เย^เล^มี 2 (Jeremiah 2)

เย^เล^มี 2

อิ^สะ^ลา^เอน เมี่ยน กวั่ง ทิน-ฮู่ง

¹ เยีย ฒิบ เฒี้ยว เญย หว่า ก๊อง, ² ``เม่ย อ๋อย หฒุ มี่ง ฒุ่น ปุน เยียม เย^ลู^ซา^เลม เญย เมี่ยน หมวัง ไฮ์ น้าย เต๋ย หว่า. `เฒี้ยว ฮนั้ง น้าย ก๊อง,

```เยีย จั๋ง ตุ๊ เม่ย หฮญัง-เจ๊ย หลุน เญย เฒี่ยง โห่ เม่ย ด่ง หาย ฮนั้ม เยีย,

โหฒว เซียง-บวั์ง วั้ว หฒั่น เม่ย ฮนั้ม ไห่ เยีย,

เม่ย หย่า กัน เยีย เจี๋ย เต่ย-ปูง-ฮวาง,

เจี๋ย ไม้ หฒวัง เจี๋ย กะน้าย เญย เต่ย-ปูง.

³ อิ^สะ^ลา^เอน เป๋น เฒี้ยว เญย ธีง-เหฑ่ง เญย ป่วน,

เป๋น นิ่น เซียว ต้าย เญย ต้าว ถอง เปี๊ยว.

หาย เต้า หญั่น ฯฒฯ ต่อง ฒุ์ย,

หย่า หฒุ เธี้ยว เญย เหฒะ หน่าน.'''

น้าย เซ เฒี้ยว ก๊อง เญย หว่า.

⁴ ยา^โค้บ เญย เฒ้ย-ฟุน อ้า!

อิ^สะ^ลา^เอน เฒ้ย-ฟุน เญย ฝีงๆ เมี่ยน อ้า!

อ๋อย หฒุ หมวัง เฒี้ยว เญย หว่า.

เฒี้ยว ฮนั้ง น้าย ก๊อง,

⁵ ``เม่ย บัว เญย อง-ถาย ปวัด เยีย ต่อง หาย หญู่ง

นิ่น บัว หธีง ต้าย เล่ย โก เยีย?

นิ่น บัว มี่ง กัน ไม้ ลั่ม หล่ง เญย กะน้าย,

นิ่น บัว กั้น ฯฒฯ ไม้ ลั่ม หล่ง อ๊ะ

⁶ นิ่น บัว ไม้ ก๊อง, ` เฒี้ยว เยียม หาย, ต้ง ต้อ เยีย บัว ธ้วด อี^ยิบ เต่ย-ปูง,

เยี์ยน เยีย บัว เจี๋ย เต่ย-ปูง-ฮวาง,

ม่าย เดา-ฮวาง, ค้วด โด เญย เต่ย-ปูง,

เซ เต่ย-ปูง-ฮ์าน, มับ หฮมวัง เญย ต๋อง,

ไม้ ม่าย เมี่ยน เจี๋ย, ไม้ ม่าย หาย เต้า เมี่ยน เยียม เญย เต่ย-ปูง?'

⁷ เยีย ต้อ เม่ย บัว เปียะ นอม เดา-โท้ว หลง เญย เต่ย-ปูง,

ปุน เม่ย บัว อะเฮน้ย หญั่น เต่ย-ปูง เญย เปี๊ยว เหธา ธ้วด ต้าย หลง เญย กะน้าย.

มป่า เม่ย บัว เปียะ ต้าย วั้ว หฒั่น เม่ย บัว ปุน เยีย เญย เต่ย-ปูง ม่าย หวุย,

หย่า ปุน เยีย หฑิบ เญย ป่วน เป๋น กั้ม เฑี้ย เญย กะน้าย.

⁸ ไซ เมี่ยน ฒู้ง ไม้ หน่าย, ` เฒี้ยว เยียม หาย?'

หฌาว เล์ย วั้ว เต๋ย ไม้ ฮิ้ว ตุ๊ เยีย.

โหฒว โฮล เญย เมี่ยน * แหง่ง เจี๊ยน เยีย,

โต่ว หว่า เมี่ยน เขา บา^อัน เฒี่ยน โต่ว หว่า,

หย่า กัน เถง ไม้ ตุ๊ หาย หญู่ง เญย กะน้าย.''

⁹ เฒี้ยว ก๊อง, ``เหว่ย น้าย เยีย แอ๋ง เหธา เม่ย บัว แฑง,

หย่า อ๋อย เหธา เม่ย บัว เญย เฒ้ย-ฟุน แฑง.

