ม่าย แหม่ง เญย หละเปย๊ย
เหธา ธีง-เหฑ่ง แปะ ฝีง

¹ เหว่ย น้าย อ๋อย หฒุ กวั่ง เหยียด ฒู้ง หว่าย สี่. ไม้ ตู๋ง ก๊อง-แปะ ดั๊ว เมี่ยน, ไม้ ตู๋ง โหฒว เป้ย หฒะ เฮญี้ยว ฌ้วด, ไม้ ตู๋ง เหมว่ย เจี๊ยะ, ไม้ ตู๋ง ก๊อง โตะ เมี่ยน. ² เม่ย บัว อ๋อย หฒุ ฮนั้ง โธะ โหะ ธ้วด เสย เญย กู้งว์า อ๋อย ฮบ หญอ นอ, หฒั่นๆ อ๋อย ฮบ ยู์ง ลี่ง ว่วน เญย ธีง-เหฑ่ง หญอ. เม่ย บัว ฯฒฯ ไฮ่ โฮล ต้าย ตุ๊ เหฌียว. ³ ฮนั้ง กีง-โซว ก๊อง นอ,

• ``เม่ย บัว ตุ๊ เสย ลิ์ว เหมวย
• ฯฒฯ ฮิ้ว ตุ๊ เฒี้ยว เซ หลง ไห่.'' * สีง ฑูง 34:8

⁴ อ๋อย หฒุ ต้าย นิด เจี๊ยน เฒี้ยว, ต้ง ม่าย แหม่ง เญย หละเปย๊ย. เมี่ยน เฆ่ม มป่า ทิน-ฮู่ง กิ๊น ต้าย ฝุน จ๋าย. ⁵ เม่ย บัว หย่า ฮนั้ง ม่าย แหม่ง เญย หละเปย๊ย, ต้ง ทิน-ฮู่ง หล่ง เหธย สีง ลี่ง เยียม เญย ติ่น. เม่ย บัว หย่า โหฒว ธีง-เหฑ่ง เญย ไซ เมี่ยน, ฯฒฯ เอย สีง ลี่ง เหฒี่ย ปุน ทิน-ฮู่ง. น้าย เต๋ย เหฒี่ย เญย กะน้าย ทิน-ฮู่ง เหว่ย เย^ซู กี^ตู่ อะเฮน้ย ฒิบ. ⁶ เหว่ย หฒุ กีง-โซว ก๊อง,

• ``หมั่ง ม่าะ! เยีย กิ๊น นอม จ๋าย ไห่ เญย หละเปย๊ย
• อัน วั้ว สิ^โอน ฒี่ง โหฒว เปย๊า-เก๊าะ
• เก้า หล่ง เจี๊ยน เจี๋ย เญย หละเปย๊ย.
• หาย เต้า เสียน เขา นิ่น,
• วั้ว เต้า เหยียด ลิ์ว ไม้ พยัด.'' * อิ^สะ^ยา 28:16

⁷ น้าย นอม หละเปย๊ย เหว่ย เม่ย บัว เสียน เญย เมี่ยน เซ จ๋าย ไห่. มป่า กีง-โซว ก๊อง เหว่ย ไม้ เสียน เญย เมี่ยน,

• ``ก๊ม เปย๊า หฒั่ง เฆ่ม ธ้วด วั้ว นอม หละเปย๊ย,
• ฒู้ง เป๋น อัน เปย๊า-เก๊าะ เก้า หล่ง เจี๊ยน เจี๋ย วั้ว นอม.'' * สีง ฑูง 118:22

⁸ กีง-โซว หย่า ก๊อง,

• ``น้าย นอม หละเปย๊ย เซ โหฒว เมี่ยน ดิ๊ หฒุ เญย หละเปย๊ย,
• หย่า โหฒว ต้ม หละเปย๊ย ปุน เมี่ยน ดอบ.'' * อิ^สะ^ยา 8:14-15

นิ่น บัว ดิ๊ หฒุ ดอบ เหว่ย หฒุ นิ่น บัว ไม้ เสียน ทิน-ฮู่ง เญย โต์. น้าย เซ หฒิว ทิน-ฮู่ง จา-ด่าง ตี่ง ต้าย เญย หฒะเอ๋ย.

