1 ม่าย เต้า เมี่ยน เยียม เอ^ฟา^อิม เญย บง-ไอ๊ ต๋อง. นิ่น เญย บั๋ว เห่ว มี^คา. 2 นิ่น ก๊อง บั๋ว นิ่น เญย มา, ``ม่าย เมี่ยน หนิ่ม มา เญย วั้ว เต๋ย เหฮยียด จ้อย * ญ่าน. มา เหฒียว วั้ว เต้า จั๋น-หฒะ, เยีย หย่า ไฮ์ หมี่ อ๊ะ. หมั่ง ก๋า! วั้ว เต๋ย ญ่าน เยียม เยีย น้าย. เซ เยีย เฒาะ.''
นิ่น เญย มา ฯฒฯ ก๊อง, ``เยีย เญย ตอน อ่า, โท้ เฒี้ยว เหธย ฟุ ปุน มา เญย ตอน โอ่.''
3 มี^คา ฯฒฯ เฒาะ วั้ว เต๋ย เหฮยียด จ้อย ญ่าน ต้าย ปุน นิ่น เญย มา. นิ่น เญย มา ก๊อง, ``น้าย เต๋ย ญ่าน มา เฒาะ ต้าย ฝ่ง ห่อ ปุน เฒี้ยว เหว่ย ปุน อา ตอน หล่ง โหฒว นอม ดี้ง ต้าย เหธา นอม โต๋ ต้าย เญย หมิ่ว-ฝัง. มา ฯฒฯ แอ๋ง เฒาะ ญ่าน จิว หฑวน ปุน อา ตอน.''
4 มี^คา เฒาะ วั้ว เต๋ย ญ่าน ฝูง หฑวน ปุน นิ่น เญย มา ลิ์ว, นิ่น เญย มา ฯฒฯ เฒาะ เหยียด จ้อย เหฒียบ เป๊ด ลู์ง * ญ่าน ต้อ มี่ง ปุน ญ่าน หฒั่ง เถง ดี้ง นอม เหธา โต๋ นอม หมิ่ว-ฝัง. น้าย เต๋ย หมิ่ว-ฝัง อัน เจี๊ยน มี^คา เญย เปย๊า กะญั์ว.
5 น้าย เต้า มี^คา ม่าย นิ่น กั้น หฒั่ง เฒี่ยน เญย ต๋อง. นิ่น โหฒว นอม เอ^โฟ้ด เหธา เต๋ย หมิ่ว-ฝัง, หย่า พ้าย เต้า นิ่น เญย ตอน โหฒว นิ่น เญย ไซ เมี่ยน. 6 วั้ว จ๋า ลู่ง เดี๊ย ไม้ ม่าย ฮู่ง เตี๋ย กุ๊น อิ^สะ^ลา^เอน เมี่ยน. เก๊าะ-เมี่ยน ฯฒฯ เซว่ย เอ๋ย หฒิว เก๊าะ-เมี่ยน เญย เฮญี้ยว โหฒว. *
7 ม่าย เต้า เมี่ยน หลุน เมี่ยน, เซ ยู^ดา ปู้ง ป่วน เญย เล^วี เมี่ยน, เยียม ยู^ดา เต่ย เญย เบด^เล^เฮม มู้ง. 8 นิ่น ธ้วด ยู^ดา เต่ย, เบด^เล^เฮม มู้ง, อ๋อย ล์อ กั้น นอม ต๋อง เยียม. ยั่ง เจ๊า มี่ง วั้ว หฒั่น นิ่น มี่ง เถา เอ^ฟา^อิม เญย บง-ไอ๊ ต๋อง, มี^คา เญย เปย๊า วั้ว.
9 มี^คา หน่าย ก๋า นิ่น, ``เม่ย เยียม หาย ต้าย?''
นิ่น เตา, ``เยีย เซ เล^วี เมี่ยน, เยียม ยู^ดา เต่ย, เบด^เล^เฮม มู้ง ต้าย. เยีย อ๋อย ล์อ นอม ต๋อง เยียม.''
10 มี^คา ฯฒฯ ก๊อง บั๋ว นิ่น, ``เม่ย กุ๊น เหธา เยีย เยียม น้าย ม่าะ! เม่ย ฯฒฯ โหฒว ฮนั้ง เยีย เญย เตีย เหธา เยีย เญย ไซ เมี่ยน. เยีย แล์ง เหยียด หฮญัง ปุน ฟาม-ลู์ง * ญ่าน เหธา เหยียด เหยี่ยม ลุย-โหว เหธา เจี๊ยน หญั่น ฮบ.'' * 11 น้าย เต้า เล^วี เมี่ยน ปวั๊ง เฮญี้ยว เหธา มี^คา เยียม. นิ่น หย่า ฮนั้ง เป๋น มี^คา กั้น เญย ตอน. 12 มี^คา ฯฒฯ ออน น้าย เต้า เล^วี เมี่ยน หลุน เมี่ยน ต้าย เป๋น นิ่น เญย ไซ เมี่ยน, เยียม เจี๊ยน มี^คา เญย เปย๊า. 13 มี^คา ก๊อง, ``อี้ หฒั่น เยีย ฮิ้ว ตุ๊ เฒี้ยว อ๋อย เหธย ฟุ ปุน เยีย ตุ๊ หลง, เหว่ย หฒุ เยีย ม่าย เต้า เล^วี เมี่ยน เถง เยีย โหฒว ไซ เมี่ยน.''