1 เอ^ฟา^อิม เมี่ยน ฯฒฯ ก๊อง กิ^เด^โอน. นิ่น บัว ก๊อง, ``เม่ย เหว่ย หาย ติ่ว ฮนั้ง น้าย นอ โหฒว ปุน เยีย บัว? เม่ย ธ้วด มี่ง เหธา มี^เดียน เมี่ยน เบ๊าะ จ๋า วั้ว หฒั่น, เม่ย เหว่ย หาย ติ่ว ไม้ เห่ว เยีย บัว เหธา เจี๊ยน เม่ย มี่ง เบ๊าะ?'' นิ่น บัว ฯฒฯ ชะ ก๊อง กิ^เด^โอน.
2 กิ^เด^โอน เตา นิ่น บัว, ``เยีย โหฒว เญย ฝู่ง ไฮ่ เป๊ย ตุ๊ เถา เม่ย บัว โหฒว เญย สี่? เอ^ฟา^อิม เมี่ยน เฑ์า เหฒ่ง เหฌี่ย เญย อะหงุ่น เปี๊ยว ฒู้ง เก้า หลง อา^บี^เย^เซ แก๊ะ ต้าย เญย เหยียด ถอง อะหงุ่น เปี๊ยว ไม้ เฒ์ย? 3 ทิน-ฮู่ง เฒาะ มี^เดียน เมี่ยน เญย เปย๊ย เฒ้ย, โอ^เล้บ เหธา เส^เอบ, จิว ปุน เยียม เม่ย บัว เญย ปั์ว-เดี๊ย. เยีย โหฒว เญย สี่ ฝู่ง ไฮ่ เป๊ย ตุ๊ เถา เม่ย บัว โหฒว เญย?'' กิ^เด^โอน ฮนั้ง น้าย นอ ก๊อง ลิ์ว, เอ^ฟา^อิม เมี่ยน เญย กะเฉีย หธีง ต้าย ฟิว. *
4 กิ^เด^โอน เหธา กัน นิ่น วั้ว เต๋ย ฟาม-แป๊ะ เต้า แปง, ไม้ กุ๊น นิ่น บัว เมา ไห่, นิ่น บัว หธ่อ หฒุ่น เจี๊ยน มี^เดียน เมี่ยน มี่ง ฯฒฯ เจี๋ย วั้ว หง่าน หฒิ จอ^แดน ด้าย หมี่ อ๊ะ. 5 กิ^เด^โอน ก๊อง บั๋ว สุก^โค้ด ฒี่ง เญย เมี่ยน, ``โท้ เม่ย บัว ปุน เต๋ย ฌั้ว กัน เยีย ต้าย เญย แปง หญั่น. นิ่น บัว โค้ว ไห่ อ๊ะ. เยีย หธ่อ หฒุ่น เจี๊ยน มี^เดียน เมี่ยน เญย ฮู่ง เตี๋ย, เฒ^บา เหธา สัน^มุน^นา.
6 มป่า สุก^โค้ด ฒี่ง เญย เจียน ก๊อง, ``เฒ^บา เหธา สัน^มุน^นา ฒู้ง เยียม เจี๊ยน เม่ย เญย ปั์ว-เดี๊ย เยีย บัว หธีง ต้าย อ๋อย หฒุ ปุน ฌั้ว เม่ย เญย จุน-แปง ไฟ?''
7 กิ^เด^โอน ฯฒฯ ก๊อง, ``ฮนั้ง หน่าย, เฒี้ยว เฒาะ เฒ^บา เหธา สัน^มุน^นา จิว ปุน เยียม เยีย เญย ปั์ว-เดี๊ย, เยีย ฯฒฯ หล่ง เต่ย-ปูง-ฮวาง เญย ฌิ้ม-โธว ฌิ้ม-หม่วน ต้าย เบ๊าะ เม่ย บัว เญย ซิน.''