¹⁰ เม่ย บัว กุ๊น มี่ง เถา ไซ^ปัด * ค้อย-โฑว
หมั่ง ก๋า,

ไฟ พ้าย เมี่ยน มี่ง เค^ดา ฒ่า หมั่ง หลง,

หมั่ง ก๋า ม่าย เจี๋ย น้าย หญู่ง สี่ ไฟ?

¹¹ ม่าย หาย นอม กั๊วะ เญย เมี่ยน ทิ้ว เจี๋ย นิ่น บัว เญย เฒี่ยน ไฟ?

ไม้ กุ๊น น้าย เต๋ย เฒี่ยน เซ ไม้ เฒียน.

มป่า เยีย เญย แปะ ฝีง เฒาะ นิ่น บัว เญย ฌัง-หล่าง

เหยี่ยน เถง ไม้ ตุ๊ หาย หญู่ง เญย กะน้าย.

¹² หฒวัง ลู่ง อ้า! อ๋อย หฒุ กั้ม เหฑีย ไห่,

หฒุ แฮะ ญั่นๆ เญย.''

น้าย เซ เฒี้ยว ก๊อง เญย หว่า.

¹³ ``เหว่ย หฒุ เยีย เญย แปะ ฝีง โหฒว
อี หญู่ง เอ๊าะ สี่.

นิ่น บัว กวั่ง เยีย,

เซ กวั่ง ววม-ต้าย เญย ฒี้ง,

หย่า เหว่ย กั้น หฒุ ธ้วด เซียว ววม เญย ค้วด,

เป๋น บ๋าย เญย เซียว ววม ต๋อง,

ไม้ ไฮ่ เซียว ไม้ ตุ๊ ววม.

¹⁴ อิ^สะ^ลา^เอน เป๋น โน่ว ไฟ?

เซ เยียม เปย๊า ธ้วด เสย เญย โปว ไฟ?

วั้ว หญู่ง นิ่น เหว่ย หาย ติ่ว เป๋น ธ้าง ต้าย เญย กะน้าย?

¹⁵ เซี่ยน ฌุ่น นิ่น,

ฌุ่น ตุ๊ บุย เญย,

นิ่น บัว ปุน นิ่น เญย เต่ย-ปูง เป๋น เดา-ฮวาง,

นิ่น เญย ฒี่ง หฒุ ป่าย หว่าย,

ไม้ ม่าย หาย เต้า เยียม.

¹⁶ ไม้ ตาน บัวะ น้าย,
เมม^ฟิด เมี่ยน เหธา ทา^ปาน^เหด เมี่ยน

เบ๊าะ เม่ย เญย มฆ้อง-แป้ง บ๋าย.

¹⁷ เม่ย หฒุ น้าย เต๋ย สี่ เซ หลาย เม่ย กั้น
ไม้ เฒ์ย?

เหว่ย หฒุ เฒี้ยว, เม่ย เญย ทิน-ฮู่ง, ต้อ เม่ย กัน เจ๊า มี่ง วั้ว หฒั่น,

เม่ย กวั่ง นิ่น.

¹⁸ อี้ หฒั่น เม่ย มี่ง อี^ยิบ เต่ย-ปูง เหว่ย
ตุ๊ หาย หญู่ง?

เซ เหว่ย ฮบ ไน^อา ด้าย เญย ววม?

ไฟ เม่ย มี่ง อัด^ซี^เลีย เต่ย-ปูง เหว่ย
ตุ๊ หาย หญู่ง?

เหว่ย อ๋อย ฮบ ยู^เฟ^ติด ด้าย เญย ววม ไฟ?

¹⁹ เม่ย โหฒว เญย เอ๊าะ สี่ อ๋อย เบ๊าะ หฌาว เม่ย,

เม่ย แหง่ง เจี๊ยน โต์ อ๋อย โก๋ เม่ย.

เม่ย อ๋อย หฒุ ฮิ้ว, อ๋อย หฒุ ปวัด,

เม่ย กวั่ง เฒี้ยว, เม่ย เญย ทิน-ฮู่ง,

เป๋น เอ๊าะ สี่ เหธา อิม เญย สี่.

เม่ย หย่า ไม้ ม่าย เฮญี้ยว ท่าย เยีย.''

เน่น เจี๋ย เญย เฒี้ยว ทิน-ฮู่ง ฮนั้ง น้าย ก๊อง.

อิ^สะ^ลา^เอน ไม้ คั้ง หฒั่ง เฒี้ยว

²⁰ ``ฒิ่น ด่าง โล์-ฮนอย เม่ย * ว้วด เม่ย เญย เดี๋ยง-ก์า เน้า,

หย่า ธุด ดุ๊ด โด้ เม่ย เญย ฮลาง.

