สีง ฑูง 101

แล์ง กัน หอบ เญย โต์-เล์ย

ดา^วิด โหฒ่ เญย สีง ฑูง.

• ¹ เยีย อ๋อย ป๋าว ฑูง ก๊อง เหฒียบ ฒัวะ เญย เหธา แป้ง ฟิม เญย เจ๊า.
• โอ เฒี้ยว อ่า, เยีย อ๋อย ป๋าว ฑูง ปุน เม่ย.
• ² เยีย อ๋อย หล่ง เฮญี้ยว ยั่ง ไม้ ม่าย ต๋อง เฆ่ม เญย เจ๊า.
• เม่ย เถา หาย หฒั่น หธีง ต้าย เยีย น้าย?
• เยีย อ๋อย เฮญี้ยว หฒีง เญย
• เยียม เยีย เญย เปย๊า.
• ³ เอ๊าะ ไห่ เญย กะน้าย เยีย ฒู้ง
• ไม้ ปุน ต๋อย เฮมียน ต๋อย หมิ่น.
• เยีย ฑอง เล่ย ทิน-ฮู่ง เญย เมี่ยน โหฒว
  เญย สี่,
• เยีย ฒู้ง ไม้ ปุน กั๊วะ หฒุ เยีย.
• ⁴ เยีย หย่า ไม้ เหญี่ยม เฮญี้ยว ฌ้วด เญย เมี่ยน,
• ไม้ ปุน หาย หญู่ง เอ๊าะ สี่ เกวน หฒุ เยีย.
• ⁵ หาย เต้า เป่ย เดี๊ย ก๊อง โตะ นิ่น จวั่ง ล์าง เญย ก๋อ-โย์ว
• เยีย อ๋อย เหมียด เหฑ่ง.
• โหฒว เหมา, เธง-โฮล เญย เมี่ยน
• เยีย เตี๊ย ไม้ ตุ๊.
• ⁶ เยีย เญย มฒีง อ๋อย หมั่ง เจี๊ยน เยียม เต่ย-ปูง เหฒียบ ฒัวะ เญย เมี่ยน,
• เหว่ย ปุน นิ่น บัว ตุ๊ เหธา เยีย เยียม.
• หาย เต้า ยั่ง ไม้ ม่าย ต๋อง เฆ่ม เญย เจ๊า,
• ฯฒฯ ตุ๊ ฟู-สู เยีย.
• ⁷ หาย เต้า โหฒว ดั๊ว เมี่ยน เญย เมี่ยน
• ไม้ ตุ๊ เยียม เยีย เญย เปย๊า.
• หาย เต้า ก๊อง-แปะ,
• ไม้ ตุ๊ เยียม เยีย เญย หฑะเฮมียน.
• ⁸ ดอมๆ เยีย อ๋อย เหมียด
• เยียม เต่ย-ปูง เญย เหยียด ฒู้ง
  เอ๊าะ เมี่ยน.
• เยีย อ๋อย เฒาะ เต้าๆ โหฒว หว่าย สี่ เญย เมี่ยน ไพ กวั่ง,
• ไม้ ปุน เยียม เฒี้ยว เญย ฒี่ง.