1 เถา เธี้ยด หฮลา, อิ^สะ^ลา^เอน เมี่ยน, เก๊าะ-เมี่ยน เยียม เหฌี่ย เก๊าะ-เมี่ยน เญย ป๊วน-มู้ง หมี่ อ๊ะ. นิ่น บัว เหยียด ฒู้ง ต้าย กั๊บ ฒุ้น เยียม เย^ลู^ซา^เลม ฒี่ง. 2 โย^ซา^ดัก เญย ตอน, เย^ซู^อา, เหธา จวั่ง โหฒว ไซ เมี่ยน เญย เมี่ยน, เหธา เซ^อัน^ทิ^เอน เญย ตอน, เส^ลุบ^บา^เบน, เหธา นิ่น เญย มั์ว-ต่อย เธียน-เธะ เจี์ย กอน เหธย อิ^สะ^ลา^เอน เมี่ยน เญย ทิน-ฮู่ง เญย เหฒี่ย-ต้อง, * เหว่ย ปุน นิ่น บัว ต้อ กะน้าย ต้าย ปั๊ว เหฒี่ย หฒิว เฟี้ย เจี๊ยน ทิน-ฮู่ง เญย เมี่ยน, โม^เซ, เญย เล์ย-หลัด โซว. 3 ไม้ กุ๊น นิ่น บัว กั้ม เหฑีย เว่ย ก๋อม เญย ป๊วน-เต่ย เมี่ยน, นิ่น บัว เยียม โล์-กอน-โด๊ะ เหธย เหฒี่ย-ต้อง หย่า ดอมๆ ม์วนๆ ต้อ กะน้าย มี่ง ปั๊ว เหฒี่ย ปุน เฒี้ยว. * 4 หฒิว เฟี้ย เจี๊ยน เล์ย-หลัด, นิ่น บัว หย่า เจี๋ย บย๊อ ลิ่ว เญย ฒิบ. * เอย เจี๊ยน เล์ย เญย โสว โหม่ว นิ่น บัว ฮนอยๆ ต้อ กะน้าย มี่ง ปั๊ว เหฒี่ย. 5 ฆะฮ้า นิ่น บัว แอ๋ง ต้อ หฒั่นๆ ปั๊ว เหฒี่ย เญย กะน้าย เหธา เปียะ เซียง-หฮลา เหฒี่ย เญย, เหธา หฒิว นอมๆ ฒิบ เหฒี่ย เญย, แอ๋ง เหธา เก๊าะ-เมี่ยน ธ้วด ฟิม เหฒี่ย ปุน เฒี้ยว เญย กะน้าย. * 6 เธี้ยด หฮลา แซง-เยี้ยด, เมี่ยน เจี์ย กอน ต้อ กะน้าย มี่ง เหฒี่ย ปุน เฒี้ยว, ไม้ กุ๊น นิ่น บัว ไม้ แก้ง เหลียบ หฒั่ง เฒี้ยว เญย เปย๊า เญย กอน-โด๊ะ.
7 อิ^สะ^ลา^เอน เมี่ยน เฒาะ ญ่าน ปุน หละเปย๊ย-หฒั่ง เหธา เดี๋ยง-หฒั่ง. แอ๋ง เฒาะ หญั่น ฮบ เหธา กะลั้น โย่ว ปุน ไซ^ดอน เมี่ยน เหธา ไท^ละ เมี่ยน เหว่ย เฒาะ เล^บา^นอน บง เญย สี^ดา ฒ่ง เดี๋ยง หว่วน เหฌี่ย เถา ค้อย, แอ๋ง หว่วน กัน ค้อย เหฌี่ย เถา ยับ^ฟา, หฒิว เป^เซีย กั๊วะ เญย ฮู่ง, ไซ^ลัด, ฆอย ฑุ่ย ปุน นิ่น บัว โหฒว.