เม่ย หย่า ก๊อง, `เยีย ไม้ ฟู-สู เม่ย อ๊ะ.'

เม่ย ฒู้ง เยียม นอมๆ บง-ฮลัง,

เหธา ติ้วๆ เดี๋ยง-เญี์ยม กะเดี๊ย,

เกว่ย เหฌี่ย ป๋าย เฒี่ยน. *

²¹ เยีย หฒวัง เม่ย เป๋น เก้า หลง เจี๋ย เญย อะหงุ่น เฮมย,

เป๋น เฒียน ป๊วน เหฑ่ง.

วั้ว หญู่ง เม่ย ฮนั้ง หาย นอ กุ๊น โหฒว
กุ๊น หว่าย,

เป๋น เฮยี่ย อะหงุ่น เฮมย.

²² ไม้ กุ๊น เม่ย หล่ง เฑีย-ววม หฑาว

หย่า หล่ง สะบู * ธั้ม,

กั๊วะ เม่ย วั้ว เต๋ย โหฒว ต่อง เญย ฒุ์ย

หธ่อ เยียม เยีย เญย หฑะเฮมียน
หิ่น ธ้วด เญย.''

น้าย เซ เฒี้ยว ทิน-ฮู่ง ก๊อง เญย หว่า.

²³ ``เม่ย ฮนั้ง หาย นอ ไฮ่ ก๊อง,
`เยีย ไม้ ม่าย หวุย,

เยีย ไม้ กัน บา^อัน เฒี่ยน'?

หมั่ง เม่ย เยียม ฮ์อง หฒั่ง เญย เจ๊า ม่าะ!

เม่ย ฯฒฯ ฮิ้ว ตุ๊ เม่ย โหฒว หาย หญู่ง.

เม่ย ฮนั้ง เต้า ล่อ ท่อ เหฒ่ย ถิว เจี๋ย น้าย เจี๋ย วั้ว,

²⁴ ฮนั้ง เฮยี่ย ล่อ เญ์ย เกว๋น เยียม
เต่ย-ปูง-ฮวาง

แซง ไห่ ฯฒฯ ฮน้ม หฑยาว.

นิ่น ด่ง หน่าย อ๋อย, หาย เต้า ไฮ่ ล่าน
ตุ๊ นิ่น?

หาย เต้า ล์อ นิ่น, ไม้ หฒุ ล์อ โค้ว.

ต๋อย นิ่น แซง เญย ฮนอย-เหญียะ *
นิ่น บัว ไฮ่ ล์อ ปวัด อ๊ะ.

²⁵ ไม้ ตู๋ง หฒุ่น เถา เหฒา ฮู้, *

หย่า ไม้ ตู๋ง ปุน เม่ย เญย จาง ฆ้าด.

มป่า เม่ย ก๊อง, `ไม้ ลั่ม ฮนั้ม อ๊ะ.

เยีย ฮนั้ม เหญี่ย เญย เฒี่ยน. *

เยีย อ๋อย มี่ง กัน นิ่น บัว.'

อิ^สะ^ลา^เอน หอบ หฒุ ตี่ง ฒุ์ย

²⁶ ``ฮนั้ง จั๋น-หฒะ หฒุ เฒาะ ต้าย ฯฒฯ ป่าย เฮมียน,

อิ^สะ^ลา^เอน เญย เฒ้ย-ฟุน ฮนั้ง วั้ว นอ อ๋อย หฒุ ป่าย เฮมียน,

เซ นิ่น บัว กั้น, นิ่น บัว เญย ฮู่ง เตี๋ย, นิ่น บัว โหฒว โฮล เญย เมี่ยน,

นิ่น บัว เญย ไซ เมี่ยน เหธา นิ่น บัว เญย โต่ว หว่า เมี่ยน.

²⁷ นิ่น บัว ก๊อง บั๋ว เดี๋ยง, `เม่ย โหฒว เยีย เญย เตีย,'

แอ๋ง ก๊อง บั๋ว หละเปย๊ย, `เม่ย ยู์ง เยีย ต้าย.'

นิ่น บัว ฮวิน ติ ต์าน ปุน เยีย, ไม้ ฮวิน เฮมียน,

มป่า ปวั้ง หฒุ โค้ว หน่าน เญย เฒี่ยง โห่ นิ่น บัว ก๊อง,

`เจี์ย ต้าย เหฌียว เยีย บัว ม่าะ!'

²⁸ มป่า เม่ย เหว่ย กั้น โหฒว ต้าย เญย เฒี่ยน เยียม หาย?

