โย้บ 5 (Job 5)

โย้บ 5

เอ^ลี^ฟัด ก๊อง โย้บ กั้น โหฒว ต่อง

¹ ``โย้บ อ้า! อี้ หฒั่น กุ๊น เห่ว ม่าะ!

ม่าย หาย เต้า เตา เม่ย?

เม่ย ไฮ่ ล์อ หาย เต้า ฟิน-เมี่ยน เถง?

² เฉีย เจี์ย เญย เจ๊า ไฮ่ ไต๋ ไต่ หฮงง เญย เมี่ยน,

เหมว่ย เจี๊ยะ เญย สี่ หย่า ไต๋ ไต่ ฮนั้ม ไม้ ฮิ้ว หาย หญู่ง เญย เมี่ยน.

³ เยีย ปวัด หฮงง เญย เมี่ยน เหลียบ ว้วน ฮนั้ง เหฌี่ย ฑู่ง นอ,

มป่า เยีย เลี่ยม เฒ่ย เหฒียว นิ่น เยียม เญย ต๋อง.

⁴ นิ่น เญย ตอน เซียะ ล์อ ไม้ ตุ๊ แป้ง ออน เญย ต๋อง,

เยียม ฒี่ง แก้ง ด่าง นิ่น บัว หฒุ เหฒย,

หย่า ไม้ ม่าย หาย เต้า เหฌียว.

⁵ นิ่น เซียว เญย แกง-หฒวัง หฒุ เฮญี้ยว เซีย เญย เมี่ยน หญั่น,

เลี่ยม เฒี่ยง เจี๊ยน ฌิ้ม กะญั์ว หย่า เฒาะ เหฑ่ง.

หง่อ ฆ้าด เญย เมี่ยน ฮู่งๆ แฮๆ เญย อ๋อย ตุ๊ นิ่น เญย ฒิ่น ฒ่อย.

⁶ เหฒะ หน่าน ไม้ เฒ์ย เยียม เนีย-บูง ธ้วด,

ขวน น่าน ไม้ เฒ์ย เยียม เดา-เดี๊ย ปุ๊ด ธ้วด ต้าย.

⁷ มป่า เมี่ยน ธ้วด เสย ฒู้ง หฒุ ปวั้ง ขวน น่าน

ฮนั้ง โต์ว-ฟีง * ไฟ เหนาะ. ได๋ ฝาว.

เอ^ลี^ฟัด ขวิน โย้บ
เฒาะ นิ่น เญย สี่ บั๋ว ทิน-ฮู่ง

⁸ ``สี ก๊อง เยีย นอ, เยีย อ๋อย ล์อ ทิน-ฮู่ง,

อ๋อย เฒาะ เยีย เญย สี่ จิว ปุน นิ่น.

⁹ นิ่น โหฒว โฮล เญย สี่
ฒู้ง ฮนั้ม ไม้ หฒ่าย,

หย่า โหฒว บัวะ ฮ่อง เญย สี่ ฒู้ง ซ้าว ไม้ ฮี่ง.

¹⁰ นิ่น ปุน บยู่ง เหฌี่ย เดา-เป้ย,

ปุน ววม ยู์ง เหลียง-เด่ย.

¹¹ นิ่น เฒาะ โหฒว ไฝ เญย เมี่ยน โป้ว ฝาว ฮลัง,

หย่า ปุน เฑ่า เญี้ยม เญย เมี่ยน ตุ๊ เยียม หลง.

¹² นิ่น ผอ หว่าย กู๊ ไกว๋ เมี่ยน ต๊า เญย หฒะเอ๋ย,

นิ่น บัว เญย ปั์ว ฯฒฯ โหฒว ไม้ ธ้วด หาย หญู่ง.

¹³ นิ่น ปุน ธง-เม่ง เมี่ยน
หฒุ นิ่น บัว กั้น เญย หฒะเอ๋ย ฮลบ นิ่น บัว,

หย่า ปุน กู๊ ไกว๋ เมี่ยน เญย หฒะเอ๋ย เซี้ยบๆ เญย หฒุ เหมียด. * 1 โค^ลิน^โท 3:19

¹⁴ เยียม ลู่ง ฮนอย หฒั่น นิ่น บัว ปวั้ง หฒุ หฮมวัง,

ลู่ง อ๋าน หฒั่น หฮวา น้าย หฮวา วั้ว ฮนั้ง ลู่ง ม์วน หฒั่น นอ.