8 นิ่น เยียม หน่าย ฝาว เถา เป^นู^เอน ฒี่ง หย่า ฟี่ ฮนั้ง เญย ก๊อง บั๋ว เป^นู^เอน เมี่ยน, มป่า เป^นู^เอน เมี่ยน เตา ฮนั้ง สุก^โค้ด เมี่ยน เตา นอ. 9 นิ่น ฯฒฯ ก๊อง บั๋ว เป^นู^เอน เมี่ยน, ``ฒั้ว เยีย แป้ง ออน เญย หฑวน เถา น้าย เญย เฒี่ยง โห่, เยีย อ๋อย เบ๊าะ บาง น้าย เต๋ย เซี้ยว ฒี่ง เญย ล่าว.''
10 วั้ว หฒั่น เฒ^บา เหธา สัน^มุน^นา เหธา นิ่น บัว เญย เหยียด หว่าน ปยา ธิน เต้า แปง เยียม คาน^โค ฒี่ง. นิ่น บัว ตง ปูง เมี่ยน เหฒ่ง เหฌี่ย เญย จุน-แปง ม่าย บัวะ น้าย เหว่ย หฒุ เหยียด สิน อี หว่าน เต้า นั้น หฑุ ด๊าว เญย จุน-แปง หฒุ ไต๋ ไต่ หมี่ อ๊ะ. 11 กิ^เด^โอน กัน เจี๊ยน เต่ย-ปูง โย่ว ธอง ด๊บ-ลิ่ว วั้ว เต๋ย เมี่ยน เญย เจ๊า มี่ง โน^บา เหธา โย้ก^เบ^ฮา ฒี่ง เญย ตง ปูง แหมง เปียะ มี่ง เบ๊าะ มี^เดียน เมี่ยน เญย จุน-แปง กวั้น, เหว่ย หฒุ วั้ว เต๋ย แปง หย่า ไม้ เกาะ จาง. 12 มี^เดียน เมี่ยน เญย อี เต้า ฮู่ง, เฒ^บา เหธา สัน^มุน^นา, เปย๋า มป่า กิ^เด^โอน หฒุ่น เจี๊ยน มี่ง เฒาะ นิ่น บัว, โหฒว ปุน นิ่น บัว เญย จุน-แปง หลุ่น เหฑ่ง.
13 โย^อาด เญย ตอน, กิ^เด^โอน, เบ๊าะ ลิ์ว จ๋า ฯฒฯ ยั่ง เจี๋ย เฮ^เล้ด บง วั้ว ติ้ว เจ๊า หฑวน. 14 นิ่น เฒาะ ตุ๊ เต้า สุก^โค้ด ฒี่ง เญย โฮ่ว แซง ต้าย ฒ่า หน่าย นิ่น. วั้ว เต้า ตอน ฯฒฯ เฟี้ย เธี้ยด เหฒียบ เธี้ยด เต้า สุก^โค้ด เมี่ยน เญย เจียน เญย บั๋ว, เซ วั้ว นอม ฒี่ง เญย เมี่ยน โก๋. 15 กิ^เด^โอน ฯฒฯ ต้าย ล์อ สุก^โค้ด ฒี่ง เญย เมี่ยน หย่า ก๊อง, ``หมั่ง เฒ^บา เหธา สัน^มุน^นา ม่าะ! ฒิ่น ด่าง เม่ย บัว ฮว้วด เยีย ก๊อง, `เฒ^บา เหธา สัน^มุน^นา ฒู้ง เยียม เจี๊ยน เม่ย เญย ปั์ว-เดี๊ย เยีย บัว หธีง ต้าย อ๋อย หฒุ ปุน ฌั้ว กัน เม่ย เมา โค้ว เญย เมี่ยน ไฟ?''' 16 กิ^เด^โอน ฯฒฯ เฒาะ วั้ว นอม ฒี่ง เญย เมี่ยน โก๋ ต้าย หล่ง เต่ย-ปูง-ฮวาง เญย ฌิ้ม-โธว ฌิ้ม-หม่วน เบ๊าะ เหว่ย หฌาว สุก^โค้ด ฒี่ง เญย เมี่ยน. 17 นิ่น หย่า แธะ กวั่ง เซี้ยว เป^นู^เอน ฒี่ง เญย ล่าว หย่า ไต๋ วั้ว นอม ฒี่ง เญย เมี่ยน.
