ต้ม เจียน 5 (Judges 5)

ต้ม เจียน 5

เด^โบ^ลา เหธา บา^ล้าก เญย ฑูง

¹ วั้ว ฮนอย เด^โบ^ลา เหธา อา^บี^โน^อัม เญย ตอน, บา^ล้าก, ฯฒฯ ป๋าว น้าย ติ้ว ฑูง.

² ``อ๋อย หฒุ เธง เฒี้ยว,

เหว่ย หฒวัง เปย๊ย เฒ้ย ต้อ
อิ^สะ^ลา^เอน เมี่ยน,

แปะ ฝีง หย่า ฆอย เอ๋ย เถง.

³ ``หฒวัง ฮู่ง เตี๋ย อ้า! หมวัง ม่าะ!

หฒวัง เปย๊ย เฒ้ย อ่า, อ๋อย หฒุ แปง มน่อม หมวัง.

เยีย อ๋อย ป๋าว ฑูง เธง เฒี้ยว,

อิ^สะ^ลา^เอน เมี่ยน เญย ทิน-ฮู่ง.

⁴ `` เฒี้ยว อ้า! เม่ย เยียม เส^อี ธ้วด วั้ว หฒั่น,

เม่ย เยียม เอ^โดม เต่ย ธ้วด เจ๊า มี่ง เญย เฒี่ยง โห่,

เดา ฯฒฯ ต์ง, ลู่ง โต๋ บยู่ง เหฌี่ย,

บ๋วน ตุ้ย บยู่ง เหฌี่ย ต้าย.

⁵ บง เยียม เฒี้ยว เญย หฑะเฮมียน ต์ง,

เลี่ยม ซี^นาย บง ตอง เจี๊ยน เฒี้ยว, อิ^สะ^ลา^เอน เญย ทิน-ฮู่ง, ต์ง. * ธ้วด อี^ยิบ 19:18

⁶ ``เยียม อา^น้าด เญย ตอน, ซัม^กา, เญย ลู่ง เดี๊ย,

ยา^เอน เญย เสย, ต้ม เจ๊า ไม้ ม่าย เมี่ยน ยั่ง.

ยั่ง เจ๊า เญย เมี่ยน ขูง ยั่ง เจ๊า-ตอน, เจ๊า-ฌ้วด.

⁷ โหฒว ลี่ง โหฒว เด่ย เญย อิ^สะ^ลา^เอน เมี่ยน * ตี้ง กง,

นิ่น บัว ตี้ง เจี๊ยน เถา เยีย, * ไฟ เม่ย. เด^โบ^ลา, เจี์ย ต้าย,

เซ ตี้ง เหฌี่ย ฒั้ว เถา

เยีย เจี์ย ต้าย โหฒว อิ^สะ^ลา^เอน เมี่ยน เญย มา.

⁸ อิ^สะ^ลา^เอน เมี่ยน กิ๊น เซียง-เฒี่ยน วั้ว หฒั่น,

เบ๊าะ จ๋า เญย เจ๊า ฯฒฯ เถา ฒี่ง แก้ง อ๊ะ.

ไม้ ปวัด เหยียด นอม ท้อง-ป้าย ไฟ เหยียด ติ้ว ธัง

เยียม เปยย หว่าน เต้า อิ^สะ^ลา^เอน เมี่ยน เญย บุด๋ง.

⁹ เยีย เญย เฮญี้ยว จั๋ง อิ^สะ^ลา^เอน เญย เปย๊ย เฒ้ย,

หย่า จั๋ง ไห่ ฆอย เอ๋ย เถง เญย แปะ ฝีง. *

อ๋อย หฒุ เธง เฒี้ยว.

¹⁰ ``เม่ย เก้ ล่อ แปะ เญย เมี่ยน อ้า!

ต้ง เฒว์ย เจี๊ยน ติ่ม เก้ ออน เญย สวัง,

เหธา ยั่ง เจ๊า มี่ง ต้าย เญย เมี่ยน,

หมวัง ม่าะ! ¹¹ หมวัง เยียม ฒ่าง ววม ต๋อง ป๋าว ฑูง เมี่ยน เญย เฉีย. *

นิ่น บัว หฑั่ม เจี๊ยน ก๊อง เฒี้ยว ฮี่ง เจี๋ย เญย สี่, *

หย่า ก๊อง อิ^สะ^ลา^เอน แปะ ฝีง ตุ๊ ฮี่ง เจี๋ย.

เฒี้ยว เญย แปะ ฝีง

ฯฒฯ มี่ง วั้ว ฒี่ง แก้ง.

