1 เจี๋ย ฒิบ เญย เจ๊า เหยียด ฒู้ง ซูง เหฑ่ง, ตะฟ่าน เยียม วั้ว เญย อิ^สะ^ลา^เอน เมี่ยน มี่ง เถา ยู^ดา เญย นอมๆ ฒี่ง เบ๊าะ ฮู้ หฒั่ง เฒี่ยน เญย หละเปย๊ย-ต่ง แอ๋ง ก๋อย เหฑ่ง อา^เซ^ลา เฒี่ยน เญ์ย เญย ฝัง. นิ่น บัว แธะ เหฑ่ง เยียม ยู^ดา เหธา เบน^ยา^มิน, เอ^ฟา^อิม เหธา มะ^นัด^เส เยียม ฮลัง หฒั่ง เฒี่ยน เญย ต๋อง เหธา เหฒี่ย-ต้อง. เหมียด เหฑ่ง น้าย เต๋ย เหยียด ฒู้ง ลิ์ว, อิ^สะ^ลา^เอน เมี่ยน หฑวน นิ่น บัว กั้น เญย ฒี่ง, เก๊าะ-เมี่ยน หฑวน เก๊าะ-เมี่ยน เญย ป๊วน-เต่ย ต๋อง.
2 เฮ^เซ^คี^ยา พ้าย ไซ เมี่ยน เหธา เล^วี เมี่ยน เป๋น เหฒีย กวั้น, กวั้นๆ หย่า หฒิว นิ่น บัว โหฒว ไซ เมี่ยน ไฟ เล^วี เมี่ยน เญย กง ฟู-สู. นิ่น บัว อ๋อย หฒุ ฝ่ง ห่อ ปั๊ว เหฒี่ย หย่า เหฒี่ย เหว่ย จิว ทง, อ๋อย หฒุ เยียม หฒั่ง เฒี้ยว เญย เปย๊า เญย เต้าๆ แก้ง ฟู-สู, เธง หย่า แล์ง ฒี่ง ทิน-ฮู่ง. 3 ฮู่ง เตี๋ย หย่า ฝ่ง ห่อ นิ่น กั้น เญย กะน้าย เหว่ย ฮนอยๆ ลู่ง ดอม เหธา ลู่ง ม์าน-หฮมวัง ปั๊ว เหฒี่ย เญย หย่า เหว่ย ตี้ง กง ฮนอย, เปียะ เซียง-หฮลา เหธา หฒิว เฒี้ยว เญย เล์ย-หลัด ตี่ง ต้าย เญย ฒิบ ฝ่ง ห่อ ปั๊ว เหฒี่ย เญย กะน้าย. 4 นิ่น พ้าย เยียม เย^ลู^ซา^เลม เญย แปะ ฝีง ต้อ หอบ หฒุ ฝ่ง ห่อ ปุน ไซ เมี่ยน เหธา เล^วี เมี่ยน ตุ๊ เญย ป่วน, เหว่ย ปุน นิ่น ไฮ่ หล่ง เหฑ่ง เฮญี้ยว กัน เฒี้ยว เญย เล์ย-หลัด. 5 น้าย ติ้ว หลี่ง เยี้ยด ธ้วด มี่ง เถา นอมๆ ต๋อง, อิ^สะ^ลา^เอน เมี่ยน เฒาะ นิ่น บัว เญย ต้าว ถอง ล่าง หฒิ, เซียง-อะหงุ่น ติ๊ว, กะลั้น โย่ว, เมว์ย-ต้อง เหธา ลี่ง เต่ย ธ้วด เญย เหยียด ฒู้ง แกง-หฒวัง ธั้มๆ เญย ปุน ต้าย. นิ่น บัว หฒะเก้ง ต้อ ธั้ม ไห่, หญู่งๆ เหฒียบ โก๊ว เญย เหยียด โก๊ว ฝูง ต้าย. 6 เยียม อิ^สะ^ลา^เอน เหธา ยู^ดา เญย นอมๆ ฒี่ง เญย เมี่ยน หย่า ต้อ นิ่น บัว เญย ง่ง เหธา ปะกี ยู่ง เหฒียบ โก๊ว เญย เหยียด โก๊ว ฝูง ปุน เฒี้ยว, นิ่น บัว เญย ทิน-ฮู่ง, หย่า ต้อ ฝูง ปุน เฒี้ยว เญย ธีง-เหฑ่ง กะน้าย เหฒียบ โก๊ว เญย เหยียด โก๊ว, อัน เจี๊ยน เป๋น เหยียด ดุย เหยียด ดุย เญย. 7 เยียม ฟ่า หฮลา นิ่น บัว เจี์ย กอน ฮนั้ง น้าย โหฒว, เถา เธี้ยด หฮลา เหฒียง หมี่ อ๊ะ. 8 เฮ^เซ^คี^ยา เหธา หฒวัง เจียน ต้าย หมั่ง ปวัด น้าย เต๋ย ดุย เจี๊ยน เญย กะน้าย, นิ่น บัว เธง เฒี้ยว, หย่า ปวัง หว่า ปุน นิ่น เญย แปะ ฝีง, อิ^สะ^ลา^เอน เมี่ยน.
