โฮ^เซ^ยา 4 (Hosea 4)

โฮ^เซ^ยา 4

เฒี้ยว โก๋ อิ^สะ^ลา^เอน เมี่ยน

¹ อิ^สะ^ลา^เอน เมี่ยน อ้า! เม่ย บัว อ๋อย หฒุ หมวัง เฒี้ยว เญย หว่า,

เหว่ย หฒุ เฒี้ยว ม่าย ต๋อง โก๋ น้าย นอม เต่ย-ปูง เญย แปะ ฝีง. *

``เยียม เต่ย-ปูง ไม้ ม่าย เหฒียบ ฒัวะ เญย เจ๊า

ไฟ โหฒว หลง เญย สี่ ไฟ หาย เต้า เหญี่ยม ทิน-ฮู่ง.

² ม่าย โฮ้ว เญย สี่, เมี่ยน ก๊อง-แปะ, ไต๋ เมี่ยน,

หนิ่ม กะน้าย เหธา เหฮยียน เญย สี่.

นิ่น บัว ชั้ง ม่าน โหฒว โตะ,

ไต๋ เมี่ยน ลิ่น เจี๊ยน เหยียด เต้า เจี๋ย เหยียด เต้า.

³ เหว่ย น้าย เต่ย-ปูง เฑ่า เญี้ยม *

เยียม เต่ย-ปูง กะญั์ว เญย เหยียด ฒู้ง เมี่ยน โค้ว เจี๊ยน เหฌี่ย,

เลี่ยม หล่ม-ฮวาง เญย เฮยี่ย ฒ่อย,

ด๊าม-ลู่ง เญย เหนาะ,

เลี่ยม ค้อย กะญั์ว เญย เบย์า ไต่. *

เฒี้ยว โก๋ ไซ เมี่ยน

⁴ มป่า ไม้ ตู๋ง ปุน หาย เต้า ก๊อง แปะ ฝีง

ไฟ ปุน หาย เต้า โก๋ หาย เต้า,

เยีย โก๋ เญย เซ เม่ย บัว ไซ เมี่ยน. *

⁵ ลู่ง ฮนอย หฒั่น เม่ย บัว ดิ๊ หฒุ ดอบ,

ลู่ง ม์วน หฒั่น โต่ว หว่า เมี่ยน หย่า เหธา เจี๊ยน เม่ย บัว ดิ๊ หฒุ ดอบ,

เยีย ฒู้ง อ๋อย เหมียด เม่ย บัว เญย มา. *

⁶ เยีย เญย แปะ ฝีง หฒุ เหมียด หลาย ไม้ ม่าย ว่วน ฒาง.

``เหว่ย หฒุ เม่ย บัว เฆ่ม ว่วน ฒาง,

เยีย ฯฒฯ เฆ่ม เม่ย บัว, ไม้ ปุน เม่ย บัว โหฒว ไซ เมี่ยน ฟู-สู เยีย.

เหว่ย หฒุ เม่ย บัว หละคุ เม่ย บัว เญย ทิน-ฮู่ง เญย เล์ย-หลัด,

เยีย หย่า อ๋อย หละคุ เม่ย บัว เญย เฒ้ย-ฟุน.

⁷ ไซ เมี่ยน เหยียด เฒย ธั้ม เหยียด เฒย
ป์าม ฒุ์ย ต่อง เยีย.

เยีย อ๋อย เฒาะ นิ่น บัว เญย ฌัง-หล่าง ทิ้ว เป๋น ไญ้ เญย สี่.

⁸ นิ่น บัว ปั่ง เยีย เญย แปะ ฝีง เญย ฒุ์ย หญั่น,

ฒู้ง อะเฮน้ย เยีย เญย แปะ ฝีง ป์าม ฒุ์ย.

⁹ ไซ เมี่ยน ฮนั้ง หาย นอ, แปะ ฝีง ฯฒฯ ฮนั้ง วั้ว นอ.

เยีย อ๋อย ตี่ง นิ่น บัว เญย ฒุ์ย เหว่ย นิ่น บัว โหฒว เญย เจ๊า,

หย่า หฒิว นิ่น บัว โหฒว เญย สี่
วิ่น ปุน นิ่น บัว.

¹⁰ ``นิ่น บัว ตุ๊ หญั่น มป่า ไม้ เป๊ว.

