1 บัว ฮิ้ว ตุ๊ บัว เยียม เจี๊ยน น้าย นอม ป้าม เกน เญย ด๊บ-ลิ่ว, ต้ง บัว เญย ซิน, หฒุ แธะ วั้ว หฒั่น, เยียม วั้ว ทิน-ต้อง ทิน-ฮู่ง อ๋อย ปุน นอม ไม้ เฒ์ย เมี่ยน เญย ปั์ว โหฒว ต้าย เญย เปย๊า บัว เยียม, เซ เหยียด ลิ์ว เญย เปย๊า. 2 อี้ หฒั่น บัว เยียม เจี๊ยน น้าย นอม ซิน ฌุ่น เจี๊ยน เยียม, อะ ตุ๊ ฒั้ว ไม้ เถา ตุ๊ เยียม * ทิน-ต้อง เญย เปย๊า. 3 เยียม เจี๊ยน ทิน-ต้อง เญย เปย๊า เซ ฮนั้ง ฒุ เจี๊ยน ลุย-โหว นอ, ฯฒฯ ไม้ หฒุ แล่ง แก๊ง เยียม. 4 บัว หธ่อ เยียม น้าย นอม ด๊บ-ลิ่ว โค้ว ไห่, ฌุ่น เจี๊ยน เยียม. น้าย ไม้ เฒ์ย บัว อ๋อย กวั่ง ป้าม เกน เญย ซิน, มป่า อ๋อย ตุ๊ * ทิน-ต้อง เญย ซิน. ไฮ่ ไต่ เญย ซิน ฯฒฯ ทิ้ว เป๋น เหยียด ลิ์ว เญย ซิน. * 5 ทิน-ฮู่ง กั้น หลิ่ว เล์ย เหฒียง บัว, อ๋อย ปุน บัว ฮนั้ง น้าย ก๊อย เหยี่ยน. นิ่น หย่า ปุน สีง ลี่ง บัว เหว่ย โหฒว ตี่ง-ฒิ่น เปว เจี๊ยน ฆะฮ้า อ๋อย ตุ๊ เญย หญู่งๆ.
6 เหว่ย น้าย บัว ปู๋ง ตี่ง เฮญี้ยว. บัว ฮิ้ว ตุ๊, ตะฟ่าน บัว เญย ซิน หธ่อ โหฒว บัว เญย เปย๊า, บัว เล่ย เฒี้ยว เญย เปย๊า อ๊ะ.
7 บัว เยียม น้าย เสย หฒั่ง เขา เสียน ฟิม, ไม้ เฒ์ย เขา บัว หมั่ง ตุ๊ ปวัด เญย.
8 บัว ปู๋ง ตี่ง เฮญี้ยว หย่า เก้า อ๋อย เล่ย น้าย นอม ซิน มี่ง เหธา เฒี้ยว เยียม.
9 เก้า ธั้ม เจี๋ย, ไม้ กุ๊น บัว เยียม น้าย เสย หฒั่ง เญย ซิน ไฟ เยียม ทิน-ต้อง เญย ซิน, บัว อ๋อย โหฒว หอบ เฒี้ยว เญย เฮญี้ยว.
10 เหว่ย หฒุ บัว เหยียด ฒู้ง อ๋อย หฒุ เยียม กี^ตู่ เญย หฑะเฮมียน ปุน นิ่น เซี้ยม.
*
หฒิว เต้าๆ
เมี่ยน เยียม ป้าม เกน เญย ซิน โหฒว หลง ไฟ เธี้ยว, กี^ตู่ ฯฒฯ วิ่น ปุน นิ่น บัว.
