1 สี ก๊อง เม่ย บัว หมวัง หลง เฒี้ยว, เม่ย บัว เญย ทิน-ฮู่ง เญย หว่า, เหฒียบ ฒัวะ เญย เอย เจี๊ยน เยีย อี้ ฮนอย จิว ปุน เม่ย บัว เญย เหยียด ฒู้ง หลี่ง, เฒี้ยว, เม่ย บัว เญย ทิน-ฮู่ง, ฯฒฯ ปุน เม่ย บัว เก้า โฮล เจี๋ย ลู่ง เดี๊ย เญย หม่าน ฝีง. * 2 สี ก๊อง เม่ย บัว หมวัง เฒี้ยว, เม่ย บัว เญย ทิน-ฮู่ง, เญย หว่า, เม่ย บัว ฯฒฯ ตุ๊ เหฑ่ง น้าย เต๋ย ฟุ.
3 เยียม ฒี่ง กะญั์ว เม่ย บัว อ๋อย ตุ๊ ฟุ, เยียม ลี่ง เต่ย หย่า ตุ๊ ฟุ.
4 เฒี้ยว อ๋อย เหธย ฟุ ปุน เม่ย บัว ตุ๊ ฝุเจว๊ย ธั้ม, ปุน เดา ธ้วด แกง-หฒวัง หลง, ปุน แซง-คู้ หฮยาง, ปุน ง่ง เหธา ปะกี ยู่ง เหฌี่ย ตอน ธั้ม.
5 เฒี้ยว อ๋อย เหธย ฟุ เม่ย บัว เญย เฮม้ย-ดาน เหธา เม่ย บัว หล่ง โหฒว หญั่น โหฒว ฮบ เญย จา-ต๋อง. *
6 เม่ย บัว ธ้วด หย่า ตุ๊ ฟุ, เปียะ หย่า ตุ๊ โหละ.
7 ต้าย เบ๊าะ เม่ย บัว วั้ว เต๋ย วิน-วั้ง, เฒี้ยว อ๋อย ปุน เยียม เม่ย บัว เญย หฑะเฮมียน หฒุ เซวย. นิ่น บัว ยั่ง เหยียด ติ้ว เจ๊า ต้าย เบ๊าะ เม่ย บัว, มป่า เปย๋า ธ้วด เสี่ย ติ้ว เจ๊า.
8 เฒี้ยว อ๋อย เหธย ฟุ เม่ย บัว โหฒว เญย เหยียด ฒู้ง สี่, หย่า ปุน เม่ย บัว เญย ลั์ม ม่าย ล่าง หฒิ ปวั๊ง. เยียม เฒี้ยว, เม่ย บัว เญย ทิน-ฮู่ง, จิว ปุน เม่ย บัว เญย เต่ย-ปูง, นิ่น อ๋อย เหธย ฟุ ปุน เม่ย บัว.
9 สี ก๊อง เม่ย บัว เอย เจี๊ยน เฒี้ยว, เม่ย บัว เญย ทิน-ฮู่ง เญย หลี่ง หย่า ยั่ง นิ่น เญย โต์-เล์ย, เฒี้ยว อ๋อย หฒิว นิ่น เหธา เม่ย บัว โฮ้ว เญย หว่า เหลียบ เม่ย บัว โหฒว นิ่น กั้น เญย ธีง-เหฑ่ง แปะ ฝีง. 10 ลู่ง เดี๊ย หม่าน ฝีง เมี่ยน ปวัด เม่ย บัว เป๋น เฒี้ยว เญย แปะ ฝีง, * นิ่น บัว ฯฒฯ กั้ม เหฑีย เม่ย บัว. 11 เม่ย บัว เยียม เฒี้ยว โฮ้ว ปุน เม่ย บัว เญย อง-ถาย อ๋อย ปุน เม่ย บัว เญย เต่ย-ปูง, เฒี้ยว อ๋อย ปุน เม่ย บัว ปู๋ง-หฒัวะ, ปุน เม่ย บัว ตุ๊ ฝุเจว๊ย ธั้ม, ปุน แซง-คู้ หฮยาง, หย่า ปุน เม่ย บัว เญย เดา ธ้วด แกง-หฒวัง หลง.