¹² ``เด^โบ^ลา อ้า! ต้อ เจ๊า, ต้อ เจ๊า, * ไฟ เญีย ต้าย.

ต้อ เจ๊า, ป๋าว ฑูง ต้อ เจ๊า ม่าะ!

บา^ล้าก อ้า! เจี์ย ต้าย ม่าะ!

โอ อา^บี^โน^อัม เญย ตอน อ้า!

ต้อ เจี๊ยน เม่ย ธ้าง ตุ๊ ต้าย เญย เมี่ยน มี่ง อ๊ะ.

¹³ ``วั้ว หฒั่น เหฒ่ง เหฌี่ย เญย เมี่ยน,

เหธา โหฒว โฮล วั้ว เต๋ย เหฌี่ย ต้าย,

เซ เฒี้ยว เญย แปะ ฝีง

เบ๊าะ จ๋า เฮ้น เญย แปง * มี่ง ล์อ นิ่น.

¹⁴ ม่าย กอน-ป๊วน เยียม อา^มา^เล้ก เญย เมี่ยน เยียม เอ^ฟา^อิม เหฌี่ย ต้าย.

เบน^ยา^มิน เมี่ยน เยียม เม่ย เญย แปะ ฝีง บุด๋ง กัน เจี๊ยน เม่ย.

ม่าย เปย๊ย เฒ้ย เยียม มา^คี เหฌี่ย ต้าย,

หย่า ม่าย ต้ม แปง-เปย๊ย เยียม เส^บู^ลุน เหฌี่ย.

¹⁵ อิด^สา^คา เญย เปย๊ย เฒ้ย เหธา เด^โบ^ลา ต้าย,

อิด^สา^คา เหธา เจี๊ยน บา^ล้าก หย่า ต้าย.

นิ่น บัว ก๊าน กัน เจี๊ยน มี่ง เปียะ ฮ์อง.

มป่า เยียม ลู^เบน เญย ปู้ง ป่วน เมี่ยน

ชะ ฒ่า หมั่ง กั้น เญย เฮญี้ยว.

¹⁶ เม่ย บัว เหว่ย หาย ติ่ว เยียม วั้ว ปะกี ยู่ง ล่าน * ไฟ ต๋อ.

หมวัง ปย๊ม ปุน ปะกี ยู่ง หมวัง เญย เฮล้า-ด้ง หนู เญย เฉีย?

ลู^เบน เมี่ยน เญย ปู้ง ป่วน เมี่ยน

ชะ ฒ่า หมั่ง กั้น เญย เฮญี้ยว.

¹⁷ กิ^เล^อาด เยียม วั้ว หง่าน หฒิ จอ^แดน ด้าย.

ดาน ฝีง เหว่ย หาย ติ่ว เยียม เจี๊ยน วั้ว ฑั้ง?

อา^เซ ฝีง เยียม เจี๊ยน ค้อย-เฮลน ไม้ เกวน ไม้ สี่ เญย,

โหฒว เปย๊า เยียม กั้น เญย ฑั้ง-โป่ว กะเฮลน.

¹⁸ เส^บู^ลุน ฝีง ไม้ หล่ง แหม่ง เญย เปียะ มี่ง เบ๊าะ จ๋า.

นับ^ทา^ลี เมี่ยน หย่า ฟี่ ฮนั้ง เญย

เยียม ฮลัง เญย เบ๊าะ จ๋า เธี้ยง.

¹⁹ ``เหยียด ฒู้ง ฮู่ง เตี๋ย ต้าย เถา ฯฒฯ เบ๊าะ จ๋า,

คา^นา^อัน เญย หฒวัง ฮู่ง เยียม เม^กิด^โด เญย โด๊ะ-เฮลน, ทา^อา^น้าก วั้ว เบ๊าะ จ๋า, มป่า นิ่น บัว ไม้ ตุ๊ ธ้าง ญ่าน.

²⁰ เหฮลย เยียม ลู่ง เถง เบ๊าะ จ๋า,

หฒิว นิ่น บัว ยั่ง เญย เจ๊า เบ๊าะ สิ^เส^ลา.

²¹ คี^โซน ด้าย กว๊าด นิ่น บัว มี่ง,

คี^โซน ด้าย, เซ โล์-ฮนอย เญย ด้าย.

เยีย เญย เฮญี้ยว อ่า,

กุ๊น หล่ง ชะ กัน เจี๊ยน มี่ง อ๊ะ.

²² วั้ว หฒั่น ม์า-เต้ย ธ้าย เดา บุย ไห่.

