1 เยีย แอ๋ง ตุ๊ ฒิบ เฒี้ยว เญย หว่า ก๊อง, 2 ``ป้าม เมี่ยน อ้า! เม่ย อ๋อย หฒุ ก๊อง บั๋ว เม่ย เญย ป๊วน-กั๊วะ เมี่ยน, `สี ก๊อง เยีย ปุน นอม เต่ย-ปูง หฒุ หฑุ ด๊าว เบ๊าะ จ๋า, วั้ว นอม กั๊วะ เยียม นิ่น บัว เญย เมี่ยน บุด๋ง หย่า กิ๊น เต้า โหฒว เซี้ยว แกง เมี่ยน, 3 วั้ว เต้า เซี้ยว แกง เมี่ยน ปวัด วิน-วั้ง ต้อ หฑุ ด๊าว ต้าย ฟัด, นิ่น ฯฒฯ ปย๊ม จอง ขวิน เมี่ยน. 4 หาย เต้า เมี่ยน ไฮ์ จอง เญย เฉีย บุย หย่า ไม้ เอย เจี๊ยน ขวิน เญย เฉีย โหฒว, นิ่น ฯฒฯ หฒุ หฑุ ด๊าว ไต๋. เหว่ย นิ่น หฒุ ไต่, นิ่น กั้น อ๋อย หฒุ ดาม-ตอง. * 5 เหว่ย หฒุ นิ่น ไฮ์ จอง เญย เฉีย บุย, นิ่น หย่า ไม้ เอย น้าย เต๋ย ขวิน เญย เฉีย โหฒว, นิ่น กั้น อ๋อย หฒุ ดาม-ตอง. สี ก๊อง นิ่น เอย น้าย เต๋ย ขวิน เญย เฉีย, นิ่น ไฮ่ เหฌียว ตุ๊ นิ่น กั้น เญย แหม่ง. 6 มป่า สี ก๊อง เซี้ยว แกง เมี่ยน ปวัด วิน-วั้ง ต้อ หฑุ ด๊าว ต้าย ฟัด, นิ่น หย่า ไม้ ปย๊ม จอง ขวิน เมี่ยน, ฯฒฯ เยียม นิ่น บัว บุด๋ง ม่าย เต้า หฒุ หฑุ ด๊าว ไต๋, วั้ว เต้า หฒุ ไต๋ หลาย นิ่น กั้น เญย ฒุ์ย. มป่า เหว่ย นิ่น ไต่ เยีย อ๋อย ปุน เซี้ยว แกง เมี่ยน ดาม-ตอง.'
7 ``ป้าม เมี่ยน อ้า! อี้ หฒั่น เยีย พ้าย เม่ย โหฒว อิ^สะ^ลา^เอน เญย เฒ้ย-ฟุน เญย เซี้ยว แกง เมี่ยน. เม่ย หาย หฒั่น ไฮ์ เยีย เญย ฑุ่ย ก๊อง เญย หว่า เม่ย อ๋อย หฒุ ต้อ น้าย เต๋ย หว่า มี่ง ขวิน นิ่น บัว. 8 สี ก๊อง เยีย ก๊อง บั๋ว เอ๊าะ เมี่ยน, `เอ๊าะ เมี่ยน อ้า! เม่ย ด่ง หาย ฒู้ง อ๋อย หฒุ ไต่,' มป่า เม่ย หย่า ไม้ ขวิน เอ๊าะ เมี่ยน กวั่ง นิ่น โหฒว เญย เจ๊า, วั้ว เต้า เอ๊าะ เมี่ยน อ๋อย หฒุ เหว่ย นิ่น กั้น เญย ฒุ์ย หฒุ ไต่. มป่า เหว่ย นิ่น หฒุ ไต่ เยีย อ๋อย ปุน เม่ย ดาม-ตอง. 9 มป่า สี ก๊อง เม่ย ขวิน วั้ว เต้า เอ๊าะ เมี่ยน กวั่ง นิ่น โหฒว เญย เจ๊า, นิ่น หย่า ไม้ กวั่ง นอ, นิ่น อ๋อย หฒุ เหว่ย นิ่น กั้น เญย ฒุ์ย ไต่, มป่า เม่ย ตุ๊ เหฌียว ธ้วด เม่ย กั้น เญย แหม่ง.
