โย้บ 39 (Job 39)

โย้บ 39

¹ ``หละเปย๊ย-แบ๋ง เญย เฮยี่ย ยู่ง หาย หฒั่น เหฌี่ย ตอน, เม่ย ฮิ้ว เญย ไฟ?

ไฌ่ เญ์ย เหฌี่ย ตอน เม่ย ปวัด เจี๋ย เญย?

² นิ่น ม่าย เจี๊ยน ตอน เญย หฮลา-เหญียะ เม่ย ไฮ่ ซ้าว เญย ไฟ?

หาย หฒั่น เหฌี่ย ตอน เม่ย ฮิ้ว เญย?

³ เม่ย ฮิ้ว ตุ๊ นิ่น บัว หาย หฒั่น บ๊าบ เหฌี่ย,

ปุน นิ่น บัว เญย ตอน ด๊อด เดา ไฟ?

⁴ นิ่น บัว เญย ตอน เฮ้น เจี๊ยน ฝาว, เยียม หล่ม-ฮวาง โฮล ต้าย.

นิ่น บัว กวั่ง มา มี่ง หย่า ไม้ หฑวน.

⁵ ``หาย เต้า ปู๋ง เฮยี่ย ล่อ?

หาย เต้า ไจ๊ นิ่น เญย ฮลาง?

⁶ เยีย เฒาะ เดา-ฮวาง เป๋น นิ่น เญย เปย๊า,

ปุน เดา-ฑ่าย เป๋น นิ่น เยียม เญย ต๋อง.

⁷ นิ่น จั๊ด ฒี่ง โธ่ๆ เญย เฉีย,

ไม้ ไฮ์ หฒุ่น แซง-คู้ เญย เมี่ยน เห่ว เญย เฉีย บุย.

⁸ นิ่น โย่ว ก๋อม บง เป๋น นิ่น เญย เมี้ย-เธี้ยง,

นิ่น ชะ ล์อ หญู่งๆ เมี้ย-แมง หญั่น.

⁹ ``เฮยี่ย ง่ง คั้ง ฟู-สู เม่ย ไฟ?

นิ่น อ๋อย เยียม เม่ย เญย เมี้ย-โฒ่ กะเฮลน เปว๋ย เจี๋ย ม์วน ไฟ?

¹⁰ เม่ย ไฮ่ หล่ง ฮลาง โด้ เจี๊ยน เฮยี่ย ง่ง
ไล่ เดา ไฟ?

นิ่น อ๋อย กัน เม่ย ป้า ย่วน
ค้ม เญย ต๋อง ไฟ?

¹¹ เหว่ย หฒุ นิ่น ม่าย ชะ เฮ้น เม่ย ไฮ่
เขา นิ่น ไฟ?

เม่ย เฒาะ เม่ย เญย กง-เฮนี้ย จิว ปุน นิ่น โหฒว?

¹² เม่ย ปู๋ง เฮญี้ยว นิ่น ต้อ เม่ย เญย ล่าง หฒิ หฑวน ต้าย?

หย่า เซียว เม่ย เญย เบย้า เถา เบ๊าะ เบย้า เญย เธี้ยง?

เหนาะ ล่อ ท่อ, ม์า เหธา ต้ม จ๊าง

¹³ ``เหนาะ ล่อ ท่อ เฌียน-โย่ว เญย ย้าบ ด๊าด,

มป่า ซิน เญย เปยย เหธา ด๊าด เญย เปยย

เป๊ย ไม้ เถา เหนาะ เญี่ย เญย. *

¹⁴ เหนาะ ล่อ ท่อ เด่า เจ๋า กวั่ง วั้ว เดา,

ปุน เดา เถง นิ่น เญย เจ๋า เซี้ยว.

¹⁵ นิ่น ไม้ ฮนั้ม เถา ไฮ่ หฒุ เหฒา ธ้าย ฮู้,

ไฟ เฮยี่ย ฒ่อย ไฮ่ ธ้าย หว่าย.

