบ ฒัวะ เญย ฮนั้ม เยีย หย่า ปุน เม่ย เญย เฒียน เล์ย หฒั่นๆ เปว เจี๊ยน เยีย.

¹² ม่าย เธี้ยว เญย เหฒะ หน่าน, ฒู้ง ซ้าว ไม้ ฮี่ง, เว่ย ก๋อม เยีย,

เยีย เญย ฒุ์ย หฒุ่น หฒ่าย เยีย, เถา เยีย หมั่ง ไม้ ปวัด หาย หญู่ง.

ฒุ์ย เก้า ธั้ม เจี๋ย เยีย เญย มฆ้อง เญย บะเปยย,

เยีย เญย บะฑิว หยุ เหฑ่ง.

¹³ โอ เฒี้ยว อ้า! โท้ เม่ย ฆอย เอ๋ย เหฌียว เยีย.

โท้ เฒี้ยว เซี้ยบๆ เญย เถง เยีย. *

¹⁴ โท้ ปุน อ๋อย เฒาะ เยีย เญย แหม่ง วั้ว เต๋ย เมี่ยน หฒุ ไญ้ หฒุ หลุ่น.

โท้ ปุน ต้ง อะเฮน้ย เยีย หฒุ โค้ว วั้ว เต๋ย

ถุย หฑวน ฆะฮ้า หย่า หฒุ ป่าย เฮมียน.

¹⁵ โท้ ปุน ก๊อง, ``ฮ้า, ฮ้า!'' ปุน เยีย วั้ว เต๋ย

หฒุ ไญ้, หฒุ ป่าย.

¹⁶ โท้ ปุน เหยียด ฒู้ง ต้าย ล์อ เม่ย วั้ว เต๋ย,

เฌียน-โย่ว ออน-เหลาะ.

โท้ ปุน ฮนั้ม เม่ย เญย เหฌียว เอน วั้ว เต๋ย,

ไม้ ตี้ง เลี่ยว เญย ก๊อง, `` เฒี้ยว หฒะเก้ง โฮล ไห่.''

¹⁷ มป่า เยีย เซ โค้ว, จ่ม ไห่,

โท้ เฒี้ยว จั๋ง เยีย.

เม่ย เซ ต้ง เถง เยีย, เหฌียว เยีย วั้ว เต้า.

โอ เยีย เญย ทิน-ฮู่ง อ้า!

โท้ เม่ย ไม้ ตู๋ง ไง่.