นิ่น เญย ม์า-โก๊ว หลอบๆ เญย ถิว มี่ง.

²³ เฒี้ยว เญย ฟิน-เมี่ยน ก๊อง, `เหฒียว เม^โล้ด ม่าะ!

อ๋อย หฒุ เฮนี้ยๆ เญย เหฒียว เม^โล้ด เมี่ยน,

เหว่ย หฒุ นิ่น บัว ไม้ ธ้วด ต้าย เถง เฒี้ยว,

ไม้ เถง เฒี้ยว เบ๊าะ เมี่ยน เฮ้น เมี่ยน.'

²⁴ ``ผุย ตุ๊ เธง ธั้ม เจี๋ย วั้ว เต้า มเซียะ ตอน

เซ เค^ไน เมี่ยน, เฮ^เบ เญย เอ๊า, ยา^เอน.

นิ่น เซ เยียม ด๊บ-ลิ่ว เก้า ผุย ตุ๊ เธง เจี๋ย เญย มเซียะ ตอน.

²⁵ สิ^เส^ลา โท้ ววม, ยา^เอน ปุน ง่ง หญอ,

หล่ง จ๋าย เญย หฑ่อม ฒ่าง หญอ-เหฌียด ต้าย ธุ้น ปุน นิ่น.

²⁶ ยา^เอน ซูง ปั์ว เฒาะ ธอง ด๊บ-ลิ่ว เญย ต่ง ต้าย.

บย่าว เจี๊ยะ ปั์ว นั้น เจี๊ยน บะบอง-แง้ง,

นิ่น บอง สิ^เส^ลา เหยียด หฑุ่น,

ฒู้ง เบ๊าะ นิ่น เญย มฆ้อง ฮู้ หมี่ อ๊ะ.

นิ่น บอง สิ^เส^ลา เญย มู่ง ไม่ กะเฮลน ทง มี่ง.

²⁷ สิ^เส^ลา คีง เหฌี่ย เดา,

คีง เหฌี่ย ยา^เอน เญย เหฒา-เฮลน.

นิ่น คีง เหฌี่ย ยา^เอน เญย เหฒา กะเฮลน.

นิ่น คีง เหฌี่ย หาย,

นิ่น ไต่ วั้ว หมี่ อ๊ะ.

²⁸ ``สิ^เส^ลา เญย มา เยียม ฟง ม่วน วั้ว หมั่ง.

นิ่น เยียม ฟง ม่วน เญย แพยง เห่ว เจี๊ยน ก๊อง,

`นิ่น เญย เบ๊าะ จ๋า เธีย โหฒว หาย หญู่ง ด่ง หน่าย ไง่, ไม้ หฑวน?

นิ่น เญย เบ๊าะ จ๋า ม์า-เธีย เญย เธีย-เยี่ยน เถา อี้ หฒั่น ฝู่ง ไม้ ไฮ์ บุย?'

²⁹ นิ่น เก้า ธง-เม่ง เจี๋ย เญย จวัง-โญ์ว * เตา นิ่น.

สิ^เส^ลา เญย มา ฒู้ง เตา นิ่น กั้น ก๊อง,

³⁰ `นิ่น บัว ล์อ เจี๊ยน หย่า ปุน ฆอย เบ๊าะ จ๋า ธ้าง ตุ๊ ต้าย เญย กะน้าย ไม้ เฒ์ย?

เหยียด เต้า แปง ตุ๊ เหยียด เต้า, อี เต้า เซียะ,

ธ้าง ตุ๊ หญ่ม ต้าย เญย กะน้าย เหว่ย สิ^เส^ลา,

หญ่ม ต้าย หธง เจี๊ยน เปี้ยง เญย ลุย,

อี คว้าย หญ่ม ต้าย, หธง ต้าย เญย เดีย เหว่ย เยีย เญย จาง.'

น้าย เต๋ย เหยียด ฒู้ง เซ เบ๊าะ จ๋า ธ้าง ตุ๊ ต้าย เญย กะน้าย.

³¹ ``โอ เฒี้ยว อ้า! โท้ ปุน เม่ย เญย เหยียด ฒู้ง วิน-วั้ง

ฮนั้ง น้าย นอ หฒุ เหมียด.

มป่า โท้ ปุน ฮนั้ม เม่ย วั้ว เต๋ย ฮนั้ง บะฮนอย,

ธ้วด ต้าย ยัวะ เจี๋ย เญย เฒี่ยง โห่.''

เต่ย-ปูง ฯฒฯ ถาย-แป้ง เฝย เหฒียบ หฮญัง.