1 วั้ว หฒั่น เย^โล^โบ^อัม เญย ตอน, อา^บี^ยา ปุ๊ด แป่ง. 2 เย^โล^โบ^อัม ก๊อง บั๋ว นิ่น เญย เอ๊า, ``อ๋อย หฒุ ฒอง เม่ย กั้น เป๋น กั้น เต้า เมี่ยน, ปุน เมี่ยน เฒียะ ไม้ ตุ๊ เม่ย โหฒว เย^โล^โบ^อัม เญย เอ๊า, ฯฒฯ มี่ง ซี^โล. เยียม วั้ว ม่าย โต่ว หว่า เมี่ยน, อา^หิ^ยา. ต้ง น้าย เต้า ก๊อง เยีย อ๋อย หฒุ โหฒว น้าย เต๋ย แปะ ฝีง เญย ฮู่ง. 3 ต้อ เหฒียบ นอม ฌั้ว เหธา เต๋ย ฌั้ว-กาม เหธา แป้ง เมว์ย-ต้อง มี่ง ปุน นิ่น, นิ่น ฯฒฯ บั๋ว เม่ย น้าย เต้า ฝุเจว๊ย อ๋อย ฮนั้ง หาย นอ.'' 4 เย^โล^โบ^อัม เญย เอ๊า ฯฒฯ ฮนั้ง น้าย นอ โหฒว. นิ่น มี่ง ซี^โล ฒี่ง, เถา อา^หิ^ยา เญย เปย๊า.
อา^หิ^ยา เญย หฮญัง-เจ๊ย โก๋, มฒีง บั๊ว, หมั่ง ไม้ ปวัด. 5 เฒี้ยว จา-ด่าง บั๋ว อา^หิ^ยา, ``เย^โล^โบ^อัม เญย เอ๊า อ๋อย ต้าย หน่าย เม่ย เหว่ย หฒุ นิ่น เญย ตอน ปุ๊ด แป่ง. เม่ย อ๋อย หฒุ ฮนั้ง น้าย ก๊อง บั๋ว นิ่น.''
เย^โล^โบ^อัม เญย เอ๊า ต้าย เถา วั้ว หฒั่น, นิ่น โหฒว ฮนั้ง เป๋น กั้น เต้า มเซียะ ตอน.''
6 มป่า เถา แก้ง ด่าง วั้ว หฒั่น, อา^หิ^ยา ไฮ์ นิ่น เญย เหฒา-ธ้าย เญย เฉีย บุย ฯฒฯ ก๊อง, ``เย^โล^โบ^อัม เญย มเซียะ ตอน อ่า, กุ๊น เปียะ ต้าย ม่าะ! เม่ย เหว่ย หาย ติ่ว ฒอง เป๋น กั้น เต้า มเซียะ ตอน? เหว่ย หฒุ เยีย ม่าย เธี้ยว เญย เฝียน ก๊อง บั๋ว เม่ย. 7 เม่ย หฑวน มี่ง บั๋ว เย^โล^โบ^อัม, เฒี้ยว, อิ^สะ^ลา^เอน เมี่ยน เญย ทิน-ฮู่ง, ฮนั้ง น้าย นอ ก๊อง. `เยีย เยียม หฒวัง แปะ ฝีง บุด๋ง เหลียบ เม่ย โหฒว โฮล กุ๊น เยีย เญย เมี่ยน. 8 เยีย เป๊ด ดา^วิด เญย โต้ว ฒง กุ๊น เญย กั๊วะ ธ้วด จิว ปุน เม่ย. มป่า เม่ย ไม้ ฮนั้ง เยีย เญย โปว, ดา^วิด. นิ่น เอย เจี๊ยน เยีย เญย เล์ย-หลัด, หย่า หล่ง เหฑ่ง เฮญี้ยว กัน เยีย. นิ่น ขูง โหฒว หฒิว เยีย เญย มฒีง ปวัด หอบ เญย สี่ ฮนั้ง. 9 เม่ย โหฒว เก้า หว่าย เจี๋ย เยียม ด่าง เม่ย วั้ว เต๋ย เหยียด ฒู้ง. เม่ย เหว่ย เม่ย กั้น เหลียบ เหญี่ย เญย เฒี่ยน เญย หมิ่ว-ฝัง, หย่า โต๋ หมิ่ว-ฝัง. เม่ย ธัวะ เยีย เฉีย เจี์ย หย่า เฒาะ เยีย ฒอย กวั่ง เม่ย เญย ฆะฮ้า ฆาง.