12 เฒี้ยว อ๋อย คอย ฆอย ทิน-โฟ้ว เญย โขว, หฒิว ธุน-เธียว ปุน ลู่ง ตุ้ย บยู่ง เหฌี่ย เม่ย บัว เญย เต่ย-ปูง, หย่า อ๋อย เหธย ฟุ เม่ย บัว เญย ปั์ว โหฒว เญย หญู่งๆ กง. เม่ย บัว ฯฒฯ ม่าย ก๊า ปุน ธั้ม-ฝีง เมี่ยน, มป่า เม่ย บัว ไม้ หฒุ เถง หาย ฝีง ก๊า หาย หญู่ง. 13 สี ก๊อง เม่ย บัว เอย เจี๊ยน เฒี้ยว, เม่ย บัว เญย ทิน-ฮู่ง เญย เล์ย-หลัด, ต้ง เยีย อี้ ฮนอย หัด เม่ย บัว เญย หว่า, เม่ย บัว ตุ๊ โหฒว โฮล เจี๋ย ไม้ เฒ์ย ไฝ เจี๋ย. * เม่ย บัว หย่า โหฒว ฮลัง เจี๊ยน ฝาว, ไม้ เฒ์ย ไอ๊ เจี๊ยน เหฌี่ย. 14 ไม้ ตู๋ง แหง่ง เยีย อี้ ฮนอย หัด เม่ย บัว เญย หาย โจ๋ว หว่า, * ไม้ ตู๋ง ปัวะ หฒั่ง กั้น เต้า เฒี่ยน.
15 มป่า สี ก๊อง เม่ย บัว ไม้ หมวัง เฒี้ยว, เม่ย บัว เญย ทิน-ฮู่ง, เญย หว่า, ไม้ เหฒียบ ฒัวะ เญย เอย เจี๊ยน เยีย อี้ ฮนอย จิว ปุน เม่ย บัว เญย เหยียด ฒู้ง หลี่ง เหธา เล์ย-หลัด, เม่ย บัว ฯฒฯ หฒุ น้าย เต๋ย เหยียด ฒู้ง เหฒียว เญย หว่า เญย เหฒะ หน่าน.
16 เม่ย บัว เยียม ฒี่ง กะญั์ว อ๋อย หฒุ เหฒียว, เยียม ลี่ง เต่ย หย่า อ๋อย หฒุ เหฒียว อ๊ะ.
17 เม่ย บัว เญย เฮม้ย-ดาน เหธา หล่ง โหฒว หญั่น ฮบ เญย จา-ต๋อง * อ๋อย หฒุ เหฒียว อ๊ะ.
18 เม่ย บัว อ๋อย หฒุ เหฒียว, ฯฒฯ ปุน เม่ย บัว ไม้ ม่าย ฝุเจว๊ย ธั้ม, ปุน เดา เญย แกง-หฒวัง ไม้ เป๋น, ปุน เม่ย บัว เญย ง่ง ตอน เหธา ปะกี ยู่ง ตอน หย่า โหฒะ.
19 ปุน เม่ย บัว ธ้วด หย่า หฒุ เหฒียว, เปียะ หย่า หฒุ เหฒียว.
20 สี ก๊อง เม่ย บัว โหฒว หว่าย, โหฒว เอ๊าะ, กวั่ง เฒี้ยว, เม่ย บัว ฒู้ง อ๋อย หฒุ เหฒียว หย่า หลุ่น เหฑ่ง. เม่ย บัว เญย ปั์ว โหฒว เญย กง หย่า โหฒว ไม้ ธ้วด หาย หญู่ง เถา เม่ย บัว เซี้ยบๆ เญย หฒุ ป่าย, หฒุ เหมียด เหฑ่ง. 21 เฒี้ยว อ๋อย ปุน เม่ย บัว หฒุ ต้ม ววน-แป่ง เถา เม่ย บัว หฒุ เหมียด เหฑ่ง, ไม้ ตุ๊ เยียม เม่ย บัว เปียะ มี่ง ตุ๊ เป๋น เม่ย บัว เญย ป่วน เต่ย-ปูง. 22 เฒี้ยว อ๋อย ปุน เม่ย บัว ปุ๊ด แป่ง-ง์าย, ซิน จอม, อ๋ม, ปุน ลู่ง ฮ์าน, ยัวะ, ม่าย หญุด โต์ว ปั๊ว, ปุน เม่ย บัว เญย กะน้าย-หฒวัง ม่าย แป่ง, เซ เจี๋ย บั๊ว ปุ๊ด ลัด-โต์ว. น้าย เต๋ย หญู่งๆ อ๋อย ห่อย เถา เม่ย บัว หฒุ เหมียด. 23 เม่ย บัว เญย มฆ้อง กู้ หงว่าย เญย ลู่ง อ๋อย ฮนั้ง ต้ง ยั่ง. เยียม เม่ย บัว เญย เหฒา กะเดี๊ย เญย เดา หย่า ฮนั้ง เฮลียะ นอ. 24 เฒี้ยว อ๋อย ปุน ตุ้ย เม่ย บัว เญย เต่ย-ปูง วั้ว เต๋ย บยู่ง เป๋น เนีย-บูง เหธา ซา-เฒียว บูง เยียม วั้ว ลู่ง เหฌี่ย ต้าย ห่อย เม่ย บัว เถา เม่ย บัว หฒุ เหมียด เหฑ่ง.
