¹ น้าย เซ โต่ว หว่า เมี่ยน, ฮา^บา^กุก, ปวัด หล่าว ย่าง เญย สี่.

ฮา^บา^กุก งบ เญย หว่า

• ² เฒี้ยว อ่า, เยีย อ๋อย หฒุ เห่ว เจี๊ยน โท้ เม่ย ด่ง หาย เล่า
• เม่ย หธีง หมวัง?
• ไฟ เยีย อ๋อย หฒุ เห่ว เจี๊ยน บั๋ว เม่ย,
• ``หฒุ เธี้ยว เญย สี่ อ๊า โล่ะ!''
• เม่ย หย่า ไม้ เหฌียว?
• ³ เม่ย เหว่ย หาย ติ่ว ปุน เยีย ปวัด น้าย เต๋ย เอ๊าะ สี่,
• หย่า หมั่ง ปวัด โค้ว หน่าน เญย เจ๊า?
• หฒุ เหมียด เญย สี่ เหธา โตะ ไห่ เญย สี่ เยียม เยีย เญย หฑะเฮมียน,
• ฟิ้ว-แฑง ฟิ้ว-เบ๊าะ เญย สี่ หย่า ธ้วด ต้าย.
• ⁴ เหว่ย น้าย เล์ย-หลัด เมา ไห่.
• แป้ง ฟิม เญย เล์ย เหยียด ลิ์ว ไม้ ฮี่ง.
• เหว่ย หฒุ เอ๊าะ เมี่ยน เว่ย ก๋อม คู้ เมี่ยน,
• แป้ง ฟิม เญย เล์ย ฯฒฯ เพียน หมี่ อ๊ะ.

เฒี้ยว เตา เญย หว่า

• ⁵ เฒี้ยว ก๊อง, ``หมั่ง หม่าน กั๊วะ บุด๋ง
• ฯฒฯ ปวัด หฒะเก้ง บัวะ ฮ่อง,
• ฮนั้ม ไม้ เม่ง แปะ เญย สี่.
• เหว่ย หฒุ เยียม เม่ย บัว เญย ฮนอย-เหญียะ เยีย อ๋อย โหฒว เหยียด หญู่ง สี่.
• ไม้ กุ๊น เมี่ยน ก๊อง บั๋ว เม่ย บัว,
• เม่ย บัว ฒู้ง ไม้ เสียน. * กง-โฒ่ 13:41
• ⁶ เหว่ย น้าย เยีย เหลียบ บา^บี^โลน เมี่ยน, * ไฟ เคน^เดีย เมี่ยน.
• เซ เหยียด ฝีง เธี้ยว ไห่, เฮญี้ยว เป๊ะ ไห่ เญย เมี่ยน.
• นิ่น บัว มี่ง ก๋อม ลู่ง เดี๊ย
• ธ้าง ต้ง ไม้ เฒ์ย นิ่น บัว กั้น เยียม เญย ต๋อง. * 2 ฮู่ง โต้ว 24:2
• ⁷ นิ่น บัว เธี้ยว, แฮะ เมี่ยน กั้ม เหฑีย ไห่.
• นิ่น บัว โหฒว เหมา, เซว่ย เอ๋ย เหลียบ กั้น เญย เล์ย-หลัด.
• ⁸ นิ่น บัว เญย ม์า เก้า เซี้ยบ ดะม่าว เบ๋ว,
• หย่า เก้า เธี้ยว เจี๋ย ลู่ง ม์าน-หฮมวัง เญย เฮยี่ย จู๊.
• นิ่น บัว เญย เก้ ม์า แปง เยียม โก เญย ต๋อง ต้าย
• ป์อง เจี๊ยน มี่ง ด่าง,
• ฮนั้ง ต้ม จ๊าง-ง่ง ได๋ เหฌี่ย เซี้ยบ เฒาะ กะน้าย หญั่น.
• ⁹ นิ่น บัว เหยียด ฒู้ง ต้าย เหว่ย โหฒว โตะ.
• นิ่น บัว เญย กวั้น หูง เจี๊ยน วั้ว ด่าง มี่ง ฮนั้ง เต่ย-ปูง-ฮวาง เญย หฑยาว ป่วน นอ.
• นิ่น บัว เฒาะ ธ้าง ต้าย เญย เมี่ยน กั๊บ ฒุ้น ด่ง ซา-เฒียว ธั้ม.
• ¹⁰ นิ่น บัว ฮว้วด ฮู่ง เตี๋ย,
• หย่า จั๊ด เหยียด ฒู้ง เจียน.
• นิ่น บัว จั๊ด นอมๆ เว่ย ว้วน เญย ต๋อง,
• เหว่ย หฒุ นิ่น บัว ติ้น เนีย ฝาว ฮลัง ธ้าง ตุ๊ หมี่ อ๊ะ.
• ¹¹ นิ่น บัว ฮนั้ง หฑยาว นอ พ้วด เจี๋ย มี่ง.
• เป๋น ม่าย ฒุ์ย เญย เมี่ยน,
• หล่ง กั้น เญย ชะ ต๋อง นิ่น บัว เญย เฒี่ยน.''

