สีง ฑูง 34 * น้าย ติ้ว ฑูง หล่ง ฮิบ^ลู หว่า เญย เหยียด นอม เจี๋ย เหยียด นอม หฑั่ง-หม่า โหฒว เหยียด เหยี่ยม เหยียด เหยี่ยม เญย หฑั่ง-กอน.

เธง เฒี้ยว เหว่ย นิ่น โหฒว คู้ สี่

ดา^วิด ตอง เจี๊ยน อา^บี^เม^เล้ก
โหฒว ฮนั้ง ปุ๊ด ดิน เมี่ยน ฯฒฯ หฒุ หฒุ่น เปย๋า วั้ว หฒั่น, โหฒ่ เญย สีง ฑูง. * เป๊ย หมั่ง 1 ซา^มู^เอน 21:13-15 .

• ¹ เยีย ไม้ ตี้ง เลี่ยว เญย อ๋อย เธง เฒี้ยว.
• เธง นิ่น เญย หว่า หฒั่นๆ เยียม เยีย เญย ฑุ่ย.
• ² เยีย เญย เฮญี้ยว อ๋อย เหว่ย เฒี้ยว ปู๋ง หว่า-เหมา,
• ปุน หฒุ เหฒย * ม่าย เต๋ย โซว ก๊อง ด๊อด หน่าน. เญย เมี่ยน หมวัง ไฮ์ ฯฒฯ อะเฮน้ย.
• ³ โท้ เหธา เยีย เธง เฒี้ยว เว่ย โฮล.
• โท้ ปุน บัว ล่ม ฑ่อย ท่าย นิ่น เญย เม่ง.
• ⁴ เยีย เต๋า เก๋า โท้ เฒี้ยว, นิ่น ฯฒฯ เตา เยีย.
• หย่า เหฌียว เยีย เปย๋า ดุ๊ด เหยียด ฒู้ง กั้ม เหฑีย เญย สี่.
• ⁵ หฒุ เหฒย เญย เมี่ยน หมั่ง เจี๊ยน นิ่น, เฮมียน ฯฒฯ ฌัง-หล่าง อ๊ะ.
• นิ่น บัว ไม้ หฒุ ปวัง เฮมียน เตี๊ย ไญ้.
• ⁶ น้าย เต้า เมี่ยน จ่ม เมี่ยน เห่ว เจี๊ยน โท้,
• เฒี้ยว หย่า ไฮ์ หมี่ อ๊ะ,
• หย่า เหฌียว นิ่น เปย๋า ดุ๊ด นิ่น เญย เหยียด ฒู้ง โค้ว หน่าน.
• ⁷ เฒี้ยว เญย ฟิน-เมี่ยน เปว เจี๊ยน ท่าย เฒี้ยว เญย เมี่ยน
• หย่า เหฌียว นิ่น บัว.
• ⁸ กุ๊น เสย เหมวย ฯฒฯ ฮิ้ว ตุ๊ เฒี้ยว เซ
  หลง ไห่.
• ด้าว เขา นิ่น เญย เมี่ยน ม่าย ออน-เหลาะ. * 1 ปี^เต 2:3
• ⁹ เฒี้ยว เญย ธีง-เหฑ่ง แปะ ฝีง อ้า! อ๋อย หฒุ ท่าย นิ่น,
• เหว่ย หฒุ ท่าย นิ่น วั้ว เต๋ย ไม้ ธา หาย หญู่ง.
• ¹⁰ เลี่ยม เซี่ยน หลุน ไฮ่ ตั๋ง ไฮ่ หง่อ หญั่น เญย กะน้าย,
• มป่า ล์อ เฒี้ยว เญย เมี่ยน ไม้ ธา หาย หญู่ง หลง เญย กะน้าย.
• ¹¹ เยีย เญย น่าม โญ์ว อ่า, ต้าย หมวัง เยีย เญย หว่า ม่าะ!
• เยีย อ๋อย หฌาว เม่ย บัว ท่าย เฒี้ยว.
• ¹² หาย เต้า ป้าม เมี่ยน อ๋อย เฒี่ยง เจี๊ยน,
• อ๋อย ตุ๊ เสี่ยว ญ่วน ด๊าว หย่า ตุ๊ หลง? * 1 ปี^เต 3:10-12
• ¹³ อ๋อย หฒุ ไฝ ฟิม, ไม้ ตู๋ง ปุน เบียด ก๊อง เอ๊าะ เญย หว่า.
• ฑุ่ย เหมย หย่า ไม้ ตู๋ง ก๊อง-แปะ ดั๊ว เมี่ยน.
• ¹⁴ เอ๊าะ เญย อ๋อย หฒุ ซิ้ม ฆอย, ขูง โหฒว หลง เญย เจ๊า.
• อ๋อย หฒุ หล่ง เฮญี้ยว ฒิ่ม ล์อ แป้ง ออน เญย เจ๊า.
• ¹⁵ เฒี้ยว เญย มฒีง หมั่ง เจี๊ยน คู้ เมี่ยน.
• นิ่น เญย มน่อม หย่า หมวัง นิ่น บัว เห่ว เจี๊ยน โท้ เญย หว่า.
• ¹⁶ เฒี้ยว แหง่ง เจี๊ยน โหฒว เอ๊าะ เญย เมี่ยน,
• ปุน เยียม น้าย ลู่ง เดี๊ย ไม้ ม่าย หาย เต้า จั๋ง ตุ๊ นิ่น บัว.
• ¹⁷ คู้ เมี่ยน เห่ว เจี๊ยน โท้,
  เฒี้ยว หมวัง ไฮ์ หมี่ อ๊ะ,
• ปุน นิ่น บัว เปย๋า ดุ๊ด เหยียด ฒู้ง ขวน น่าน.
• ¹⁸ เฒี้ยว เยียม นิด ฟัด เฮญี้ยว มุน เญย เมี่ยน,
• หย่า เหฌียว เฮญี้ยว มุน, บะฑิว หยุ เญย เมี่ยน.
• ¹⁹ คู้ เมี่ยน ปวั้ง ขวน น่าน ธั้ม เญย,
• มป่า เฒี้ยว เหฌียว นิ่น เปย๋า ดุ๊ด เหฑ่ง.
• ²⁰ นิ่น เปว เจี๊ยน คู้ เมี่ยน เญย ซิน, * ฟาน หฒะ ก๊อง ``นิ่น เญย ติ้วๆ บู๊ง''.
• ไม้ ปุน เหยียด ติ้ว บู๊ง เน้า. * โย^ฮัน 19:36
• ²¹ เอ๊าะ เมี่ยน อ๋อย หฒุ เอ๊าะ เญย สี่ ไต่,
• หั่น คู้ เมี่ยน เญย เมี่ยน อ๋อย หฒุ ตี่ง ฒุ์ย.
• ²² เฒี้ยว หย่า เหฌียว นิ่น เญย โปว เญย แหม่ง.
• ด้าว เขา นิ่น วั้ว เต๋ย, ไม้ ม่าย หาย เต้า หฒุ ตี่ง ฒุ์ย.