10 ```เหว่ย น้าย เยีย อ๋อย ปุน เย^โล^โบ^อัม เญย โต้ว ฒง หฒุ เหฒะ หน่าน หย่า เฒาะ เย^โล^โบ^อัม เญย เต้าๆ มจั่ง ตอน, ไม้ กุ๊น โหฒว โน่ว ไฟ ไม้ โหฒว โน่ว เญย, เยียม อิ^สะ^ลา^เอน เมี่ยน บุด๋ง ไพ กวั่ง. เยีย อ๋อย ปุน เย^โล^โบ^อัม เญย โต้ว ฒง หฒุด เหฑ่ง, ฮนั้ง เมี่ยน เฒาะ ไฆ้ ปั๊ว ชุย เหฑ่ง นอ. * 11 เย^โล^โบ^อัม เญย เมี่ยน, ตะฟ่าน เยียม ฒี่ง ไต่ วั้ว เต๋ย, อ๋อย หฒุ จู๊ หญั่น. ไต่ วั้ว น่า เญย, อ๋อย หฒุ ด๊าม-ลู่ง เญย เหนาะ หญั่น. เยีย, เฒี้ยว, ก๊อง น้าย เต๋ย หว่า.'
12 ``เม่ย กั้น กุ๊น หฑวน อ๊ะ. เม่ย เญย เหฒา เยี้ยด ธ้าย เปียะ ฒี่ง, เม่ย เญย ตอน ฯฒฯ ไต่ อ๊ะ. 13 อิ^สะ^ลา^เอน เญย หฒวัง เมี่ยน ฯฒฯ เหว่ย นิ่น เฑ่า เญี้ยม หย่า ต้อ นิ่น มี่ง หฒัง. เย^โล^โบ^อัม เญย เหยียด ฒู้ง เมี่ยน, ขูง น้าย เต้า ตอน กั้น ฮนั้ง ตุ๊ หฒัง เจี๊ยน, เหว่ย หฒุ เฒี้ยว, อิ^สะ^ลา^เอน เมี่ยน เญย ทิน-ฮู่ง, ปวัด เยียม เย^โล^โบ^อัม เญย โต้ว ฒง ขูง น้าย เต้า ฮนั้ง ม่าย เต๋ย หลง เญย ต๋อง.
14 ``ไม้ ตาน บัวะ น้าย. เฒี้ยว อ๋อย เหว่ย นิ่น กั้น เหลียบ เต้า ฮู่ง กุ๊น อิ^สะ^ลา^เอน. อี้ ฮนอย น้าย เต้า ฮู่ง ฯฒฯ ไพ กวั่ง เย^โล^โบ^อัม เญย โต้ว ฒง. วั้ว ฮนอย หฒะเก้ง เถา อ๊ะ. 15 เฒี้ยว อ๋อย เบ๊าะ อิ^สะ^ลา^เอน เมี่ยน, ปุน นิ่น บัว ฮนั้ง หลัวะ ติ หฒุ ววม ถอง โฮยว มี่ง โฮยว ต้าย. นิ่น แอ๋ง อ๋อย เฒาะ อิ^สะ^ลา^เอน เมี่ยน ธ้วด นิ่น เหธย ปุน นิ่น บัว เญย อง-ถาย น้าย นอม หลง ไห่ เญย เต่ย-ปูง, ฮนั้ง แปง ฑู่ง ธ้วด นอ. นิ่น หย่า อ๋อย เฒาะ นิ่น บัว ปุน หฑาน เยียม ยู^เฟ^ติด ด้าย ตง ปูง แหมง, เหว่ย หฒุ นิ่น บัว โหฒว อา^เซ^ลา เฒี่ยน เญ์ย เญย เดี๋ยง-ฝัง ฯฒฯ ธัวะ เฒี้ยว เฉีย เจี์ย. 16 หลาย เย^โล^โบ^อัม ป์าม ฒุ์ย หย่า ต้อ อิ^สะ^ลา^เอน เมี่ยน เหธา เจี๊ยน ป์าม ฒุ์ย, เฒี้ยว เฒาะ อิ^สะ^ลา^เอน เมี่ยน จิว ปุน วิน-วั้ง.'' *
17 เย^โล^โบ^อัม เญย เอ๊า ฯฒฯ เจี์ย ซิน หฑวน เถา ที^ละ^ซา ฒี่ง. เยี้ยด หลาม เปียะ แก้ง, นิ่น เญย ตอน ฯฒฯ ไต่ หมี่ อ๊ะ. 18 นิ่น บัว หย่า ต้อ มี่ง หฒัง. อิ^สะ^ลา^เอน เญย หฒวัง เมี่ยน เหว่ย นิ่น เฑ่า เญี้ยม ฮนั้ง เฒี้ยว หล่ง นิ่น เญย โปว วั้ว เต้า โต่ว หว่า เมี่ยน ก๊อง นอ.
19 เย^โล^โบ^อัม ฮู่ง โหฒว ลิ์ว เหฒ่ง เหฌี่ย เญย สี่, นิ่น ฮนั้ง หาย นอ เบ๊าะ จ๋า, ฮนั้ง หาย นอ กุ๊น แปะ ฝีง, เฟี้ย เจี๊ยน เยียม อิ^สะ^ลา^เอน ฮู่ง เญย ฮู่ง โต้ว ตาน. 20 เย^โล^โบ^อัม โหฒว ฮู่ง หญี่ เหฒียบ เหญ่ย หฮญัง, ฯฒฯ เกวย เสย หมี่ อ๊ะ, * นิ่น เญย ตอน, นา^ดับ, หฑิบ เจี๊ยน นิ่น โหฒว ฮู่ง.