18 กิ^เด^โอน หน่าย เฒ^บา เหธา สัน^มุน^นา, ``เม่ย บัว เยียม ทา^โบ บง ไต๋ วั้ว เต๋ย เมี่ยน เญย เฮมียน-เหมว่ย เฒี่ยง ต้าย ฮนั้ง หาย นอ?''
นิ่น บัว เตา, ``นิ่น บัว เฒี่ยง ต้าย ฮนั้ง เม่ย. ปวัด นิ่น บัว เต้าๆ ฮนั้ง ฮู่ง ตอน นอ.''
19 กิ^เด^โอน ฯฒฯ ก๊อง, ``วั้ว เต๋ย เมี่ยน โหฒว เยีย เญย เธียน มั์ว-ต่อย. เซ เยีย เญย มา เญย ตอน. เยีย เฒี้ยง เจี๊ยน เฒี่ยง เจี๊ยน เญย เฒี้ยว, สี ก๊อง เม่ย บัว ไม้ ไต๋ นิ่น บัว นอ, เยีย หย่า ไม้ ไต๋ เม่ย บัว อ๊ะ.'' 20 กิ^เด^โอน ฯฒฯ เห่ว นิ่น เญย ตอน-หละเก๊า, เย^เท, ``ไต๋ นิ่น บัว ม่าะ!'' มป่า นิ่น เญย ตอน ไม้ ก๊าม แปง หฑุ ด๊าว ธ้วด. นิ่น กั้ม เหฑีย ไห่, เหว่ย หฒุ นิ่น เญย หฮญัง-เจ๊ย หธ่อ หลุน.
21 เฒ^บา เหธา สัน^มุน^นา ฯฒฯ ก๊อง, ``เม่ย กั้น ไต๋ เยีย บัว ม่าะ! เมี่ยน ฮนั้ง หาย นอ, นิ่น เญย ชะ หย่า ฮนั้ง วั้ว นอ.'' กิ^เด^โอน ฯฒฯ ไต๋ เฒ^บา เหธา สัน^มุน^นา ไต่. กิ^เด^โอน หย่า เฒาะ นิ่น บัว เญย ฒอง ล่อ ท่อ เญย จาง วั้ว เต๋ย กะน้าย หมี่ อ๊ะ. *
22 อิ^สะ^ลา^เอน เมี่ยน ก๊อง บั๋ว กิ^เด^โอน, ``โท้ เม่ย กุ๊น เยีย บัว, เม่ย เหธา เม่ย เญย ตอน เหธา เม่ย เญย ฟุน, เหว่ย หฒุ เม่ย เหฌียว เยีย บัว เปย๋า ดุ๊ด มี^เดียน เมี่ยน เญย ปั์ว-เดี๊ย.''
23 กิ^เด^โอน ก๊อง บั๋ว นิ่น บัว, ``เยีย ไม้ กุ๊น เม่ย บัว. เยีย เญย ตอน หย่า ไม้ กุ๊น เม่ย บัว. เฒี้ยว กั้น อ๋อย กุ๊น เม่ย บัว.'' 24 กิ^เด^โอน แอ๋ง ก๊อง บั๋ว นิ่น บัว, ``เยีย ม่าย เหยียด หญู่ง เยีย อ๋อย โท้ เม่ย บัว. โท้ เม่ย บัว เก๊าะ-เมี่ยน เฒาะ ต้ง เม่ย บัว ธ้าง ต้าย เญย มน่อม ฮยุน ปุน เยีย.'' (นิ่น บัว เญย วิน-วั้ง ตั้ง เจียม-มน่อม ฮยุน เหว่ย หฒุ นิ่น บัว เป๋น อิ^สะ^มา^เอน เมี่ยน.)