9 เฮ^เซ^คี^ยา หน่าย ไซ เมี่ยน เหธา เล^วี เมี่ยน เถา ดุย เจี๊ยน น้าย เต๋ย กะน้าย. 10 สา^โดก เญย โต้ว ฒง, อา^ซา^ลิ^ยา ต้ม ไซ เมี่ยน, เตา นิ่น, ``เยียม แปะ ฝีง เจี์ย กอน ต้อ ฝ่ง ห่อ เญย กะน้าย เถา เฒี้ยว เญย เปย๊า, เยีย บัว ตุ๊ หญั่น เป๊ว หธ่อ เหฒ่ง ธั้ม, เหว่ย หฒุ เฒี้ยว เหธย ฟุ ปุน นิ่น เญย เมี่ยน. เหว่ย น้าย เยีย บัว หธีง ม่าย น้าย เต๋ย เหฒ่ง เหฌี่ย เญย กะน้าย ด่ง น้าย ธั้ม.
11 เฮ^เซ^คี^ยา พ้าย เยียม หฒั่ง เฒี้ยว เญย เปย๊า หลิ่ว เล์ย เหฒีย ฉง เซียว กะน้าย เญย ต๋อง. นิ่น บัว ฯฒฯ โหฒว อ๊ะ. 12 ฆะฮ้า นิ่น บัว เหฒียบ ฒัวะ เญย ต้อ ฝ่ง ห่อ เญย กะน้าย เหธา เหฒียบ โก๊ว เญย เหยียด โก๊ว เหธา ฝูง ปุน เฒี้ยว เญย ธีง-เหฑ่ง กะน้าย. ม่าย เต้า เล^วี เมี่ยน, โค^นา^นิ^ยา, โหฒว โฮล กุ๊น น้าย เต๋ย สี่. นิ่น เญย โย์ว, ซิ^เม^อี, โหฒว ตะเหญ่ย. 13 หฒิว เฮ^เซ^คี^ยา ฮู่ง เหธา โก๋ว หฒั่ง ทิน-ฮู่ง เญย เปย๊า เญย เจียน, อา^ซา^ซิ^ยา, พ้าย เญย หว่า ม่าย เย^ฮี^เอน, อา^ซา^ซิ^ยา, นา^หัด, อา^สา^เฮน, เย^ลี^โม้ด, โย^ซา^บาด, เอ^ลี^เอน, อิด^สะ^มา^คิ^ยา, มา^ฮ้าด เหธา เบ^ไน^ยา โหฒว กุ๊น กง เมี่ยน เยียม โค^นา^นิ^ยา เหธา นิ่น เญย โย์ว, ซิ^เม^อี, เญย ปั์ว-เดี๊ย โหฒว กง.