21 ซา^โล^มอน เญย ตอน, เล^โห^โบ^อัม, เยียม ยู^ดา โหฒว ฮู่ง. นิ่น ฝาว เหว่ย โหฒว ฮู่ง วั้ว หฒั่น นิ่น ตุ๊ เฝย เหฒียบ เยี้ยด หฮญัง, หย่า เยียม เย^ลู^ซา^เลม กุ๊น เหฒียบ เธี้ยด หฮญัง. เย^ลู^ซา^เลม ฒี่ง เซ เฒี้ยว เยียม อิ^สะ^ลา^เอน เญย หฒวัง ฝีง บุด๋ง กิ๊น ต้าย เหว่ย เหลียบ นิ่น กั้น เญย เม่ง. เล^โห^โบ^อัม เญย มา เซ อัม^โมน เมี่ยน, บั๋ว เห่ว นา^อา^มา.
22 เอย เฒี้ยว หมั่ง, ยู^ดา โหฒว หว่าย สี่. นิ่น บัว ป์าม เญย ฒุ์ย ธัวะ นิ่น เฉีย เจี์ย, หั่น นิ่น บัว, เก้า ธั้ม นิ่น บัว เญย อง-ถาย บัว โหฒว เญย สี่. 23 นิ่น บัว เยียม นอมๆ บง กู้ หงว่าย เหธา ติ้วๆ ต้ม เดี๋ยง กะเดี๊ย, เหลียบ หฒั่ง เฒี่ยน เญย ต๋อง เหธา หละเปย๊ย-ต่ง เหธา หฒั่ง อา^เซ^ลา เฒี่ยน เญ์ย เญย เดี๋ยง-ฝัง. * 24 เต่ย-ปูง กะญั์ว หย่า ม่าย มจั่ง ตอน * เยียม หฒั่ง เฒี่ยน เญย ต๋อง โหฒว หม่าย ป๊วน-ซิน เญย เมี่ยน. * แปะ ฝีง โหฒว ฒิ่น ด่าง เฒี้ยว หฒุ่น ธ้วด อิ^สะ^ลา^เอน เมี่ยน เญย วั้ว ด่าง แหมง วั้ว เต๋ย ฝีงๆ เมี่ยน โหฒว เหยียด ฒู้ง กั้ม เฑี้ย เญย สี่.
25 เย^โล^โบ^อัม โหฒว ฮู่ง ตะฮม์ หฮญัง วั้ว หฮญัง, อี^ยิบ เญย ฮู่ง, ซิ^ซัก, ต้าย เบ๊าะ เย^ลู^ซา^เลม. * 26 นิ่น เฒาะ เยียม หฒั่ง เฒี้ยว เญย เปย๊า กะญั์ว เหธา ฮู่ง ติ่น กะญั์ว เหยียด ฒู้ง จ๋าย เญย กะน้าย. นิ่น เฒาะ หญู่งๆ, เลี่ยม ซา^โล^มอน โหฒว ต้าย เญย เจียม-ท้อง-ป้าย. * 27 เล^โห^โบ^อัม ฮู่ง ฯฒฯ หล่ง ต้ง ซิ โหฒว ท้อง-ป้าย ตี๊ หย่า จิว ปุน โก๋ว ฮู่ง ติ่น ฒั้ว แก้ง เญย แปง-เปย๊ย. 28 ฮู่ง เตี๋ย หาย หฒั่น เปียะ หฒั่ง เฒี้ยว เญย เปย๊า, โก๋ว ฮู่ง ติ่น เญย แปง ต้อ น้าย เต๋ย ท้อง-ป้าย มี่ง. ฆะฮ้า นิ่น บัว แอ๋ง ต้อ หฑวน อัน เจี๊ยน แปง ฒั้ว ฮู่ง ติ่น เญย ต๋อง.
29 เล^โห^โบ^อัม กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่, นิ่น โหฒว ธ้วด เญย เหยียด ฒู้ง, เฟี้ย เจี๊ยน ยู^ดา ฮู่ง เญย ฮู่ง โต้ว ตาน. 30 เล^โห^โบ^อัม เหธา เย^โล^โบ^อัม หฒั่นๆ เบ๊าะ จ๋า. 31 เล^โห^โบ^อัม เกวย เสย หมี่ อ๊ะ, * หย่า เหธา นิ่น เญย อง-ถาย บัว หฒัง เจี๊ยน เยียม ดา^วิด เญย ฒี่ง. นิ่น เญย มา โหฒว อัม^โมน เมี่ยน, บั๋ว เห่ว นา^อา^มา. เล^โห^โบ^อัม เญย ตอน, อา^บี^ยัม, * หย่า หฑิบ เจี๊ยน นิ่น โหฒว ฮู่ง.