10 ``ป้าม เมี่ยน อ้า! เม่ย อ๋อย หฒุ ก๊อง บั๋ว อิ^สะ^ลา^เอน เญย เฒ้ย-ฟุน, `เม่ย บัว ก๊อง, ``เยีย บัว โหฒว ต่อง เญย สี่ เหธา ป์าม เญย ฒุ์ย งัด เจี๊ยน เยีย บัว. เหว่ย น้าย เยีย บัว เฮย เจี๊ยน เหฌี่ย. เยีย บัว ฮนั้ง หาย นอ ไฮ่ ตุ๊ เฒี่ยง เจี๊ยน มี่ง?'''
11 เม่ย อ๋อย หฒุ ก๊อง บั๋ว นิ่น บัว, `เฒี้ยว ทิน-ฮู่ง
ก๊อง, ``เยีย เฒี้ยง เจี๊ยน เยีย กั้น
เญย แหม่ง แล์ง เยีย ไม้ อะเฮน้ย เอ๊าะ เมี่ยน ไต่. เยีย อะเฮน้ย เอ๊าะ เมี่ยน กวั่ง ฆอย นิ่น โหฒว เญย เจ๊า ตุ๊ แหม่ง เฒี่ยง เจี๊ยน. ฮวิน หฑวน ม่าะ! ฮวิน หฑวน กวั่ง ฆอย เม่ย บัว โหฒว เอ๊าะ เญย เจ๊า. โอ อิ^สะ^ลา^เอน เญย เฒ้ย-ฟุน อ้า! เม่ย บัว ฝู่ง อ๋อย หฒุ ไต่?'
12 ``ป้าม เมี่ยน อ้า! เม่ย อ๋อย หฒุ บั๋ว เม่ย เญย ป๊วน-กั๊วะ เมี่ยน, `คู้ เมี่ยน ป์าม ฒุ์ย, นิ่น โหฒว เญย คู้ สี่ ไม้ ไฮ่ เหฌียว ไม้ ตุ๊ นิ่น. เอ๊าะ เมี่ยน กวั่ง ฆอย นิ่น โหฒว เอ๊าะ เญย เจ๊า, นิ่น โหฒว เญย เอ๊าะ สี่ หย่า ไม้ ไฮ่ ปุน นิ่น ดิ๊ หฒุ ดอบ. คู้ เมี่ยน ป์าม ฒุ์ย หย่า ไม้ ไฮ่ เหว่ย นิ่น โหฒว เจี๋ย เญย คู้ สี่ ตุ๊ เฒี่ยง เจี๊ยน.' 13 ไม้ กุ๊น เยีย ก๊อง บั๋ว คู้ เมี่ยน นิ่น ฒู้ง อ๋อย ตุ๊ เฒี่ยง เจี๊ยน, สี ก๊อง นิ่น เขา นิ่น โหฒว เญย คู้ สี่ แอ๋ง โหฒว ฒุ์ย, นิ่น โหฒว เจี๋ย เญย คู้ สี่ เยีย ไม้ จั๋ง อ๊ะ. นิ่น อ๋อย หฒุ หลาย นิ่น โหฒว เญย ฒุ์ย หฒุ ไต่. 14 แอ๋ง ม่าย หญู่ง. สี ก๊อง เยีย บั๋ว เอ๊าะ เมี่ยน, `เม่ย ฒู้ง อ๋อย หฒุ ไต่,' มป่า นิ่น กวั่ง ฆอย นิ่น โหฒว เญย ฒุ์ย แอ๋ง โหฒว แป้ง ฟิม เหธา หอบ เญย เจ๊า. 15 ก๊อง ฮนั้ง นิ่น เฒาะ โหฒว ต๋อง-ต้าว เญย กะน้าย ถุย หฑวน แอ๋ง เฒาะ หนิ่ม ต้าย เญย กะน้าย ฝูง หฑวน ปุน โล์-เฒี้ยว, นิ่น เอย ปุน เมี่ยน ตุ๊ เฒี่ยง เจี๊ยน เญย เล์ย หย่า ไม้ โหฒว หาย หญู่ง เอ๊าะ สี่, นิ่น ฒู้ง ตุ๊ เฒี่ยง เจี๊ยน, ไม้ หฒุ ไต่. 16 นิ่น ป์าม เจี๋ย เญย ฒุ์ย เยีย ไม้ จั๋ง. นิ่น โหฒว แป้ง ฟิม เหธา โหฒว หอบ เญย เจ๊า ฯฒฯ ด่ง หาย ฒู้ง ตุ๊ เฒี่ยง เจี๊ยน.