นิ่น บัว อ๋อย เหฮยียน มป่า ไม้ หฮยาง, *

หลาย นิ่น บัว กวั่ง เฒี้ยว

เหว่ย กัน เหญี่ย เญย เฒี่ยน. *

เฒี้ยว ตี่ง ป๋าย หมิ่ว-ฝัง เญย ฒุ์ย

¹¹ ``โล์-อะหงุ่น ติ๊ว เหธา เซียง-อะหงุ่น ติ๊ว

ธ้าง ธ้วด เมี่ยน เปียะ เฮญี้ยว เญย เจ๊า.

¹² เยีย เญย แปะ ฝีง หน่าย หล่ง เดี๋ยง โหฒว ต้าย เญย กะน้าย,

แอ๋ง หล่ง ติ้ว ปย๊า เตา นิ่น บัว.

เหว่ย หฒุ นิ่น บัว เหฮยียน เญย เฮญี้ยว ต้อ นิ่น บัว มี่ง ต่อง เจ๊า,

นิ่น บัว กวั่ง นิ่น บัว เญย ทิน-ฮู่ง มี่ง โหฒว เหฮยียน เญย สี่.

¹³ นิ่น บัว เยียม บง-นี้ง กู้ หงว่าย,

เหธา บง-ไอ๊ กู้ หงว่าย,

เยียม บะอง เฒวย เดี๋ยง, ปอบ^ล่า เดี๋ยง เหธา บะอง เฒวย เดี๋ยง กะเดี๊ย ฝ่ง ห่อ เหฒี่ย หย่า ปั๊ว ฮูง,

เหว่ย หฒุ เยียม น้าย เต๋ย เดี๋ยง กะเดี๊ย ล่าง เญย.

ฮนั้ง หน่าย เม่ย บัว เญย เซียะ หม่าย ซิน,

เม่ย บัว เญย เซียง-บวั์ง หย่า เหฮยียน.

¹⁴ เม่ย บัว เญย เซียะ มี่ง หม่าย ซิน,

เม่ย บัว เญย เซียง-บวั์ง เหฮยียน เญย เฒี่ยง โห่,

เยีย ไม้ ตี่ง นิ่น บัว เญย ฒุ์ย,

เหว่ย หฒุ มจั่ง ตอน กั้น มี่ง เหธา หม่าย ป๊วน-ซิน เญย มเซียะ ตอน,

หย่า เหธา เจี๊ยน วั้ว เต๋ย

หม่าย ป๊วน-ซิน เญย มเซียะ ตอน ฝ่ง ห่อ เหฒี่ย. *

ไม้ ฮิ้ว หาย หญู่ง เญย ฝีง ฒู้ง อ๋อย หฒุ เหมียด.

¹⁵ ``อิ^สะ^ลา^เอน เมี่ยน อ้า! ไม้ กุ๊น เม่ย มี่ง เหฮยียน,

ไม้ ตู๋ง ปุน ยู^ดา โหฒว ต่อง ฒุ์ย.

ไม้ ตู๋ง เปียะ กิน^กาน มู้ง

ไฟ ฝาว มี่ง เบด^อา^เวน. *

หย่า ไม้ ตู๋ง โฮ้ว หว่า ก๊อง,

`เยีย เฒี้ยง เจี๊ยน เฒี่ยง เจี๊ยน เญย เฒี้ยว. '

¹⁶ อิ^สะ^ลา^เอน เมี่ยน เฮญี้ยว แหง่ง

ฮนั้ง ไม้ หมวัง หว่า เญย ง่ง เญ์ย.

อี้ หฒั่น เฒี้ยว ไฮ่ ยู์ง นิ่น บัว

ฮนั้ง ปู๋ง ปะกี ยู่ง ตอน เยียม จั๊ง เญย เมี้ย-เธี้ยง ไฟ?

¹⁷ เอ^ฟา^อิม มี่ง กัน หมิ่ว-ฝัง หมี่ อ๊ะ,

เซว่ย นิ่น มี่ง อ๊ะ.

¹⁸ นิ่น บัว เป๋น กวั้น ฮบ ติ๊ว ฆวิน เญย เมี่ยน,

กัน เจี๊ยน เหฮยียน เญย เจ๊า มี่ง.

นิ่น บัว อ๋อย ไห่ ไญ้ เญย สี่

เก้า ธั้ม นิ่น บัว เญย ฌัง-หล่าง. *

¹⁹ หฑยาว อ๋อย ป่วน นิ่น บัว มี่ง, *

นิ่น บัว ฯฒฯ หลาย นิ่น บัว เหฒี่ย เญย กะน้าย * หฒุ ไญ้.