25 เฒี้ยว อ๋อย ปุน เม่ย บัว เยียม วิน-วั้ง เญย หฑะเฮมียน หฒุ เซวย. เม่ย บัว ยั่ง เหยียด ติ้ว เจ๊า มี่ง เบ๊าะ นิ่น บัว, มป่า เปย๋า ธ้วด เสี่ย ติ้ว เจ๊า. ลู่ง เดี๊ย หม่าน กั๊วะ เมี่ยน ปวัด เม่ย บัว ปวั้ง เญย สี่ ฯฒฯ แฮะ นิ่น บัว กั้ม เหฑีย ไห่ อ๊ะ. 26 ด๊าม-ลู่ง เญย เหนาะ เหธา กะเดี๊ย เดา เญย เฮยี่ย ฒ่อย อ๋อย ต้าย หญั่น เม่ย บัว เญย เซย, เลี่ยม ไม้ ม่าย เมี่ยน แฮะ เปย๋า. 27 เฒี้ยว อ๋อย ปุน เม่ย บัว เฒี่ยง เฒว่ย ฮนั้ง ฒิ่น ด่าง อี^ยิบ เมี่ยน เฒี่ยง วั้ว นอ. นิ่น หย่า อ๋อย ปุน เม่ย บัว เฒี่ยง กะน้าย, ปุ๊ด ฟาง, ซิน เซี้ยด, เซ หฒ่อ ไม้ หลง เญย แป่ง. 28 เฒี้ยว อ๋อย ปุน เม่ย บัว ปุ๊ด ดิน, ปุน มฒีง แม่ง, ปุน เฮญี้ยว ฮวาง เฮญี้ยว หลุ่น. 29 ลู่ง อ๋าน หฒั่น เม่ย บัว อ๋อย หฮวา เจี๊ยน มี่ง ฮนั้ง มฒีง แม่ง เมี่ยน เยียม หฮมวัง นอ. เม่ย บัว โหฒว เญย ติ้วๆ เจ๊า หย่า ไม้ ไฮ่ ตุ๊ หลง. เม่ย บัว หฒั่นๆ หฒุ เมี่ยน ห่อย, หฒุ เมี่ยน ลู้, ไม้ ม่าย หาย เต้า เหฌียว เม่ย บัว.