25 นิ่น บัว เตา กิ^เด^โอน, ``เยีย บัว อะเฮน้ย ปุน เม่ย.'' นิ่น บัว ฯฒฯ เฒาะ เต๋ย ต้ม ลุย ทาน เจี๊ยน เดา. เก๊าะ-เมี่ยน ฯฒฯ เฒาะ เก๊าะ-เมี่ยน ธ้าง ต้าย เญย เจียม-มน่อม ฮยุน อัน เจี๊ยน วั้ว เต๋ย ลุย กะญั์ว. 26 กิ^เด^โอน โท้ ต้าย เญย เจียม-มน่อม ฮยุน ม่าย เฮนี้ย-ต้าว เล่ย ไม้ โก เหฒียบ เหญ่ย จ้อย * เจียม. ธ้วด ลิ์ว น้าย แอ๋ง ม่าย มี^เดียน ฮู่ง ฒอง ซิน เญย เซียว-เซ้ด, * เหธา ตั้ง จาง เญย กะน้าย เหธา ลุย-ด๊าว-หลัวะ, เลี่ยม ฒอง ล่อ ท่อ เญย จาง เญย หลิ่ม. 27 กิ^เด^โอน ฯฒฯ หล่ง น้าย เต๋ย เจียม โหฒว เอ^โฟ้ด อัน เจี๊ยน นิ่น กั้น เญย ป๊วน-ฒี่ง, โอ^ฟา^ลา. อิ^สะ^ลา^เอน เญย หฒวัง เมี่ยน ฯฒฯ ม่าย เฮยี่ย เฮญี้ยว, * มี่ง วั้ว ป๋าย. น้าย นอม เอ^โฟ้ด ฯฒฯ ฮนั้ง ติ้ว ฮลาง ฮลบ กิ^เด^โอน เหธา นิ่น เญย เฒ้ย-ฟุน.
28 ฮนั้ง หน่าย มี^เดียน เมี่ยน เซวย อิ^สะ^ลา^เอน เมี่ยน, เหยียด ลิ์ว เธา มฆ้อง ไม้ เจี์ย อ๊ะ. เยียม กิ^เด^โอน เญย เสย เฒ้ย, เต่ย-ปูง ถาย-แป้ง เฝย เหฒียบ หฮญัง.
29 โย^อาด เญย ตอน, เย^ลุบ^บา^อัน, หฑวน มี่ง เยียม นิ่น กั้น เญย เปย๊า.
30 กิ^เด^โอน ม่าย เธี้ยด เหฒียบ เต้า เธียน ตอน, เหว่ย หฒุ นิ่น ม่าย เอ๊า ธั้ม.
31 กิ^เด^โอน เญย จ๊า-เฒ่ย เอ๊า เยียม เซ^เคม ฒี่ง หย่า ยู์ง ตุ๊ เต้า ตอน ปุน นิ่น. กิ^เด^โอน เถง ธ้วด บั๋ว เห่ว อา^บี^เม^เล้ก.
32 โย^อาด เญย ตอน, กิ^เด^โอน, หฮญัง-เจ๊ย โก๋ เกวย เสย หมี่ อ๊ะ. หฒัง เจี๊ยน อา^บี^เย^เซ เมี่ยน เญย มู้ง, โอ^ฟา^ลา, กิ^เด^โอน เญย เตีย, โย^อาด
เญย โฒ้ว.
33 กิ^เด^โอน เกวย เสย ลิ์ว, ฆะฮ้า อิ^สะ^ลา^เอน เมี่ยน แอ๋ง ม่าย เฮยี่ย เฮญี้ยว มี่ง ป๋าย บา^อัน เฒี่ยน. นิ่น บัว หฒั่ง บา^อัน^เบ^ลี้ด โหฒว นิ่น บัว เญย เฒี่ยน. 34 อิ^สะ^ลา^เอน เมี่ยน ไม้ จั๋ง เฒี้ยว, นิ่น บัว เญย ทิน-ฮู่ง, ต้ง เหฌียว นิ่น บัว เปย๋า ดุ๊ด เว่ย ก๋อม นิ่น บัว วั้ว เต๋ย เหยียด ฒู้ง วิน-วั้ง เญย ปั์ว-เดี๊ย. 35 นิ่น บัว หย่า ปู๋ง ด๊อด, ไม้ ม่าย เอน-ฒี่ง วิ่น ปุน เย^ลุบ^บา^อัน, เซ กิ^เด^โอน, เญย ฮมวั้ง ต่อย, เหว่ย กิ^เด^โอน เถง อิ^สะ^ลา^เอน เมี่ยน โหฒว เญย เหยียด ฒู้ง คู้ สี่.