17 ``มป่า เม่ย เญย ป๊วน-กั๊วะ เมี่ยน หธ่อ ก๊อง, `เฒี้ยว โหฒว เญย เจ๊า ไม้ แป้ง ฟิม.' มป่า เซ นิ่น บัว กั้น เญย เจ๊า ไม้ แป้ง ฟิม. 18 สี ก๊อง คู้ เมี่ยน กวั่ง ฆอย นิ่น โหฒว เญย คู้ สี่, นิ่น ฒู้ง อ๋อย หฒุ เหว่ย นิ่น โหฒว เญย สี่ หฒุ ไต่. 19 เอ๊าะ เมี่ยน กวั่ง ฆอย นิ่น โหฒว เญย เอ๊าะ สี่ โหฒว แป้ง ฟิม เหธา หอบ เญย เจ๊า, นิ่น เหว่ย น้าย ตุ๊ เฒี่ยง เจี๊ยน. 20 โอ อิ^สะ^ลา^เอน เญย เฒ้ย-ฟุน อ้า! เม่ย บัว หธ่อ ก๊อง, `เฒี้ยว โหฒว เญย เจ๊า ไม้ แป้ง ฟิม.' มป่า เยีย อ๋อย หฒิว เม่ย บัว เก๊าะ-เมี่ยน โหฒว เญย สี่ เซี้ยม เม่ย บัว.''
21 เยีย บัว หฒุ กว๊าด มี่ง เหฒียบ เหญ่ย หฮญัง เหฒียบ หฮลา แซง-ฮม์ วั้ว ฮนอย ม่าย ล่าน เมี่ยน เยียม เย^ลู^ซา^เลม เปย๋า ต้าย เยีย น้าย ก๊อง, ``วั้ว นอม ฒี่ง บาง หมี่ อ๊ะ.'' * 22 น้าย ล่าน เมี่ยน ไม้ แก้ง เถา ฒิ่น ด่าง วั้ว ฮนอย ลู่ง ม์าน-หฮมวัง, เฒี้ยว เญย ชะ * เยียม เยีย เญย ซิน ปุน เยีย เญย ฑุ่ย ไฮ่ ก๊อง หว่า. ตะเหญ่ย ดอม วั้ว ล่าน เมี่ยน ต้าย เถา เยีย น้าย, เยีย เญย ฑุ่ย ไฮ่ ก๊อง ตุ๊ หว่า, ไม้ แอ๋ง หฮงง อ๊ะ.
23 เยีย แอ๋ง ตุ๊ ฒิบ เฒี้ยว เญย หว่า ก๊อง, 24 ``ป้าม เมี่ยน อ้า! เยียม เจี๊ยน อิ^สะ^ลา^เอน เญย เดา-ฮวาง เญย เมี่ยน ก๊อง, `อับ^ลา^ฮัม ดุ ล่าน เมี่ยน ฮนั้ง ตุ๊ น้าย นอม เต่ย-ปูง เป๋น นิ่น เญย ป่วน. มป่า เยีย บัว เมี่ยน โสว ธั้ม, น้าย นอม เต่ย-ปูง ด่ง หาย ฒู้ง จิว เป๋น เยีย บัว เญย ป่วน.' 25 เหว่ย น้าย เม่ย อ๋อย หฒุ ก๊อง บั๋ว นิ่น บัว, `เฒี้ยว ทิน-ฮู่ง ฮนั้ง น้าย นอ ก๊อง, ``เม่ย บัว หญั่น ม่าย เจี๊ยน ฑย้าม เญย อ๊อ หย่า เธา เฮมียน หมั่ง เม่ย บัว เญย หมิ่ว-ฝัง แอ๋ง ไต๋ เมี่ยน ปุน ฑย้าม เหลี่ยว ธ้วด. เม่ย บัว หธ่อ หอบ หฒุ ตุ๊ น้าย นอม เต่ย-ปูง เป๋น เม่ย บัว เญย ป่วน ไฟ? 26 เม่ย บัว เขา เม่ย บัว เญย หฑุ ด๊าว. เม่ย บัว หย่า โหฒว กั้ม เฑี้ย เญย สี่. เต้าๆ เหฮยียน จวั่ง ล์าง เมี่ยน เญย เอ๊า. * เม่ย บัว หธ่อ ไฮ่ ตุ๊ น้าย นอม เต่ย-ปูง เป๋น เม่ย บัว เญย ป่วน ไฟ?'''