30 เม่ย บัว ก๊อง เฒี่ยง เอ๊า มป่า กั้น เต้า เมี่ยน อ๋อย มี่ง เปว๋ย. เม่ย บัว ก๊ม เซียง-เปย๊า มป่า ไม้ ตุ๊ เยียม. เม่ย บัว โหฒว หฮวีง หฒวัง อะหงุ่น เปี๊ยว หย่า ไม้ ตุ๊ หญั่น. 31 เมี่ยน อ๋อย เฒาะ เม่ย บัว เญย ง่ง ตอง เจี๊ยน เม่ย บัว ไต๋ มป่า เม่ย บัว ไม้ ตุ๊ เหยียด เต๋ย ง่ง เญย อ๊อ. เม่ย บัว กั้น เญย มฒีง ปวัด เจี๊ยน เมี่ยน ธ้าง เม่ย บัว เญย ล่อ หย่า ไม้ ฝูง หฑวน. เม่ย บัว เญย ปะกี ยู่ง หฒุ ฝูง ปุน วิน-วั้ง หย่า ไม้ ม่าย หาย เต้า เถง เม่ย บัว. 32 เม่ย บัว เญย ตอน, เม่ย บัว เญย เซียะ, หย่า อ๋อย หฒุ จิว ปุน กั้น ฝีง เมี่ยน. ฮนอยๆ หมั่ง เจี๊ยน เจ๊า-คู้ อ๋อย ปวัด นิ่น บัว หฑวน. หมั่ง เกา, มฒีง ฒู้ง ฮวา เหฑ่ง, ไม้ ปวัด นิ่น บัว หฑวน, หย่า ไม้ ม่าย ปั้น เหฒ่ย เถง อ๊ะ. 33 ต้ง เม่ย บัว ไม้ ฮิ้ว เญย เมี่ยน อ๋อย ต้าย หญั่น เม่ย บัว กั้น เญย เดา เญย กะน้าย เหธา เม่ย บัว กั้น ด๊อด ชะ หฒวัง เญย เหยียด ฒู้ง แกง-หฒวัง. เม่ย บัว หฒั่นๆ อ๋อย หฒุ เมี่ยน ห่อย, หฒุ เมี่ยน เหฒย. 34 เม่ย บัว เญย มฒีง ปวัด เญย หญู่งๆ สี่ ฯฒฯ โหฒว ปุน เม่ย บัว ไม้ ฑัง. 35 เฒี้ยว อ๋อย ปุน เม่ย บัว เญย ธี่ง เบาะ เฒี่ยง โตะ ไห่, หฒ่อ ไม้ หลง เญย เฒว่ย, หย่า เยียม เหฒา-เดี๊ย เฒี่ยง เถา มฆ้อง-แป้ง.
36 เฒี้ยว อ๋อย ต้อ เม่ย บัว เหธา เม่ย บัว เหลียบ ต้าย กุ๊น เม่ย บัว เญย ฮู่ง มี่ง เถา ต้ง เม่ย บัว เหธา เม่ย บัว เญย อง-ถาย ไม้ ฮิ้ว เญย กั๊วะ. เยียม วั้ว เม่ย บัว ฯฒฯ หฒั่ง กั้น เต้า เฒี่ยน, เซ หล่ง เดี๋ยง, หล่ง หละเปย๊ย โหฒว ต้าย เญย เฒี่ยน. 37 เยียม เฒี้ยว ต้อ เม่ย บัว มี่ง เยียม วั้ว เต๋ย นอมๆ กั๊วะ เญย เมี่ยน ปวัด เม่ย บัว ปวั้ง เญย สี่, ฯฒฯ แฮะ นิ่น บัว กั้ม เหฑีย. เม่ย บัว หฒุ นิ่น บัว ต้อ มี่ง โหฒว โก๊ว ก๊อง หย่า ฮว้วด เม่ย บัว.
38 เยียม วั้ว เด่ย เม่ย บัว หฒวัง ญิม ธั้ม, มป่า เซียว ตุ๊ โหฒะ, เหว่ย หฒุ จ๊บ-เหญ่ย หญั่น หมี่ อ๊ะ.
39 เม่ย บัว อ๋อย โหฒว หฮวีง หฒวัง อะหงุ่น เปี๊ยว เฝียว หลง, เม่ย บัว ไม้ ตุ๊ เซียว อะหงุ่น เปี๊ยว หย่า ไม้ ตุ๊ ฮบ อะหงุ่น ติ๊ว เหว่ย หฒุ แกง อ๋อย หญั่น เหฑ่ง.
40 เยียม เม่ย บัว เญย เต่ย-ปูง นอมๆ ต๋อง ม่าย กะลั้น เดี๋ยง มป่า เม่ย บัว ไม้ ตุ๊ กะลั้น โย่ว หล่ง เหว่ย หฒุ กะลั้น เปี๊ยว โปย้ เหฑ่ง หมี่ อ๊ะ.
41 เม่ย บัว ยู์ง ตอน ยู์ง เซียะ, นิ่น บัว หย่า ไม้ ตุ๊ ฝุน เป๋น เม่ย บัว เญย, เหว่ย หฒุ นิ่น บัว หฒุ ธ้าง มี่ง.
42 เยียม เม่ย บัว เญย เต่ย-ปูง เญย เดี๋ยง เหธา ลี่ง เต่ย เญย แกง-หฒวัง หฒุ จ๊บ-เหญ่ย
หญั่น เหฑ่ง.