14 เล^วี เมี่ยน, อิม^นา เญย ตอน, โค^เล, เซ ฒั้ว ตง ปูง หลาด แก้ง เญย เมี่ยน, โก๋ว ธ้วด ฟิม ฝ่ง ห่อ ปุน ทิน-ฮู่ง เญย กะน้าย, หย่า ปุน ฆอย น้าย เต๋ย ฝูง ปุน เฒี้ยว เญย กะน้าย เหธา ธีง-เหฑ่ง เญย กะน้าย. 15 ม่าย เอ^เดน, มิน^ยา^มิน, เย^ซู^อา, เซ^ไม^อา, อา^มา^ลิ^ยา เหธา เซ^คา^นิ^ยา เยียม ไซ เมี่ยน เญย นอมๆ ฒี่ง เหฒียบ ฒัวะ เญย เถง นิ่น เฒาะ กะน้าย ปุน ฆอย นิ่น บัว เญย ก๋อ-โย์ว หฒิว นิ่น บัว เญย กวั้น, ไม้ กุ๊น โก๋ หลุน, 16 ไม้ เฒ์ย หฒิว นิ่น บัว เญย โต้ว ฒง. นิ่น ปุน เต้าๆ ฟ่า เหฒียบ หฮญัง * เญย มจั่ง ตอน, ตะฟ่าน อ๋อย หฒุ หฒิว นิ่น บัว เญย ล่วน ปาน เปียะ หฒั่ง เฒี้ยว เญย เปย๊า, โหฒว ฮนอยๆ อ๋อย หฒุ เอย นิ่น บัว เญย กวั้น โหฒว นิ่น บัว เญย กง-ป่วน. 17 ไซ เมี่ยน ฝาว บั๋ว หฒิว นิ่น บัว เญย โต้ว ฒง เญย ปู้ง ป่วน. เล^วี เมี่ยน ฝาว บั๋ว หฒิว นิ่น บัว เญย กง-ป่วน เหธา นิ่น บัว เญย กวั้น. 18 นิ่น บัว หย่า ฝาว นิ่น บัว ฝุเจว๊ย-ไฝ เญย บั๋ว, เลี่ยม นิ่น บัว เญย เอ๊า-เจว๊ย น่าม โญ์ว, นิ่น บัว เหยียด ฒู้ง เมี่ยน หฒิว นิ่น บัว เญย โต้ว ฒง, เหว่ย หฒุ นิ่น บัว เหฒียบ ฒัวะ เญย สา กั้น ธีง-เหฑ่ง.
19 อา^โลน เญย เฒ้ย-ฟุน วั้ว เต๋ย ไซ เมี่ยน, ต้ง เยียม เว่ย ก๋อม นิ่น บัว เญย ฒี่ง เญย เมี้ย-เธี้ยง, ไฟ เยียม นิ่น บัว เญย หาย นอม ฒี่ง, หฒิว ม่าย บั๋ว ตี่ง เหฒียง เญย เมี่ยน, เฒาะ ปุน ฆอย เญย ป่วน ปุน เยียม นิ่น บัว บุด๋ง เญย เต้าๆ มจั่ง ตอน เหธา เหยียด ฒู้ง ฝาว บั๋ว เยียม เล^วี เมี่ยน เญย โต้ว ฒง ตาน.
20 เฮ^เซ^คี^ยา ฮนั้ง น้าย นอ โหฒว ก๋อม ยู^ดา เต่ย. หฒิว เฒี้ยว, นิ่น เญย ทิน-ฮู่ง, หมั่ง, นิ่น โหฒว หลง, โหฒว หอบ หย่า เหฒียบ ฒัวะ เญย โหฒว. 21 ตะฟ่าน นิ่น เหว่ย ทิน-ฮู่ง เญย เปย๊า โหฒว หาย หญู่ง กง ฟู-สู ไฟ เอย เจี๊ยน เล์ย-หลัด ไฟ หลี่ง, นิ่น ล์อ นิ่น เญย ทิน-ฮู่ง หย่า หล่ง เหฑ่ง เฮญี้ยว โหฒว. นิ่น ฯฒฯ ตุ๊ หลง เจี๊ยน ฝาว.