1 อา^มา^ซิ^ยา ฝาว เหว่ย โหฒว ฮู่ง วั้ว หฒั่น นิ่น เญย หฮญัง-เจ๊ย ตุ๊ หญี่ เหฒียบ ฮม์ หฮญัง. นิ่น เยียม เย^ลู^ซา^เลม กุ๊น หญี่ เหฒียบ จั๊ว หฮญัง. นิ่น เญย มา เญย บั๋ว เห่ว เย^โฮ^อัด^ดิน, เซ เย^ลู^ซา^เลม เมี่ยน. 2 หฒิว เฒี้ยว หมั่ง, อา^มา^ซิ^ยา โหฒว หอบ เญย สี่, มป่า ไม้ เฒ์ย ปวั๊ง เฮญี้ยว โหฒว. 3 อา^มา^ซิ^ยา เยี้ยด ตุ๊ กุ๊น เจี๊ยน กั๊วะ ว้วน เญย, นิ่น เฒาะ ต้ง ฒิ่น ด่าง ไต๋ นิ่น เญย เตีย วั้ว เต๋ย เจียน, ไต๋ เหฑ่ง นิ่น บัว. 4 มป่า นิ่น ไม้ ไต๋ นิ่น บัว เญย ตอน-เจว๊ย เหว่ย หฒุ หฒิว โม^เซ เญย เล์ย-หลัด โซว เฟี้ย เจี๊ยน เฒี้ยว หัด เญย หว่า ก๊อง, ``ไม้ ตู๋ง เหว่ย ตอน-เจว๊ย โหฒว เญย ฒุ์ย ไต๋ เตี๋ย หม่า. หย่า ไม้ ตู๋ง เหว่ย เตี๋ย หม่า โหฒว เญย ฒุ์ย ไต๋ ตอน-เจว๊ย. เก๊าะ-เมี่ยน อ๋อย หฒุ เหว่ย เก๊าะ-เมี่ยน โหฒว เญย ฒุ์ย หฒุ ไต่.'' *
5 อา^มา^ซิ^ยา เห่ว ยู^ดา เหธา เบน^ยา^มิน เญย หฒวัง เมี่ยน ต้าย ฒุ้น, ฯฒฯ หฒิว นิ่น บัว เญย ปู้ง ป่วน พ้าย นิ่น บัว เยียม เหยียด ธิน เหธา เหยียด แป๊ะ เต้า แปง เญย แปง-เป๊ย เญย ปั์ว-เดี๊ย. นิ่น หย่า ซ้าว เหยียด ฒู้ง หญี่ เหฒียบ หฮญัง ฝาว แหมง เญย เมี่ยน ฯฒฯ ปวัด ม่าย ปัว สิน เต้า ไฮ่ หล่ง ตุ๊ ธัง เหธา ท้อง-ป้าย เญย มจั่ง ตอน. 6 นิ่น แอ๋ง หล่ง อี ธิน เหยียด แป๊ะ จ้อย * ญ่าน ธี้ง เหยียด สิน เต้า อิ^สะ^ลา^เอน เมี่ยน เบ๊าะ จ๋า เฮ้น เญย แปง เหธา นิ่น มี่ง.
7 ม่าย เหยียด เต้า ทิน-ฮู่ง เญย เมี่ยน ต้าย บั๋ว อา^มา^ซิ^ยา, ``โอ ฮู่ง เตี๋ย อ่า, โท้ ไม้ ตู๋ง ปุน อิ^สะ^ลา^เอน เญย แปง-กวั้น เหธา เม่ย มี่ง. เฒี้ยว
ไม้ เหธา อิ^สะ^ลา^เอน เมี่ยน
เยียม, เซ ไม้ เหธา เอ^ฟา^อิม เญย หาย เต้า เมี่ยน เยียม.
8 มป่า สี ก๊อง เม่ย บัว ฮนั้ม ต้าย หล่ง น้าย หญู่ง หฒะเอ๋ย เม่ย ไฮ่ เบ๊าะ จ๋า เก้า เฮ้น นอ, ทิน-ฮู่ง อ๋อย ปุน เม่ย บัว ตอง เจี๊ยน วิน-วั้ง หฒุ เซวย, เหว่ย หฒุ ทิน-ฮู่ง ม่าย ชะ เถง เมี่ยน ฮี่ง ไฟ หฒุ ป่าย.''
9 อา^มา^ซิ^ยา หน่าย ทิน-ฮู่ง เญย เมี่ยน, ``มป่า เยีย ปุน อิ^สะ^ลา^เอน เญย แปง-กวั้น วั้ว เต๋ย อี ธิน เหยียด แป๊ะ จ้อย ญ่าน ฮนั้ง หาย นอ?''
ทิน-ฮู่ง เญย เมี่ยน เตา, `` เฒี้ยว ฒู้ง ไฮ่ เหธย ปุน เม่ย เก้า ธั้ม หน่าย เหฒีย ตั้ง.''