¹⁵ มป่า ทิน-ฮู่ง เหฌียว เมี่ยน จ่ม เมี่ยน เปย๋า ดุ๊ด, ไม้ หฒุ เมี่ยน เหฒย. *

ปุน ตั๋ง-ต๋น เญย เมี่ยน เปย๋า ดุ๊ด เมี่ยน เฮ้น เมี่ยน เญย ปั์ว.

¹⁶ ฮนั้ง หน่าย เมี่ยน จ่ม เมี่ยน ม่าย ลั่ม ฮนั้ม ต๋อง,

ไม้ แป้ง ฟิม เญย เมี่ยน หย่า หฆับ เจี๊ยน ฑุ่ย.

เอ^ลี^ฟัด บั๋ว โย้บ,
ทิน-ฮู่ง อ๋อย ปุน นิ่น ฮนั้ง โล์ นอ

¹⁷ ``ทิน-ฮู่ง ก๊อง-หฌาว เญย เมี่ยน ม่าย ออน-เหลาะ.

เหว่ย น้าย ไม้ ตู๋ง หมั่ง เผีย เน่น เจี๋ย วั้ว เต้า * เบ๊าะ หฌาว *

¹⁸ เหว่ย หฒุ ทิน-ฮู่ง ปุน หฒุ มุน, มป่า นิ่น เปว เจี๊ยน,

นิ่น เบ๊าะ, มป่า นิ่น เญย ปั์ว หฒ่อ หลง. * โฮ^เซ^ยา 6:1

¹⁹ นิ่น อ๋อย เหฌียว เม่ย เปย๋า ดุ๊ด จุ๊ หฑุ่น เหฒะ หน่าน,

เถา เสี่ย หฑุ่น เหฒะ หน่าน, ไม้ ม่าย หาย หญู่ง ห่อย เม่ย.

²⁰ หง่อ หฮนาง เญย เฒี่ยง โห่, นิ่น เหฌียว เม่ย เปย๋า ดุ๊ด, ไม้ หฒุ ไต่.

เบ๊าะ จ๋า เญย เฒี่ยง โห่ นิ่น เหฌียว เปย๋า ดุ๊ด หฑุ ด๊าว เญย ชะ.

²¹ นิ่น เปว เจี๊ยน เม่ย, ไม้ ปุน หฒุ ก๊อง หว่า-ฮู้ เญย เมี่ยน ห่อย.

หฒุ เหมียด เญย เฒี่ยง โห่ เถา, เม่ย หย่า ไม้ กั้ม เหฑีย.

²² เม่ย ปวั้ง หฒุ เหมียด เญย สี่ เหธา หง่อ หฮนาง เม่ย ฯฒฯ คู่ จั๊ด.

เม่ย หย่า ไม้ กั้ม เหฑีย เดา-เป้ย เญย เฮยี่ย ฒ่อย.

²³ เหว่ย หฒุ เม่ย โหฒว เญย เด่ย ฒู้ง ไม้ ม่าย หละเปย๊ย, *

เยียม เด่ย เญย เฮยี่ย ฒ่อย
หย่า อ๋อย เหธา เม่ย หอบ.

²⁴ เม่ย ฯฒฯ ฮิ้ว ตุ๊ เม่ย เญย ด๊บ-ลิ่ว เยียม หลง เญย.

เม่ย ฒ่า หมั่ง เม่ย เญย ปะกี ยู่ง ล่าน หย่า ปวัด ไม้ ธา หาย หญู่ง.

²⁵ เม่ย ฒู้ง อ๋อย ฮิ้ว ตุ๊ เม่ย เญย ฟุน-ฟะ อ๋อย หฮยาง ธั้ม,

เม่ย เญย เฒ้ย-ฟุน หย่า ด่ง เดา-เป้ย เญย เมี้ย.

²⁶ เม่ย เญย เสี่ยว ญ่วน ด๊าว, หฮญัง-เจ๊ย โก๋ เม่ย หธีง เถา โฒ้ว,

ฮนั้ง เบย้า เฒ้ย เถา เฒี่ยง โห่ เซียว.''

²⁷ ``น้าย เต๋ย เหยียด ฒู้ง เยีย บัว หลงๆ เญย ฒ่า หมั่ง ลิ์ว อ๊ะ.

หมวัง ม่าะ! อ๋อย หฒุ ฮิ้ว ตุ๊ เซ เหว่ย เถง เม่ย ตุ๊ หลง.''