1 เย^ซู เปียะ ฑั้ง เจี๋ย วั้ว หง่าน หฒิ ค้อย-ตอน หฑวน เถา นิ่น กั้น เญย มู้ง. * 2 ม่าย เต๋ย เมี่ยน ต้อ เต้า ปุ๊ด แป่ง-ไบ เมี่ยน เปว๋ย เจี๊ยน จิ่ว ต้าย ล์อ เย^ซู. เย^ซู ปวัด น้าย เต๋ย เมี่ยน เสียน ด่ง น้าย หลง, นิ่น ฯฒฯ บั๋ว แป่ง-ไบ เมี่ยน, ``ตอน อ่า, กุ๊น ปู๋ง เฮญี้ยว ม่าะ! เม่ย เญย ฒุ์ย ตุ๊ กวั่ง ลิ์ว อ๊ะ.''
3 ม่าย เต๋ย หฌาว เล์ย เญย ฟิน-แซง
ไฮ์ เย^ซู ฮนั้ง หน่าย นอ ก๊อง, นิ่น บัว เยียม เฮญี้ยว ฮนั้ม, ``อ๊า, น้าย ล่าน เมี่ยน คี ทิน-ฮู่ง.''
4 เย^ซู ฮิ้ว ตุ๊ นิ่น บัว ฮนั้ง หาย นอ ฮนั้ม, นิ่น ฯฒฯ ก๊อง, ``เม่ย บัว เหว่ย หาย ติ่ว เยียม เฮญี้ยว ฮนั้ม ธ้วด หว่าย เญย สี่? 5 ก๊อง, `เม่ย เญย ฒุ์ย ตุ๊ กวั่ง ลิ์ว อ๊ะ,' ไฟ ก๊อง `เจี์ย ซิน ต้าย ยั่ง เจ๊า,' น้าย เต๋ย อี โจ๋ว หว่า, หาย โจ๋ว เก้า เห่ ตุ๊ ก๊อง? 6 มป่า เยีย อ๋อย ปุน เม่ย บัว ฮิ้ว ตุ๊ เยีย, ป้าม เมี่ยน เญย ตอน, เยียม ลู่ง เดี๊ย ม่าย หัด ม์า กวั่ง เมี่ยน เญย ฒุ์ย.'' เย^ซู ฯฒฯ บั๋ว ปุ๊ด แป่ง-ไบ เญย เมี่ยน, ``เจี์ย ซิน ต้าย, ต้อ เจี๊ยน เม่ย เญย จิ่ว หฑวน เปย๊า อ๊ะ.'' 7 วั้ว เต้า เมี่ยน ฯฒฯ เจี์ย ซิน หฑวน เปย๊า หมี่ อ๊ะ. 8 หฒวัง เมี่ยน ปวัด ฮนั้ง น้าย นอ, นิ่น บัว กั้ม เหฑีย ไห่, หย่า เธง ทิน-ฮู่ง, เหว่ย หฒุ นิ่น ปุน น้าย หญู่ง หัด ม์า เมี่ยน.
9 เย^ซู ธ้วด วั้ว นอม ต๋อง หมี่ อ๊ะ. กัน เจี๊ยน เจ๊า มี่ง เกา, ปวัด เต้า เซียว โฑว-ฒิ่น เญย เมี่ยน, บั๋ว เห่ว มัด^ทาย, เฒว์ย เจี๊ยน วั้ว เซียว โฑว หฒ่าม. เย^ซู ก๊อง บั๋ว นิ่น, ``ต้าย กัน เยีย โอ่.'' มัด^ทาย ฯฒฯ เจี์ย ซิน กัน เจี๊ยน เย^ซู มี่ง อ๊ะ.
10 เย^ซู เยียม มัด^ทาย เญย เปย๊า หญั่น หฮนาง วั้ว หฒั่น, ม่าย เถง โล^มา ฮู่ง จา เซียว โฑว-ฒิ่น เญย เมี่ยน ธั้ม เญย เหธา เม่ง เต้า หว่าย เญย เมี่ยน * หย่า ต้าย เหธา เย^ซู เหธา นิ่น เญย ไซ-ก๋อ บัว จวั่ง เตี้ย หญั่น หฮนาง. * 11 ม่าย เต๋ย ฟา^ลิ^สี เมี่ยน ปวัด ฯฒฯ หน่าย ก๋า ไซ-ก๋อ, ``เม่ย บัว เญย ไซ-เตี๋ย เหว่ย หาย ติ่ว เหธา เซียว โฑว เญย เมี่ยน เหธา เม่ง เต้า หว่าย เญย เมี่ยน หญั่น หฮนาง?''