10 อา^มา^ซิ^ยา ฯฒฯ เห่ว เยียม เอ^ฟา^อิม กัน เจี๊ยน นิ่น ต้าย วั้ว เต๋ย จุน-แปง หฑวน อ๊ะ. นิ่น บัว โน์ว ไห่ ยู^ดา, เฉีย เจี์ย เจี๊ยน หฑวน หมี่ อ๊ะ.
11 อา^มา^ซิ^ยา หฒูง เจี๊ยน ชะ ต้อ นิ่น เญย แปง มี่ง เถา เฑ้า-ฮ์อง, เยียม วั้ว ไต๋ เหยียด หว่าน เต้า เส^อี เมี่ยน. * 12 ยู^ดา เญย แปง แอ๋ง เฒาะ ตุ๊ เหยียด หว่าน เต้า เมี่ยน * แอ๋ง ต้อ มี่ง แบ๋ง-นี้ง กู้ หงว่าย ฯฒฯ ฟ้ง นิ่น บัว ด๊อด เหฌี่ย ต้าย, ฮู้ หม่วน เหฑ่ง.
13 มป่า ต้ง อา^มา^ซิ^ยา เห่ว หฑวน, ไม้ ปุน เหธา นิ่น บัว มี่ง เบ๊าะ จ๋า วั้ว เต๋ย แปง, เบ๊าะ ยู^ดา เญย นอมๆ ฒี่ง เยียม สะ^มา^เลีย เถา เบด^โฮ^โลน. นิ่น บัว ไต๋ ปัว ธิน เต้า เมี่ยน แอ๋ง ธ้าง ตุ๊ กะน้าย ธั้ม เญย.
14 อา^มา^ซิ^ยา ไต๋ ลิ์ว เอ^โดม เมี่ยน หฑวน ต้าย, นิ่น ต้อ เจี๊ยน เส^อี เมี่ยน วั้ว เต๋ย หมิ่ว-ฝัง หฑวน แอ๋ง เหลียบ ต้าย เว่ย กั้น เญย เฒี่ยน, ฯฒฯ ป๋าย หย่า ปั๊ว ฮูง. 15 เฒี้ยว เฉีย เจี์ย! ไห่ อา^มา^ซิ^ยา, ฯฒฯ ปุน เต้า โต่ว หว่า เมี่ยน มี่ง ก๊อง บั๋ว นิ่น, ``เม่ย เหว่ย หาย ติ่ว มี่ง ล์อ น้าย ฝีง เมี่ยน เญย เฒี่ยน ต้าย? นิ่น บัว ฒู้ง ไม้ ไฮ่ เหฌียว นิ่น บัว วั้ว ฝีง เมี่ยน เปย๋า ดุ๊ด เม่ย เญย ปั์ว-เดี๊ย.
16 โต่ว หว่า เมี่ยน เหธา ฮู่ง ก๊อง เจี๊ยน หว่า วั้ว หฒั่น ฮู่ง เตี๋ย ก๊อง, ``เยีย บัว ตุ๊ เหลียบ เม่ย เถง ฮู่ง เตี๋ย ธ่าง หล่าง ไฟ? ตี้ง อ๊ะ. ไม้ เฒย แอ๊ะ, เม่ย ฒู้ง อ๋อย หฒุ ไต่ อ๊ะ.''
โต่ว หว่า เมี่ยน ฯฒฯ ตี้ง มป่า แอ๋ง ก๊อง, ``เยีย ฮิ้ว ตุ๊ ทิน-ฮู่ง ตี่ง เฮญี้ยว อ๋อย เหมียด เม่ย, เหว่ย หฒุ เม่ย ฮนั้ง น้าย นอ โหฒว, หย่า ไม้ หมวัง เยีย ขวิน เญย หว่า.''
17 ยู^ดา เญย ฮู่ง, อา^มา^ซิ^ยา, เหธา นิ่น เญย ธ่าง ล่าง เมี่ยน ธ่าง ล่าง หอบ, อา^มา^ซิ^ยา ฯฒฯ พ้าย เมี่ยน มี่ง บั๋ว เย^ฮู เญย ฟุน, เย^โฮ^อา^หาด เญย ตอน, อิ^สะ^ลา^เอน เญย ฮู่ง, เย^โฮ^อาด, * ก๊อง, ``ต้าย ม่าะ! บัว อี เต้า ต๋อย เฮมียน เบ๊าะ จ๋า.''
18 มป่า อิ^สะ^ลา^เอน เญย ฮู่ง, เย^โฮ^อาด, แอ๋ง พ้าย เมี่ยน บั๋ว ยู^ดา เญย ฮู่ง, อา^มา^ซิ^ยา, ``เยียม เล^บา^นอน บง ม่าย ฒู่ง ฌิ้ม ปุน หว่า มี่ง บั๋ว ติ้ว เยียม เล^บา^นอน บง เญย สี^ดา ฒ่ง เดี๋ยง, `ปู๋ง เม่ย เญย เซียะ ปุน เยีย เญย ตอน หล่ง โหฒว เอ๊า.' ฆะฮ้า ม่าย เต้า เฮยี่ย ฒ่อย ต้าย ธ้าย วั้ว ฒู่ง ฌิ้ม.