8 หฑวน เย^ลู^ซา^เลม ฒี่ง, หฒั่ง ทิน-ฮู่ง เญย เปย๊า, ตะเหญ่ย หฮญัง เหญ่ย หฮลา, เซ^อัน^ทิ^เอน เญย ตอน, เส^ลุบ^บา^เบน, เหธา โย^ซา^ดัก เญย ตอน, เย^ซู^อา, เหธา นิ่น บัว เญย มั์ว-ต่อย เธียน-เธะ, เซ ต้ง ไซ เมี่ยน เหธา เล^วี เมี่ยน, เหธา เหยียด ฒู้ง หฒุ กว๊าด มี่ง แอ๋ง หฑวน ต้าย เญย อิ^สะ^ลา^เอน เมี่ยน, เจี์ย กอน โหฒว กง. นิ่น บัว พ้าย หฮญัง-เจ๊ย หญี่ เหฒียบ หฮญัง ฝาว แหมง เญย เล^วี เมี่ยน โหฒว เหธย หฒั่ง เฒี้ยว เญย เปย๊า เญย กุ๊น กง เมี่ยน. 9 เย^ซู^อา * เหธา นิ่น เญย ตอน บัว เหธา นิ่น เญย เธียน-เธะ, เหธา ขัด^มี^เอน เหธา นิ่น เญย ตอน บัว (เซ โฮ^ดา^วิ^ยา * เญย เฒ้ย-ฟุน) เหธา เฮ^นา^ดัด เญย ปู้ง ป่วน ตอน-เจว๊ย ฟุน-ฟะ เหธา มั์ว-ต่อย, เซ น้าย เต๋ย เล^วี เมี่ยน เถง เจี๊ยน กุ๊น เหธย หฒั่ง ทิน-ฮู่ง เญย เปย๊า เญย กง-เมี่ยน.
10 หฒั่ง เมี่ยน เหลียบ เฒี้ยว เญย เปย๊า เญย กอน-โด๊ะ วั้ว หฒั่น, หฒวัง ไซ เมี่ยน ฒุ เจี๊ยน โหฒว ไซ เญย ลุย-โหว, นั้น เจี๊ยน หฑัด ธ้วด ต้าย. เล^วี เมี่ยน, อา^สาบ เญย เฒ้ย-ฟุน, นั้น เจี๊ยน ธ่าว เฒ้ย. นิ่น บัว ล่ม ฑ่อย เธง เฒี้ยว หฒิว ฒิ่น ด่าง อิ^สะ^ลา^เอน เมี่ยน เญย ฮู่ง, ดา^วิด, ตี่ง ต้าย เญย เหยียด เหญ่ย. * 11 นิ่น บัว ป๋าว ฑูง เธง หย่า แล์ง ฒี่ง เฒี้ยว ก๊อง,
หฒวัง เมี่ยน ล่ม ฑ่อย เห่ว เฉีย บุย เญย เธง เฒี้ยว
เหว่ย หฒุ หฒั่ง เฒี้ยว
เญย เปย๊า เญย กอน-โด๊ะ เหลียบ เจี์ย ต้าย อ๊ะ.
12 มป่า ม่าย หฮญัง-เจ๊ย โก๋ เญย ไซ เมี่ยน ธั้ม เญย, เหธา เล^วี เมี่ยน, เหธา ปู้ง ป่วน เญย เปย๊ย เฒ้ย, ต้ง ปวัด เจี๋ย โล์ วั้ว นอม หฒั่ง ทิน-ฮู่ง เญย เปย๊า เญย เมี่ยน, ปวัด อี้ หฒั่น เหลียบ น้าย นอม เญย เซียง-กอน-โด๊ะ ฯฒฯ เญี้ยม ตุ๊ บุย ไห่. แอ๋ง ม่าย เมี่ยน ธั้ม! เญย เฌียน-โย่ว เญย เห่ว.
13 เยียม วั้ว เญย หฒวัง เมี่ยน ไม้ ม่าย หาย เต้า ไฮ่ สัม ตุ๊ ธ้วด วั้ว เต๋ย เฉีย บุย, หาย หญู่ง เซ เฌียน-โย่ว เญย เฉีย หาย หญู่ง เซ เญี้ยม เญย เฉีย, เหว่ย หฒุ หฒวัง เมี่ยน หฒะเก้ง! บุย ไห่. เยียม โก เญย เมี่ยน หย่า หมวัง ตุ๊ ไฮ์.