⁹ มป่า เม่ย บัว โหฒว ทิน-ฮู่ง กิ๊น ต้าย เญย ฝีง, โหฒว ไซ เมี่ยน ฟู-สู ทิน-ฮู่ง, หย่า โหฒว ธีง-เหฑ่ง เญย ฝีง, * ธ้วด อี^ยิบ 19:5-6 ; อิ^สะ^ยา 43:20
เป๋น ทิน-ฮู่ง กั้น เญย แปะ ฝีง * หฑั่ม เล์ย-หลัด 4:20 ; 7:6 ; 14:2 ; ทิ^ตัด 2:14 เหว่ย ฒุ่น นิ่น โหฒว บัวะ ฮ่อง เญย สี่. * อิ^สะ^ยา 43:21 นิ่น เห่ว เม่ย บัว ธ้วด หฮมวัง ต้าย เปียะ นิ่น บัวะ ฮ่อง ไห่ เญย ฌัง. * อิ^สะ^ยา 9:2
¹⁰ ฒิ่น ด่าง เม่ย บัว ไม้ เฒ์ย ทิน-ฮู่ง เญย แปะ ฝีง มป่า อี้ หฒั่น เม่ย บัว โหฒว นิ่น เญย แปะ ฝีง. ฒิ่น ด่าง เม่ย บัว ไม้ ตุ๊ ทิน-ฮู่ง ค้อ-เลี่ยน มป่า อี้ หฒั่น เม่ย บัว ตุ๊ ทิน-ฮู่ง ค้อ-เลี่ยน. * โฮ^เซ^ยา 2:23

ทิน-ฮู่ง เญย โน่ว อ๋อย หฒุ ฮนั้ง หาย นอ

¹¹ ฮนั้ม เญย ก๋อ-โย์ว อ่า, เม่ย บัว เยียม น้าย ป้าม เกน โหฒว กั้น นอม เต่ย-ปูง ต้าย เญย แคะ เมี่ยน. เยีย ฯฒฯ ขวิน เม่ย บัว ไม้ ตู๋ง เซว่ย กั้น เญย เฮญี้ยว หั่น โหฒว. กั้น เญย เฮญี้ยว หั่น เญย ขูง เหธา ลี่ง ว่วน เบ๊าะ จ๋า ฮนั้ง. ¹² เม่ย บัว เยียม ไม้ เสียน เญย เมี่ยน บุด๋ง ขูง อ๋อย หฒุ โหฒว หลง เญย สี่ ฮนั้ง. ฮนั้ง หน่าย, สี ก๊อง นิ่น บัว ต้าน เม่ย บัว, ก๊อง เม่ย บัว เซ โหฒว หว่าย สี่ เญย เมี่ยน, นิ่น บัว ไฮ่ เฒียะ ตุ๊ เม่ย บัว โหฒว เญย คู้ สี่. เถา ทิน-ฮู่ง ต้าย วั้ว ฮนอย, นิ่น บัว ฯฒฯ เธง ทิน-ฮู่ง.

¹³ เหว่ย เม่ย บัว เสียน เฒี้ยว, เม่ย บัว อ๋อย หฒุ บัวะ โหฒว โฮล, กุ๊น ป้าม เมี่ยน วั้ว เต๋ย เหยียด ฒู้ง, ไม้ กุ๊น เป๋น ต้ม ฒิ่ว ฮู่ง, เหว่ย หฒุ นิ่น เญย หลี่ง เก้า โฮล เจี๋ย. ¹⁴ หย่า อ๋อย หฒุ หมวัง เจียน-โฟ้ว เญย หว่า เหว่ย หฒุ ฮู่ง เตี๋ย ออน เจียน-โฟ้ว ต้าย ตี่ง โหฒว ต่อง เญย เมี่ยน เญย ฒุ์ย หย่า เธง โหฒว หอบ เญย เมี่ยน. ¹⁵ ทิน-ฮู่ง เญย หฒะเอ๋ย เซ อ๋อย
เม่ย บัว โหฒว คู้ สี่ ตั๊ง เจี๊ยน หฮงง เญย เมี่ยน ก๊อง เญย พะลี พะหลาย หว่า. ¹⁶ เม่ย บัว โหฒว ปู๋ง ฆอย เญย เมี่ยน ฯฒฯ อ๋อย หฒุ ฮนั้ง ปู๋ง ฆอย เญย เมี่ยน เยียม นอ. มป่า ไม้ ตู๋ง หล่ง ปู๋ง ฆอย เญย เล์ย โหฒว หาย หญู่ง หว่าย สี่. อ๋อย หฒุ เฒี่ยง เจี๊ยน โหฒว ทิน-ฮู่ง เญย โน่ว. ¹⁷ อ๋อย หฒุ ท่าย เต้าๆ เมี่ยน. อ๋อย หฒุ ฮนั้ม เสียน เย^ซู เญย ก๋อ-โย์ว. อ๋อย หฒุ กั้ม เหฑีย ทิน-ฮู่ง, ท่าย ทิน-ฮู่ง, หย่า อ๋อย หฒุ ท่าย ฮู่ง เตี๋ย.