ฮา^บา^กุก แอ๋ง งบ หฑุ่น เฒี้ยว

• ¹² โอ เฒี้ยว, เยีย เญย ทิน-ฮู่ง, เยีย เญย ธีง-เหฑ่ง ทิน-ฮู่ง อ้า!
• เม่ย เซ เยียม กอน เหยียด ลิ์ว เยียม เญย ทิน-ฮู่ง ไม้ เฒ์ย?
• เยีย บัว ฯฒฯ ไม้ ไต่.
• โอ เฒี้ยว อ่า, เม่ย เหลียบ นิ่น บัว ต้าย เหว่ย ตี่ง เมี่ยน เญย ฒุ์ย.
• โอ หละเปย๊ย อ่า, เม่ย ออน นิ่น บัว ต้าย เบ๊าะ หฌาว เมี่ยน.
• ¹³ เม่ย เญย มฒีง ธีง-เหฑ่ง ไห่, หมั่ง ไม้ ตุ๊ เอ๊าะ สี่,
• หย่า ไม้ ไฮ่ หมั่ง โหฒว ต่อง เญย เจ๊า.
• เม่ย เหว่ย หาย ติ่ว หมั่ง เจี๊ยน ไม้ เหฒียบ ฒัวะ เญย เมี่ยน?
• เม่ย ปวัด เอ๊าะ เมี่ยน นะ เก้า หลง กั้น วั้ว เต๋ย คู้ เมี่ยน เญย เฒี่ยง โห่,
• เม่ย เหว่ย หาย ติ่ว เซ้กๆ เญย เยียม,
  ไม้ โค โล?
• ¹⁴ เม่ย ปุน เมี่ยน ฮนั้ง เยียม ค้อย เญย เบย์า,
• หย่า ฮนั้ง ญอง เดา เญย กะน้าย,
• ไม้ ม่าย หาย เต้า กุ๊น.
• ¹⁵ บา^บี^โลน เมี่ยน หล่ง ติ๋ว เฒาะ หฒวัง เมี่ยน,
• หล่ง มู์ง ทอ นิ่น บัว ธ้วด ต้าย,
• หย่า หล่ง ต้ม มู์ง กว๊าด นิ่น บัว ฒุ้น,
• บา^บี^โลน เมี่ยน ฯฒฯ เฌียน-โย่ว ออน-เหลาะ ไห่.
• ¹⁶ เหว่ย น้าย นิ่น บัว ฝ่ง ห่อ ปั๊ว เหฒี่ย ปุน นิ่น บัว เญย มู์ง,
• แอ๋ง ปั๊ว ฮูง ปุน นิ่น บัว เญย ต้ม มู์ง.
• เหว่ย หฒุ นิ่น บัว ปั่ง นิ่น บัว เญย มู์ง ตุ๊ ปู๋ง-หฒัวะ คู่ เยียม,
• หญั่น ฮบ หย่า หลง ไห่.
• ¹⁷ นิ่น บัว ไม้ ตี้ง เลี่ยว เญย หล่ง หฑุ ด๊าว ไต๋ หม่าน กั๊วะ เมี่ยน,
• หย่า ไม้ ค้อ-เลี่ยน ไฟ? * ไฟ ``บา^บี^โลน เมี่ยน ตุ๊ หฒั่นๆ โต๋ ปุน มู์ง ขูง หย่า ไม้ ค้อ-เลี่ยน เญย ไต๋ หม่าน กั๊วะ เมี่ยน ไฟ?''