19 เม่ย ก๊อง, `หมั่ง ม่าะ! เยีย เบ๊าะ เอ^โดม หมี่ อ๊ะ.' เม่ย ฯฒฯ เธง-โฮล, ปู๋ง หว่า-เหมา. อ๋อย หฒุ ปวั๊ง เฮญี้ยว เม่ย ตุ๊ ต้าย เญย ฌัง-หล่าง หย่า เยียม เจี๊ยน เปย๊า ม่าะ! เหว่ย หาย ติ่ว ธัวะ
สี่ ปุน เม่ย กั้น เหธา ยู^ดา กั๊วะ หฒุ ป่าย?
20 มป่า อา^มา^ซิ^ยา ไม้ คั้ง หมวัง. น้าย เซ ทิน-ฮู่ง โหฒว เญย เจ๊า เหว่ย เฒาะ นิ่น บัว จิว ปุน เยียม เย^โฮ^อาด เญย ปั์ว-เดี๊ย, หลาย นิ่น บัว ล์อ เอ^โดม เญย เฒี่ยน. 21 อิ^สะ^ลา^เอน เญย ฮู่ง, เย^โฮ^อาด, ฯฒฯ ต้าย เยียม ยู^ดา เญย เบด^เซ^เม้ด มู้ง เหธา ยู^ดา เญย ฮู่ง, อา^มา^ซิ^ยา, ต๋อย เฮมียน เบ๊าะ จ๋า. 22 ยู^ดา ฯฒฯ เซวย อิ^สะ^ลา^เอน. เก๊าะ-เมี่ยน เปย๋า หฑวน เก๊าะ-เมี่ยน เญย เปย๊า. 23 เยียม เบด^เซ^เม้ด, อิ^สะ^ลา^เอน เญย ฮู่ง, เย^โฮ^อาด, เฒาะ ตุ๊ อา^หัด^ยา * เญย ฟุน, เย^โฮ^อาด เญย ตอน, ยู^ดา เญย ฮู่ง, อา^มา^ซิ^ยา. แอ๋ง ต้อ เถา เย^ลู^ซา^เลม. นิ่น หย่า แธะ หว่าย ฒี่ง หลาด เยียม เอ^ฟา^อิม หลาด แก้ง มี่ง เถา เก๊าะ เญย แก้ง. 24 นิ่น เฒาะ เหฑ่ง โอ^เบด^เอ^โดม โก๋ว เญย เจียม ญ่าน เหธา เยียม หฒั่ง ทิน-ฮู่ง เญย เปย๊า เญย เหยียด ฒู้ง จา-ต๋อง เหธา ฮู่ง ติ่น กะญั์ว เหยียด ฒู้ง จ๋าย เญย กะน้าย. นิ่น หย่า ต้อ เต๋ย เมี่ยน มี่ง โหฒว ต๋อง-ต้าว ฯฒฯ หฑวน สะ^มา^เลีย ฒี่ง หมี่ อ๊ะ.
25 อิ^สะ^ลา^เอน เญย ฮู่ง, เย^โฮ^อา^หาด เญย ตอน, เย^โฮ^อาด, เกวย เสย ลิ์ว, ยู^ดา เญย ฮู่ง, โย^อาด เญย ตอน, อา^มา^ซิ^ยา, หธ่อ เฒี่ยง เจี๊ยน เหฒียบ ฮม์ หฮญัง. 26 อา^มา^ซิ^ยา โหฒว เหฒ่ง เหฌี่ย เญย สี่, เยียม กอน เถา เซ้ด เมว์ย, เฟี้ย เจี๊ยน ยู^ดา เหธา อิ^สะ^ลา^เอน เญย ฮู่ง โต้ว ตาน. 27 เยียม อา^มา^ซิ^ยา กวั่ง, ไม้ กัน เฒี้ยว, ฆะฮ้า เยียม เย^ลู^ซา^เลม ม่าย เมี่ยน เป่ย เดี๊ย ธ่าง ล่าง อ๋อย แหง่ง นิ่น. นิ่น ฯฒฯ เปย๋า มี่ง เถา ลา^คี้ด ฒี่ง, มป่า นิ่น บัว พ้าย เมี่ยน มี่ง เถา ลา^คี้ด, เยียม วั้ว ไต๋ นิ่น. 28 นิ่น บัว หล่ง ม์า ทอ นิ่น เญย เซย หฑวน ต้าย เหธา นิ่น เญย อง-ถาย หฒัง เจี๊ยน ดา^วิด * เญย ฒี่ง.