12 เย^ซู ไฮ์ นิ่น บัว ฮนั้ง น้าย นอ ก๊อง, นิ่น ฯฒฯ เตา, ``หวั่ง เสียง เญย เมี่ยน ไม้ เฉียม หฒุ เดีย-ไซ. ขูง ปุ๊ด-แป่ง เมี่ยน ฮนั้ง เฉียม หฒุ เดีย-ไซ. 13 เม่ย บัว มี่ง โหะ น้าย โจ๋ว กีง-โซว เญย หว่า เญย เอ๋ย เล์ย ม่าะ! กีง-โซว ก๊อง,
เยีย ไม้ เฒ์ย ต้าย เหว่ย เห่ว คู้ เมี่ยน. เยีย ต้าย เห่ว เม่ง เต้า หว่าย เญย เมี่ยน.''
14 วั้ว หฒั่น เถง เมี่ยน เจี๋ย ววม เญย เล์ย วั้ว เต้า โย^ฮัน เญย ไซ-ก๋อ ต้าย หน่าย เย^ซู, ``เยีย บัว เหธา ฟา^ลิ^สี เมี่ยน เฒย ไม้ หญั่น หาย หญู่ง. เม่ย เญย ไซ-ก๋อ บัว เหว่ย หาย ติ่ว ไม้ เฒย?''
15 เย^ซู เตา, ``เซียง-ล่าง หธ่อ เยียม เจี๊ยน ธีง-จา-ยิ่น เญย เฒี่ยง โห่, แคะ เมี่ยน ไฮ่ เฑ่า เญย ไฟ? ฒู้ง ไม้ ไฮ่. มป่า ฮนอย-เหญียะ อ๋อย เถา, เซียง-ล่าง หฒุ ต้อ มี่ง หมี่ อ๊ะ. เถา วั้ว หฒั่น แคะ เมี่ยน หธีง ต้าย เฒย ไม้ หญั่น หาย หญู่ง.
16 ``ไม้ ม่าย หาย เต้า หล่ง เซียง-เดีย เบี๊ย โล์-ลุย. เซียง-เดีย ไฮ่ โซะ ปุน เบี๊ย เญย ต๋อง จา ฮู้ โฮล.
17 ``หย่า ไม้ ม่าย หาย เต้า เฒาะ เซียง-อะหงุ่น ติ๊ว ตั๊บ โล์-ด๊บ-บัวะ. ตั๊บ นอ, ติ๊ว เญย เฉีย หฒูง, บัวะ ฯฒฯ บ๋าย อ๊ะ. บัวะ ฮู้ เหฑ่ง, ติ๊ว หย่า ธ้วด เหฑ่ง หมี่ อ๊ะ. เซียง-ติ๊ว
อ๋อย หฒุ ตั๊บ เซียง-ด๊บ-บัวะ. ฮนั้ง หน่าย, เลี่ยม ติ๊ว เลี่ยม บัวะ หธีง ต้าย ไม้ ไฮ่ หว่าย.''
18 เย^ซู หธ่อ ก๊อง เจี๊ยน น้าย เต๋ย หว่า วั้ว หฒั่น, ม่าย เต้า กุ๊น หวุ่ย ต้อง เญย เมี่ยน ต้าย เกว่ย เหฌี่ย นิ่น เญย หฑะเฮมียน หย่า ก๊อง, ``เยีย เญย เซียะ โธะ โหะ ไต่ มี่ง. โท้ เม่ย มี่ง หล่ง ปั์ว มาน นิ่น, นิ่น ฯฒฯ นั่ง ต้าย อ๊ะ.'' 19 เย^ซู ฯฒฯ เจี์ย ซิน กัน เจี๊ยน นิ่น มี่ง. ไซ-ก๋อ บัว หย่า กัน เจี๊ยน มี่ง.
20 มี่ง เกา, ม่าย เต้า มเซียะ ตอน ปุ๊ด แป่ง-ฮลุด ตุ๊ เหฒียบ เหญ่ย หฮญัง อ๊ะ. นิ่น ยั่ง ฆะฮ้า ฆาง ต้าย ฮลัว เย^ซู เญย ลุย-จั๊วะ, 21 เหว่ย หฒุ นิ่น เยียม เฮญี้ยว ฮนั้ม, ``สี ก๊อง เยีย ขูง ฮลัว นิ่น เญย ลุย ฮนั้ง, เยีย เญย แป่ง ฯฒฯ หลง อ๊ะ.''
22 เย^ซู กวิ้น ซิน ปวัด วั้ว เต้า มเซียะ ตอน ฯฒฯ ก๊อง, ``มเต้า มเซียะ ตอน อ้า! กุ๊น ปู๋ง เฮญี้ยว อ๊ะ. เหว่ย หฒุ เม่ย เสียน เยีย, เม่ย เญย แป่ง หลง อ๊ะ.'' ต้ง วั้ว นอม เฒี่ยง โห่, แป่ง ฯฒฯ หลง หมี่ อ๊ะ.