43 เยียม เม่ย บัว บุด๋ง เญย กั้น ฝีง เมี่ยน อ๋อย กุ๊น โหฒว กุ๊น ฝาว ฮลัง. เม่ย บัว กั้น กุ๊น โหฒว กุ๊น ด๊อด เหฌี่ย ไอ๊. 44 นิ่น บัว ฯฒฯ ม่าย ก๊า ปุน เม่ย บัว หล่ง, มป่า เม่ย บัว ไม้ ม่าย ก๊า ปุน นิ่น บัว. นิ่น บัว ตุ๊ โหฒว โฮล เจี๋ย, เม่ย บัว โหฒว ไฝ เจี๋ย. *
45 เม่ย บัว ฯฒฯ หฒุ เสี่ยว น้าย เต๋ย เหยียด ฒู้ง เหฒียว เญย หว่า เถา เม่ย บัว หฒุ เหมียด, เหว่ย หฒุ เม่ย บัว ไม้ หมวัง เฒี้ยว, เม่ย บัว เญย ทิน-ฮู่ง, เญย หว่า, ไม้ เอย นิ่น จิว ปุน เม่ย บัว เญย หลี่ง เหธา เล์ย. 46 น้าย เต๋ย เหฒียว เญย หว่า เหยียด ลิ์ว โหฒว จั๋ง-โห่ เหธา บัวะ ฮ่อง เญย สี่ เหว่ย เม่ย บัว เหธา เม่ย บัว เญย ฝุเจว๊ย, 47 เหว่ย หฒุ เม่ย บัว ปู๋ง-หฒัวะ เญย เฒี่ยง โห่ เม่ย บัว ไม้ เฌียน-โย่ว อะเฮน้ย ฟู-สู เฒี้ยว, เม่ย บัว เญย ทิน-ฮู่ง. 48 เหว่ย น้าย, เม่ย บัว อ๋อย หฒุ เฮญี้ยว เซีย จาง ฆ้าด, แล่ง แก๊ง เญย เยียม, จ่ม เถา โด๊ะ, ไม้ ม่าย หาย หญู่ง, หธ่อ หฒุ ฟู-สู เฒี้ยว พ้าย ต้าย เบ๊าะ เม่ย บัว เญย วิน-วั้ง. เฒี้ยว อ๋อย ห่อย เม่ย บัว โค้ว * เถา เม่ย บัว หฒุ เหมียด เหฑ่ง. 49 เฒี้ยว อ๋อย ปุน เยียม วั้ว ลู่ง กอน โก เญย เหยียด ฝีง เมี่ยน ต้าย ฮนั้ง ต้ม จ๊าง นอ ได๋ เหฌี่ย เซี้ยบ เบ๊าะ เม่ย บัว. นิ่น บัว เญย หว่า เม่ย บัว ฒู้ง ไม้ ฮิ้ว. * 50 น้าย ฝีง เมี่ยน เญย เฮมียน-เหมว่ย เธี้ยว, นิ่น บัว ไม้ ท่าย เมี่ยน โก๋ เมี่ยน หย่า ไม้ ค้อ-เลี่ยน เมี่ยน หลุน เมี่ยน. 51 นิ่น บัว อ๋อย หญั่น เม่ย บัว เญย แซง-คู้ เหฌี่ย ต้าย เญย ตอน เหธา เม่ย บัว เญย เดา เญย แกง-หฒวัง เถา เม่ย บัว หฒุ เหมียด. เม่ย บัว เญย ล่าง หฒิ, เซียง-อะหงุ่น ติ๊ว, กะลั้น โย่ว, เลี่ยม ง่ง ตอน, ปะกี ยู่ง ตอน ฒู้ง ไม้ เลี่ยว เม่ย บัว เถา เม่ย บัว ป่าย เหฑ่ง. 52 นิ่น บัว อ๋อย เว่ย ก๋อม เบ๊าะ เม่ย บัว เญย เต่ย-ปูง เญย นอมๆ ฒี่ง เถา เม่ย บัว เขา วั้ว เต๋ย ว้วน ไห่, ฮลัง ไห่ เญย ฒี่ง หลาด บาง. นิ่น บัว ฯฒฯ เว่ย เจี๊ยน เบ๊าะ เม่ย บัว เยียม เฒี้ยว, เม่ย บัว เญย ทิน-ฮู่ง, จิว ปุน เม่ย บัว เญย เต่ย-ปูง เญย นอมๆ ฒี่ง.
