สีง ฑูง 143

เต๋า เก๋า โท้ เฒี้ยว เหฌียว หย่า ต้อ เจ๊า

ดา^วิด โหฒ่ เญย สีง ฑูง.

• ¹ โอ เฒี้ยว อ่า, โท้ หมวัง เยีย เต๋า เก๋า,
• โท้ แปง มน่อม หมวัง เยีย โจ้ว เญย หว่า.
• เหว่ย หฒุ เม่ย เหฒียบ ฒัวะ เญย, แป้ง ฟิม เญย, โท้ เตา เยีย.
• ² โท้ ไม้ ตู๋ง เซี้ยม เยีย, เม่ย เญย โปว,
• เหว่ย หฒุ หฒิว เม่ย หมั่ง,
• ไม้ ม่าย เหยียด เต้า เฒี่ยง เจี๊ยน เญย เมี่ยน โหฒว ตุ๊ หอบ เหฑ่ง. * โล^มา 3:20 ; กา^ลา^เทีย 2:16
• ³ เยีย เญย วิน-วั้ง หฒุ่น เยีย,
• ธ้าย เยีย เหฌี่ย เถา เดา.
• นิ่น ปุน เยีย เยียม หฮมวัง เญย ต๋อง,
• ฮนั้ง ไต่ มี่ง เล่า ไห่ เญย เมี่ยน นอ.
• ⁴ เหว่ย น้าย เยีย เญย เฮญี้ยว เมา เจี๊ยน เหฌี่ย,
• เยีย เญย เฮญี้ยว เก้ง โค้ว เถา เดี๊ย.
• ⁵ เยีย จั๋ง เถา โล์-ฮนอย,
• เยีย เฟย-ฟั้ง เม่ย โหฒว เญย เหยียด ฒู้ง สี่,
• หย่า ฮนั้ม เถา เม่ย เญย ปั์ว โหฒว เญย กง.
• ⁶ เยีย หูง เจี๊ยน เม่ย ซูง ปั์ว.
• เยีย หง่อ เม่ย ด่ง เดา-ฆาย หง่อ บยู่ง. เซ^ลา
• ⁷ โอ เฒี้ยว อ่า, โท้ เซี้ยบๆ เญย เตา เยีย.
• เยีย เญย เฮญี้ยว ไม้ ลั่ม ฮนั้ม ต๋อง.
• โท้ เม่ย ไม้ ตู๋ง ปี๋ง เม่ย เญย เฮมียน, ไม้ หมั่ง เยีย,
• เหฑีย เยีย ไฮ่ ฮนั้ง มี่ง เยียม เยี่ยม เกน วั้ว เต๋ย เมี่ยน.
• ⁸ โท้ ปุน เยีย ลู่ง ดอม เฑี้ยว ตุ๊ ไฮ์ เม่ย เหฒียบ ฒัวะ ฮนั้ม เยีย
• เหว่ย หฒุ เยีย เขา เม่ย.
• โท้ เม่ย ปุน เยีย ฮิ้ว ตุ๊ หอบ ยั่ง เญย เจ๊า,
• เหว่ย หฒุ เยีย เต๋า เก๋า เญย หว่า ฝาว เถา เม่ย. * เต๋า เก๋า เญย หว่า ฮิบ^ลู หว่า ก๊อง เฮญี้ยว.
• ⁹ โอ เฒี้ยว อ่า, โท้ เม่ย เหฌียว เยีย เปย๋า ดุ๊ด เยีย เญย วิน-วั้ง.
• เยีย ปี๋ง เจี๊ยน เม่ย เหว่ย โหฒว เยีย ด้าว เขา เญย ต๋อง.
• ¹⁰ โท้ เม่ย หฌาว เยีย เอย เม่ย เญย เอ๋ย,
• เหว่ย หฒุ เม่ย เซ เยีย เญย ทิน-ฮู่ง.
• โท้ ปุน เม่ย หลง ไห่ เญย สีง ลี่ง
• ต้อ เยีย ยั่ง แป้ง เญย เจ๊า.
• ¹¹ โอ เฒี้ยว อ่า, โท้ เหว่ย เม่ย เญย เม่ง เปว เยีย เญย แหม่ง.
• โท้ หล่ง เม่ย แป้ง ฟิม เญย หฒะเอ๋ย
• ต้อ เยีย เยียม ขวน น่าน ธ้วด ต้าย.
• ¹² เหว่ย หฒุ เม่ย เหฒียบ ฒัวะ เญย ฮนั้ม เยีย,
• โท้ เม่ย จั๊ม กวั่ง เยีย เญย วิน-วั้ง,
• หย่า เหมียด เหฑ่ง เยีย เญย เหยียด ฒู้ง วิน-จา,
• เหว่ย หฒุ เยีย โหฒว เม่ย เญย โปว.