23 เย^ซู เปียะ กุ๊น หวุ่ย ต้อง วั้ว เต้า เมี่ยน เญย เปย๊า วั้ว หฒั่น, นิ่น ปวัด ปย๊ม เฮล้า-ด้ง หนู เญย เมี่ยน เหธา เมี่ยน ธั้ม เบี้ยวๆ เญย. 24 นิ่น ฯฒฯ ก๊อง บั๋ว หฒวัง เมี่ยน, ``ธ้วด มี่ง ม่าะ! น้าย เต้า เซียะ ไม้ เฒ์ย ไต่. นิ่น มฌ่อม ฮนั้ง.'' หฒวัง เมี่ยน ฯฒฯ จั๊ด นิ่น. 25 หฒุ่น น้าย เต๋ย เมี่ยน ธ้วด มี่ง ลิ์ว, เย^ซู เปียะ มี่ง นั้น เจี๊ยน วั้ว เต้า เซียะ เญย ปั์ว. เซียะ ฯฒฯ เจี์ย ซิน ต้าย อ๊ะ. 26 น้าย เต๋ย เฝียน ซีง ปวั๊ง วั้ว นอม เต่ย-ปูง.
27 เย^ซู ธ้วด วั้ว นอม ต๋อง หมี่ อ๊ะ. กัน เจี๊ยน เจ๊า มี่ง เกา, ม่าย อี เต้า มฒีง แม่ง เญย เมี่ยน กัน เจี๊ยน มี่ง, เห่ว เจี๊ยน ก๊อง, ``ดา^วิด เญย เฒ้ย-ฟุน อ้า! ค้อ-เลี่ยน เยีย บัว ม่าะ!''
28 เย^ซู เปียะ เปย๊า มี่ง, วั้ว เต๋ย อี เต้า มฒีง แม่ง เญย เมี่ยน ต้าย ล์อ นิ่น. เย^ซู หน่าย ก๋า นิ่น บัว, ``เม่ย บัว เสียน เยีย ไฮ่ หฒ่อ เม่ย บัว เญย มฒีง ไฟ?''
นิ่น บัว เตา, ``ต้ม ก๋อ อ่า, เยีย บัว เสียน เญย.''
29 เย^ซู ฯฒฯ ฮลัว นิ่น บัว เญย มฒีง หย่า ก๊อง, ``เอย เม่ย บัว เสียน เญย, ฯฒฯ ตุ๊ อ๊ะ.'' 30 นิ่น บัว เญย มฒีง ฯฒฯ ไฮ่ หมั่ง ตุ๊ ปวัด อ๊ะ. เย^ซู หัด นิ่น บัว. ``ธิน-หม่าน ไม้ ตู๋ง บั๋ว หาย เต้า.''
31 มป่า นิ่น บัว ธ้วด มี่ง ฒุ่น เย^ซู โหฒว เญย เจ๊า ปวั๊ง วั้ว นอม เต่ย-ปูง.
32 วั้ว เต๋ย อี เต้า เมี่ยน ธ้วด มี่ง วั้ว หฒั่น, เมี่ยน ต้อ เต้า หฒุ เมี้ยน มัวะ หฮงง, ไม้ ไฮ่ ก๊อง หว่า เญย เมี่ยน, ต้าย ล์อ เย^ซู. 33 เย^ซู หฒุ่น เมี้ยน ธ้วด ลิ์ว, วั้ว เต้า เมี่ยน ฯฒฯ เลี่ยม เฒ่ย ไฮ่ ก๊อง หว่า. หฒวัง เมี่ยน บัวะ ฮ่อง ไห่, ล่าน บั๋ว ล่าน, ``เยียม อิ^สะ^ลา^เอน เต่ย-ปูง ไม้ แก้ง ปวัด เจี๋ย น้าย หญู่ง สี่.''
34 มป่า ฟา^ลิ^สี เมี่ยน ก๊อง, ``เมี้ยน เญย ฮู่ง ปุน นิ่น ม่าย หลี่ง หฒุ่น เมี้ยน ธ้วด ฮนั้ง.'' *
35 เย^ซู โย่ว เจี๊ยน เฒว่ย มู้ง เฒว่ย ล์าง มี่ง, เยียม หวุ่ย ต้อง หฌาว เมี่ยน หย่า ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน. นิ่น หย่า หฒ่อ หลง หญู่งๆ แป่ง. * 36 เย^ซู ปวัด น้าย เต๋ย เมี่ยน ธั้ม นิ่น หฒะเก้ง! ไฮ์ ค้อ-เลี่ยน ไห่ เหว่ย หฒุ นิ่น บัว โค้ว ไห่, ไม้ ลั่ม เขา ต๋อง, ฮนั้ง กวั้น ปะกี ยู่ง ไม้ ม่าย เฒี้ยว โก๋ว นอ. * 37 เย^ซู ฯฒฯ บั๋ว นิ่น เญย ไซ-ก๋อ บัว, ``แกง-หฒวัง ธั้ม มป่า กง-เมี่ยน โหฒะ. * 38 เหว่ย น้าย อ๋อย หฒุ โท้ แกง-หฒวัง เญย เฒี้ยว พ้าย กง-เมี่ยน ธ้วด มี่ง เซียว นิ่น เญย แกง-หฒวัง.''