27 ``เม่ย อ๋อย หฒุ ฮนั้ง น้าย ก๊อง บั๋ว นิ่น บัว, `เฒี้ยว ทิน-ฮู่ง ฮนั้ง น้าย ก๊อง, ``เยีย เฒี้ยง เจี๊ยน เยีย กั้น เญย แหม่ง แล์ง หว่า ก๊อง, เยียม เดา-ฮวาง เญย เมี่ยน อ๋อย หฒุ หฑุ ด๊าว ไต๋. เยียม หล่ม-ฮวาง วั้ว เต๋ย หฒุ จิว ปุน เฮยี่ย ฒ่อย หญั่น. เยียม เว่ย ว้วน เญย ต๋อง เหธา เยียม แบ๋ง-ค้วด เญย เมี่ยน หฒุ ปุ๊ด ววน-แป่ง ไต่. 28 เยีย ฯฒฯ ปุน น้าย นอม เต่ย-ปูง เป๋น เดา-ฮวาง, เป๋น ป่าย หว่าย เญย ต๋อง. นิ่น โหฒว เหมา เญย ชะ ฯฒฯ หฒุด หมี่ อ๊ะ. อิ^สะ^ลา^เอน เญย บง หย่า ฮวาง เหฑ่ง, ไม้ ม่าย เมี่ยน เจี๋ย วั้ว. 29 เยีย เหว่ย นิ่น บัว โหฒว เหยียด ฒู้ง กั้ม เฑี้ย เญย สี่ ปุน เต่ย-ปูง เป๋น เดา-ฮวาง, ป่าย หว่าย เญย ต๋อง วั้ว หฒั่น, นิ่น บัว ฯฒฯ ฮิ้ว ตุ๊ เยีย เซ เฒี้ยว. '''
30 ``ป้าม เมี่ยน อ้า! เม่ย เญย ป๊วน-กั๊วะ เมี่ยน เยียม ฒี่ง หลาด กะเฮลน ไฟ เปย๊า เญย แก้ง ด่าง ก๊อง เถา เม่ย. ล่าน บั๋ว ล่าน, ก๋อ-โย์ว บั๋ว ก๋อ-โย์ว, `ต้าย ม่าะ! ต้าย หมวัง เยียม เฒี้ยว ธ้วด ต้าย เญย หว่า.' 31 นิ่น บัว ฯฒฯ ต้าย ล์อ เม่ย ฮนั้ง เหยียด เกา เมี่ยน ต้าย นอ, แอ๋ง เยียม เม่ย เญย หฑะเฮมียน ฮนั้ง เยีย เญย แปะ ฝีง. นิ่น บัว หมวัง เม่ย ก๊อง เญย หว่า มป่า ไม้ เอย เจี๊ยน โหฒว, เหว่ย หฒุ นิ่น บัว เญย ฑุ่ย ก๊อง ฮนั้ม เญย มป่า เฮญี้ยว ขูง เม้า ล์อ ญ่าน. 32 เม่ย เซ ฮนั้ง เบ๊าะ ล่อ โฑ์, หล่ง คู่ หมวัง เญย เฉีย ป๋าว ฒี่ง โย่ว ฑูง ปุน นิ่น บัว หมวัง เหว่ย หฒุ นิ่น บัว หมวัง เม่ย ก๊อง เญย หว่า หย่า ไม้ คั้ง เอย เจี๊ยน โหฒว.
33 ``น้าย เต๋ย เฒี่ยง โห่ เถา, (ด่ง หาย ฒู้ง อ๋อย เถา อ๊ะ,) นิ่น บัว ฯฒฯ ฮิ้ว ตุ๊ เยียม นิ่น บัว บุด๋ง ม่าย เต้า โต่ว หว่า เมี่ยน.''