53 วิน-วั้ง เว่ย เจี๊ยน เม่ย บัว วั้ว หฒั่น, นิ่น บัว ฯฒฯ ห่อย เม่ย บัว หฒุ เสี่ยว โค้ว, ฒู้ง หฒุ หญั่น เม่ย บัว กั้น ยู์ง ต้าย เญย ฝุเจว๊ย, เซ เฒี้ยว, เม่ย บัว เญย ทิน-ฮู่ง, เหธย ปุน เม่ย บัว เญย ตอน เหธา เซียะ. 54 เยียม เม่ย บัว บุด๋ง, เลี่ยม เฮญี้ยว เก้า ส่วน เก้า เมา เจี๋ย เญย มจั่ง ตอน, หย่า ไม้ ค้อ-เลี่ยน นิ่น เญย มั์ว-ต่อย ไฟ นิ่น เญย เอ๊า-ฮนั้ม ไฟ นิ่น เหฒ่ง เหฌี่ย เญย ฝุเจว๊ย, 55 เหว่ย หฒุ วิน-วั้ง ต้าย เว่ย เจี๊ยน เม่ย บัว เญย นอมๆ ฒี่ง ห่อย เม่ย บัว หฒุ เสี่ยว โค้ว, ธ้วด ลิ์ว กั้น เญย ฝุเจว๊ย เญย อ๊อ, นิ่น ไม้ ม่าย หาย หญู่ง หญั่น. นิ่น ฯฒฯ หญั่น นิ่น เญย ฝุเจว๊ย, ฒู้ง ไม้ ปุน เหยียด เต๋ย นิ่น เญย เมี่ยน. 56 เยียม เม่ย บัว บุด๋ง, เลี่ยม เฮญี้ยว เก้า ส่วน, เก้า เมา เจี๋ย เญย มเซียะ ตอน, ต้ง ไม้ หฒุ หล่ง เหฒา ยั่ง เจ๊า มี่ง หาย เดา เญย หฒั่ง ฮ่อง มเซียะ ตอน, หย่า ไม้ ค้อ-เลี่ยน นิ่น เญย โหฆ-ฮนั้ม เหธา นิ่น กั้น เญย น่าม โญ์ว. 57 นิ่น ฒู้ง หญั่น นิ่น กั้น โคะ โหะ ยู์ง ธ้วด เญย กู้งว์า-ซิ เหธา มุ่ย. หลาย วิน-วั้ง เว่ย เจี๊ยน เบ๊าะ เม่ย บัว เญย ฒี่ง ห่อย เม่ย บัว หฒุ เสี่ยว โค้ว, นิ่น ไม้ ม่าย หาย หญู่ง หญั่น ฯฒฯ ปี๋ง เจี๊ยน หญั่น นิ่น เญย กู้งว์า. *
58 สี ก๊อง เม่ย บัว ไม้ เหฒียบ ฒัวะ เญย เอย เหฑ่ง เฟี้ย เจี๊ยน น้าย ป๊วน โซว เญย เหยียด ฒู้ง หลี่ง, เม่ย บัว หย่า ไม้ ท่าย เฒี้ยว, เม่ย บัว เญย ทิน-ฮู่ง, เญย บั๋ว, เซ ฌัง-หล่าง, บัวะ ฮ่อง เญย บั๋ว นอ, 59 เฒี้ยว ฯฒฯ ปุน เม่ย บัว เหธา เม่ย บัว เญย เฒ้ย-ฟุน หฒุ โค้ว ไห่ เญย เหฒะ หน่าน, เซ หฒุ ต้ม สี่ เล่า เญย, เหธา ปุ๊ด เฮนี้ย เญย, ด๊าว เญย แป่ง-ง์าย. 60 ต้ง ฒิ่น ด่าง เยียม อี^ยิบ เต่ย-ปูง เม่ย บัว ปุ๊ด วั้ว เต๋ย แป่ง, เซ เม่ย บัว กั้ม เหฑีย เญย แป่ง, นิ่น อ๋อย ปุน เม่ย บัว แอ๋ง ปุ๊ด หฑุ่น. น้าย หญู่ง แป่ง หย่า หฒ่อ ไม้ ไฮ่ หลง. 