11 เยีย บัว ฮิ้ว ตุ๊ กั้ม เหฑีย เฒี้ยว เซ ฮนั้ง หาย นอ, เยีย บัว ฯฒฯ ขวิน เมี่ยน. เยีย บัว ฮนั้ง หาย นอ, ทิน-ฮู่ง ฮิ้ว เหฑ่ง. เยีย หย่า ฮนั้ม ต้าย เยียม เม่ย บัว เญย เฮญี้ยว เม่ย บัว หย่า ฮิ้ว ตุ๊ เยีย. 12 น้าย ไม้ เฒ์ย เยีย บัว อ๋อย เธง กั้น ปุน เม่ย บัว หมวัง. มป่า เยีย บัว อ๋อย ปุน เม่ย บัว ไฮ่ ต้อ เยีย บัว มี่ง เธง, เหว่ย ปุน เม่ย บัว ม่าย หว่า เตา เมี่ยน, ต้ง เอย เป้ย หฒั่ง เธง, ไม้ เฒ์ย เอย เฮญี้ยว เธง เญย เมี่ยน. 13 สี ก๊อง เยีย บัว ปุ๊ด ดิน นอ, เซ เหว่ย ทิน-ฮู่ง ปุ๊ด. สี ก๊อง เยีย บัว ฑัง, เซ เหว่ย เถง เม่ย บัว. 14 กี^ตู่ ม่าย ฮนั้ม เมี่ยน เญย เฮญี้ยว. น้าย หญู่ง เฮญี้ยว ฯฒฯ กุ๊น เยีย บัว, เหว่ย หฒุ เยีย บัว ฮิ้ว ตี่ง, เหยียด เต้า เมี่ยน เหว่ย * หฒวัง เมี่ยน ไต่, หฒวัง เมี่ยน ฯฒฯ ไต่ หมี่ อ๊ะ. 15 กี^ตู่ เหว่ย หฒวัง เมี่ยน ไต่, ปุน เฒี่ยง เจี๊ยน เญย เมี่ยน ไม้ เฒ์ย เหว่ย นิ่น บัว กั้น เฒี่ยง. อ๋อย หฒุ เหว่ย กี^ตู่ เฒี่ยง, ต้ง เหว่ย นิ่น บัว ไต่, ทิน-ฮู่ง แอ๋ง ปุน นั่ง ต้าย วั้ว เต้า.
16 ฮนั้ง หน่าย, ยั่ง น้าย เจี๋ย เยีย บัว ไม้ หฒิว ป้าม เมี่ยน ฮนั้ม ธ้วด ต้าย เญย หฒะเอ๋ย สัม หาย เต้า. ไม้ กุ๊น ฒิ่น ด่าง เยีย บัว หล่ง ป้าม เมี่ยน เญย หฒะเอ๋ย สัม กี^ตู่, อี้ หฒั่น เยีย บัว ไม้ ฮนั้ง น้าย นอ โหฒว อ๊ะ.
17 หาย เต้า เหธา กี^ตู่ จวั่ง แหม่ง เฒี่ยง, วั้ว เต้า เป๋น เซียง-เหฒย ต้าย เญย เมี่ยน. โล์ เญย หญู่งๆ เจี๋ย เหฑ่ง, เหยียด ฒู้ง เป๋น เซียง เญย ต้าย อ๊ะ.
18 น้าย เหยียด ฒู้ง เซ ทิน-ฮู่ง โหฒว ต้าย. ทิน-ฮู่ง หล่ง กี^ตู่ ปุน บัว เหธา นิ่น หอบ เฮญี้ยว หย่า พ้าย เยีย บัว ขวิน เมี่ยน ต้าย เหธา นิ่น หอบ เฮญี้ยว.
19 เยีย บัว ฒุ่น เญย เซ ทิน-ฮู่ง หล่ง กี^ตู่ ปุน หม่าน เมี่ยน เหธา นิ่น หอบ เฮญี้ยว, หย่า กวั่ง, ไม้ ฝุน เมี่ยน เญย ฒุ์ย. นิ่น แอ๋ง พ้าย เยีย บัว มี่ง ฒุ่น บั๋ว เมี่ยน ฮนั้ง หาย นอ ไฮ่ ตุ๊ เหธา ทิน-ฮู่ง หอบ เฮญี้ยว.
20 ฮนั้ง หน่าย, เยีย บัว โหฒว กี^ตู่ เญย โต่ว เฝียน เมี่ยน ฯฒฯ ฮนั้ง ทิน-ฮู่ง กั้น หล่ง เยีย บัว โต่ว นิ่น เญย หว่า ขวิน เม่ย บัว นอ. เยีย บัว เถง กี^ตู่ โท้! เม่ย บัว เหธา ทิน-ฮู่ง หอบ เฮญี้ยว.
21 กี^ตู่ ไม้ ม่าย ฒุ์ย มป่า เหว่ย บัว, ทิน-ฮู่ง โหฒว ปุน นิ่น ฮนั้ง นิ่น เป๋น
ฒุ์ย-เมี่ยน,
*
ปุน บัว เหธา นิ่น จวั่ง แหม่ง เฒี่ยง ฯฒฯ ตุ๊ เหธา ทิน-ฮู่ง หอบ เฮญี้ยว.