¹⁶ นิ่น โหฒว โตะ ปุน นิ่น เญย ตอน, ฮนั้ง ไม้ เฒ์ย เป๋น นิ่น กั้น เญย ตอน นอ.

ไม้ กุ๊น นิ่น ด๊อด ชะ, นิ่น หย่า ไม้ ค้อ-ฟิ,

¹⁷ เหว่ย หฒุ ทิน-ฮู่ง ไม้ ปุน นิ่น ม่าย ธง-เม่ง,

หย่า ไม้ ปุน นิ่น ไฮ่ เปียะ เฮญี้ยว.

¹⁸ มป่า นิ่น ยัง เจี๊ยน ด๊าด ถิว วั้ว หฒั่น,

นิ่น จั๊ด ม์า เหธา เก้ ม์า เญย เมี่ยน.

¹⁹ ``โย้บ อ่า, เซ เม่ย ปุน ม์า เฮ้น ไฟ?

เซ เม่ย ปุน ม์า เญย จาง ม่าย ฑง ด๊าว ไฟ?

²⁰ เม่ย ปุน นิ่น ปิว ฮนั้ง จ๊บ-เหญ่ย,

ปุน นิ่น เท้า เฉีย บุย แฮะ เมี่ยน กั้ม เหฑีย?

²¹ นิ่น เยียม วั้ว ฮ์อง ญ้าย เดา, หย่า อะเฮน้ย นิ่น เญย ชะ,

นิ่น ธ้วด มี่ง ปวั้ง ต้อ เจี๊ยน หวัวะ กิ่น เญย แปง.

²² นิ่น จั๊ด กั้ม เหฑีย เญย สี่, นิ่น กั้น ไม้ กั้ม เหฑีย,

ปวัด หฑุ ด๊าว, นิ่น หย่า ไม้ ถุย หฑวน.

²³ เก้ ม์า เมี่ยน ปุ๋ย เญย ฟอง-ด้ง แซ้ๆ เญย บุย,

หย่า ม่าย ธัง-ด๊าว ธัง-นั้ง หฌับๆ เญย.

²⁴ นิ่น เธี้ยวๆ เญย ญ้าย เดา หย่า ถิว เจี๊ยน มี่ง,

เยี้ยด ไฮ์ จอง เญย เฉีย บุย นิ่น โซ้ว ตี่ง ไม้ ตุ๊ อ๊ะ.

²⁵ จอง เญย เฉีย หาย หฒั่น บุย นิ่น เห่ว, `แฮ้ๆ,'

นิ่น เยียม โก เญย ฮน้ม หฒุ เบ๊าะ จ๋า
เญย เฉีย,

หย่า ไฮ์ จุน-แปง-เปย๊ย เหธา เห่ว เญย เฉีย บุย.

²⁶ ``ต้ม จ๊าง ยัง ด๊าด ได๋,

หูง เจี๊ยน น่าม ปูง มี่ง,

น้าย เซ ปั่ง เม่ย เญย ธง-เม่ง โหฒว ไฟ?

²⁷ เซ เม่ย พ้าย ต้ม จ๊าง ได๋ ฝาว,

เยียม ฮลัง เญย ต๋อง โหฒว เล์า ไฟ?

²⁸ นิ่น เยียม ฮลัง เจี๋ย เญย แบ๋ง โหฒว นิ่น เญย เปย๊า,

ปั่ง แบ๋ง-นี้ง โหฒว นิ่น ว้วน เญย ต๋อง.

²⁹ เยียม น้าย นิ่น หมั่ง เจี๊ยน เฒาะ กะน้าย หญั่น,

นิ่น เญย มฒีง หมั่ง ตุ๊ ปวัด โก เญย.

³⁰ นิ่น เญย ตอน เซาะ ฑย้าม,

หฒุ ไต๋ เญย เมี่ยน เญย เซย เยียม หาย, ต้ม จ๊าง-ง่ง หย่า เยียม วั้ว.'' *