61 เฒี้ยว อ๋อย ปุน เม่ย บัว หฒุ เลี่ยม ไม้ เฟี้ย เจี๊ยน น้าย ป๊วน เล์ย-หลัด โซว เญย ต้ม สี่ เหธา แป่ง เถา เม่ย บัว หฒุ เหมียด. 62 ไม้ กุ๊น เม่ย บัว ม่าย เมี่ยน ด่ง ลู่ง เญย เหฮลย ธั้ม, หลาย ไม้ หมวัง เฒี้ยว, เม่ย บัว เญย ทิน-ฮู่ง, เญย หว่า, ตุ๊ แหม่ง ธ้วด เญย เมี่ยน ไม้ ม่าย บัวะ เหฒีย เต้า. 63 ฒิ่น ด่าง เฒี้ยว ฮนั้ง หาย นอ อะเฮน้ย ปุน เม่ย บัว ตุ๊ หลง หย่า ปุน เม่ย บัว หฮยาง, นิ่น อ๋อย ฮนั้ง วั้ว นอ อะเฮน้ย เหมียด เม่ย บัว, ปุน เม่ย บัว ป่าย เหฑ่ง. เม่ย บัว หย่า อ๋อย หฒุ เฒี้ยว เฒาะ เม่ย บัว ธ้วด, ไม้ ตุ๊ เยียม ต้ง เม่ย บัว อี้ หฒั่น อ๋อย เปียะ มี่ง เยียม วั้ว นอม เต่ย-ปูง.
64 เฒี้ยว อ๋อย โหฒว ปุน เม่ย บัว หฑาน เหฑ่ง เยียม หม่าน ฝีง บุด๋ง, เยียม น้าย ปูง ลู่ง กอน มี่ง เถา วั้ว ปูง ลู่ง กอน. เยียม วั้ว เม่ย บัว อ๋อย หฒุ ฟู-สู เหญี่ย เญย เฒี่ยน, ต้ง เม่ย บัว เหธา เม่ย บัว เญย อง-ถาย ไม้ ฮิ้ว เญย เฒี่ยน, เซ หล่ง เดี๋ยง ไฟ หละเปย๊ย โหฒว ต้าย เญย เฒี่ยน. 65 เยียม วั้ว เต๋ย ฝีง บุด๋ง เม่ย บัว ไม้ ตุ๊ เยียม หลง หย่า ไม้ ม่าย กั้น เญย ต๋อง. เยียม วั้ว เฒี้ยว อ๋อย ปุน เม่ย บัว เฮญี้ยว หฒั่นๆ กั้ม เหฑีย, เฮญี้ยว เฑ่า, ไม้ ลั่ม ฮนั้ม ต๋อง. 66 เม่ย บัว หฒั่นๆ เฑ่า เจี๊ยน เม่ย บัว เญย แหม่ง, เฒี่ยง ฮนอย เฒี่ยง ม์วน กั้ม เหฑีย เจี๊ยน, ไม้ ฮิ้ว หาย ฮนอย นั่ง หาย ฮนอย ไต่. 67 หลาย เม่ย บัว เญย เฮญี้ยว เก้ง! กั้ม เหฑีย หย่า หลาย เม่ย บัว เญย มฒีง หมั่ง ตุ๊ ปวัด เญย สี่, ลู่ง ดอม เม่ย บัว ฯฒฯ ก๊อง, ``เฝย ตุ๊ ลู่ง ก๊าน หฮมวัง.'' เถา หฮมวัง ก๊อง, ``เฝย ตุ๊ ลู่ง ก๊าน ฌัง อ๊ะ.'' 68 เฒี้ยว อ๋อย ปุน เม่ย บัว เปียะ ฑั้ง หฑวน อี^ยิบ เต่ย-ปูง, หฑวน เยีย แล์ง เม่ย บัว เหยียด ลิ์ว ไม้ หฒุ หฑวน เญย เต่ย-ปูง. เยียม วั้ว เม่ย บัว อ๋อย หม่าย กั้น ปุน วิน-วั้ง โหฒว โน่ว เก๊า โน่ว เป์ย หย่า ไม้ ม่าย หาย เต้า ม์าย.