สี ก๊อง นิ่น บัว ไฮ่ เหฌียว เม่ย,

เม่ย ปวั้ง หฒุ โค้ว หน่าน เญย เฒี่ยง โห่

เห่ว นิ่น บัว เจี์ย ต้าย ม่าะ!

ยู^ดา อ้า! เม่ย เญย ฒี่ง บัวะ เหฒีย,

เม่ย เญย เฒี่ยน บัวะ วั้ว.

²⁹ ``เม่ย บัว เหว่ย หาย ติ่ว งบ เยีย?

เม่ย บัว เหยียด ฒู้ง แหง่ง เจี๊ยน เยีย.''

เฒี้ยว ฮนั้ง น้าย ก๊อง.

³⁰ เยีย เบ๊าะ เม่ย บัว เญย น่าม โญ์ว,

นิ่น บัว หย่า ไม้ หมวัง เยีย หฌาว.

เม่ย บัว กั้น เญย หฑุ ด๊าว เหมียด * เม่ย บัว เญย โต่ว หว่า เมี่ยน

ฮนั้ง เซี่ยน นอ, อ๋อย โหฒว เหมียด.

³¹ ``เม่ย บัว น้าย ต่อย เมี่ยน อ้า! หมวัง หลง เฒี้ยว เญย หว่า ม่าะ!

``เยีย เหว่ย อิ^สะ^ลา^เอน เป๋น
เต่ย-ปูง-ฮวาง,

ไฟ ฮนั้ง มับ หฮมวัง เญย เต่ย-ปูง ไฟ?

วั้ว หญู่ง เยีย เญย แปะ ฝีง เหว่ย หาย ติ่ว ก๊อง,

`เยีย บัว โหฒว ปู๋ง ฆอย เญย เมี่ยน,

เยีย บัว ไม้ แอ๋ง ต้าย ล์อ เม่ย อ๊ะ'?

³² เซียะ ไฮ่ หละคุ นิ่น เญย เซียว-เซ้ด ไฟ?

ไฟ เซียง-บวั์ง ไฮ่ หละคุ นิ่น ฒอง ซิน
เญย กะน้าย?

มป่า เยีย เญย แปะ ฝีง หละคุ เยีย เญย ฮนอย ฒู้ง ซ้าว ไม้่ ฮี่ง.

³³ เม่ย หฒะเก้ง ไฮ่ ต๊า หฒะเอ๋ย ล์อ เมี่ยน ฮนั้ม,

ฒู้ง หฌาว หว่าย เญย มเซียะ ตอน ฮิ้ว ตุ๊ เม่ย เญย หฒะเอ๋ย.

³⁴ เม่ย เญย ลุย-จั๊วะ ปวัด กั๊วะ เจี๊ยน

ไม้ โหฒว ต่อง เญย เมี่ยน จ่ม เมี่ยน เญย ฑย้าม.

เม่ย หย่า ไม้ เฒ์ย ปวัด นิ่น บัว ป์อง เปียะ เม่ย เญย เปย๊า.

ไม้ กุ๊น ม่าย น้าย เต๋ย เหยียด ฒู้ง สี่,

³⁵ เม่ย ก๊อง, `เยีย ไม้ โหฒว ต่อง หาย หญู่ง.

ทิน-ฮู่ง กะเฉีย ฟิว หมี่ อ๊ะ. ไม้ เฉีย เจี์ย
เยีย อ๊ะ.'

หมั่ง ม่าะ! เยีย ฒู้ง อ๋อย ปุน เม่ย
หฒุ เซี้ยม ฒุ์ย,

เหว่ย หฒุ เม่ย ก๊อง, `เยีย ไม้ ป์าม ฒุ์ย.'

³⁶ เม่ย ฮู่ง เห่ ซาว มี่ง ซาว ต้าย

ทิ้ว เม่ย เญย เจ๊า.

เม่ย ฒู้ง อ๋อย หฒุ อี^ยิบ เมี่ยน ปุน เม่ย ไญ้

ฮนั้ง ฒิ่น ด่าง อัด^ซี^เลีย เมี่ยน ปุน เม่ย
ไญ้ นอ.

³⁷ เม่ย หย่า อ๋อย หล่ง ปั์ว ปวัง เจี๊ยน มฆ้อง *

เยียม อี^ยิบ เต่ย-ปูง ธ้วด ต้าย,

เหว่ย หฒุ เฒี้ยว เฆ่ม เม่ย เขา วั้ว เต๋ย,

เม่ย ไม้ ไฮ่ ปั่ง นิ่น บัว ตุ๊ หลง เจี๊ยน ฝาว.