กี^ตู่ เสี่ยว โค้ว เญย หญู่ง เฒ้ย

¹⁸ เม่ย บัว โหฒว โน่ว เญย เมี่ยน อ้า! อ๋อย หฒุ บัวะ เม่ย บัว เญย เฒี้ยว หย่า ท่าย นิ่น. ไม้ เฒ์ย ขูง บัวะ เฮญี้ยว หลง, เฮญี้ยว ด๊าว วั้ว เต๋ย ฮนั้ง. เลี่ยม โตะ วั้ว เต๋ย หย่า อ๋อย หฒุ บัวะ. ¹⁹ สี ก๊อง เมี่ยน เสี่ยว ไม้ หอบ หฒุ เสี่ยว เญย โค้ว หน่าน หย่า เตี๊ย เจี๊ยน เหว่ย ฮิ้ว ตุ๊ เซ เอย ทิน-ฮู่ง เญย หฒะเอ๋ย, ทิน-ฮู่ง ฯฒฯ เธง วั้ว เต้า. ²⁰ สี ก๊อง เม่ย บัว โหฒว ต่อง สี่ ฯฒฯ หฒุ เบ๊าะ หย่า หล่ง หน่อย เตี๊ย, น้าย ม่าย หาย หญู่ง ไฮ่ เธง? มป่า เม่ย บัว เหว่ย โหฒว หอบ, หฒุ เสี่ยว โค้ว หย่า หล่ง หน่อย เตี๊ย นอ, ทิน-ฮู่ง ฯฒฯ เธง เม่ย บัว อ๊ะ. ²¹ ทิน-ฮู่ง เห่ว เม่ย บัว ฮนั้ง น้าย นอ โหฒว เหว่ย หฒุ กี^ตู่ เหว่ย เม่ย บัว เสี่ยว โค้ว โหฒว หญู่ง เฒ้ย ปุน เม่ย บัว หฒวด. เม่ย บัว ฯฒฯ อ๋อย หฒุ กัน เจี๊ยน นิ่น เญย เหฒา-เบี่ย ยั่ง.

• ²² ``กี^ตู่ ไม้ ป์าม เจี๋ย ฒุ์ย,
• หย่า ไม้ ม่าย หาย เต้า ไฮ์ นิ่น
  ก๊อง-แปะ เจี๋ย.'' * อิ^สะ^ยา 53:9

²³ นิ่น หฒุ เมี่ยน ก๊อง โตะ, หย่า ไม้ หล่ง หว่า-โตะ เตา. เมี่ยน ปุน นิ่น หฒุ โค้ว, นิ่น หย่า ไม้ ก๊อง อ๋อย จ๊าว เซี่ยว. นิ่น เฒาะ นิ่น เญย สี่ จิว ปุน ทิน-ฮู่ง, ต้ง แป้ง ฟิม เญย เซี้ยม เมี่ยน วั้ว เต้า. * อิ^สะ^ยา 53:7 ²⁴ กี^ตู่ กั้น หล่ง นิ่น เญย ซิน ดาม เจี๊ยน บัว เญย ฒุ์ย เยียม เหฒียบ หฑั่ง จ๋า, * กีก หว่า ก๊อง เดี๋ยง. ปุน บัว เปย๋า ดุ๊ด ฒุ์ย เญย ชะ หย่า เฒี่ยง เจี๊ยน เหว่ย โหฒว หอบ ฮนั้ง. เหว่ย หฒุ เย^ซู เสี่ยว มุน, เม่ย บัว ตุ๊ นิ่น หฒ่อ เม่ย บัว หลง เหฑ่ง. * อิ^สะ^ยา 53:5-6 ²⁵ ฒิ่น ด่าง เม่ย บัว เซ ฮนั้ง มี่ง ต่อง เจ๊า เญย ปะกี ยู่ง. มป่า อี้ หฒั่น เม่ย บัว หฑวน ต้าย กัน เจี๊ยน ปะกี ยู่ง เฒี้ยว, ต้ง โก๋ว เม่ย บัว เญย ลี่ง ว่วน วั้ว เต้า.