1 อี้ หฒั่น ก๊อง เถา เหฒี่ย ปุน หมิ่ว-ฝัง เญย หญั่น ฮบ. บัว เหยียด ฒู้ง ฮิ้ว ตุ๊, ``บัว เต้าๆ ม่าย ว่วน ฒาง.'' มป่า ม่าย ว่วน ฒาง เซ ปุน เมี่ยน โหฒว เหมา, เธง-โฮล. ล่าน ฮนั้ม ล่าน เซ เหธย เมี่ยน เจี์ย ต้าย. 2 สี ก๊อง ม่าย หาย เต้า ฮนั้ม ต้าย นิ่น ฮิ้ว ตุ๊ เหยียด หญู่ง, หฒิว นิ่น หอบ หฒุ ฮิ้ว เญย นิ่น หธ่อ ไม้ แก้ง ฮิ้ว. 3 มป่า หาย เต้า ฮนั้ม ทิน-ฮู่ง, ทิน-ฮู่ง ฯฒฯ ฮิ้ว ตุ๊ วั้ว เต้า อ๊ะ.
4 วั้ว หญู่ง, ก๊อง หญั่น เหฒี่ย ปุน หมิ่ว-ฝัง เญย หญั่น ฮบ, บัว ฮิ้ว ตุ๊ หมิ่ว-ฝัง ไม้ ปิ๋ว เม่ง หาย หญู่ง เฒียน เญย กะน้าย. บัว หย่า ฮิ้ว ตุ๊ ขูง ม่าย ดุ เต้า ทิน-ฮู่ง ฮนั้ง.
5 ไม้ กุ๊น เยียม ลู่ง เยียม เดา, ม่าย ต้ง เมี่ยน เห่ว ``เฒี่ยน''
(หย่า หฒะเก้ง ม่าย ``เฒี่ยน'' ธั้ม, ม่าย ``เฒี้ยว'' ธั้ม),
6 มป่า เหว่ย บัว นอ, ขูง ม่าย ดุ เต้า ทิน-ฮู่ง ฮนั้ง, เซ หฒั่ง เตี๋ย, ต้ง เหฒย หม่าน หมวด วั้ว เต้า. บัว หย่า เหว่ย นิ่น เยียม. หย่า ขูง ม่าย ดุ เต้า เฒี้ยว ฮนั้ง, เซ เย^ซู กี^ตู่. ทิน-ฮู่ง หล่ง เย^ซู เหฒย หม่าน หมวด. บัว หย่า ปั่ง นิ่น เยียม.
7 มป่า ไม้ เฒ์ย เต้าๆ เมี่ยน เปียะ เฮญี้ยว. ม่าย เต๋ย เมี่ยน ฒิ่น ด่าง ป๋าย เกว๋น หมิ่ว-ฝัง. เถา อี้ หฒั่น นิ่น บัว หญั่น เหฒี่ย ปุน หมิ่ว-ฝัง เญย กะน้าย, นิ่น บัว เฮญี้ยว ไฝ. ขูง จั๋ง หฒุ นิ่น บัว หญั่น หมิ่ว-ฝัง เญย กะน้าย, ฯฒฯ ไฮ์ ม่าย หวุย อ๊ะ. 8 หญั่น ฮบ เญย กะน้าย ไม้ ไฮ่ ปุน ทิน-ฮู่ง เก้า อะเฮน้ย บัว. ไม้ หญั่น, บัว ไม้ เฒ์ย เก้า หว่าย. หญั่น ลิ์ว, บัว หย่า ไม้ เฒ์ย เก้า หลง.
9 มป่า, อ๋อย หฒุ ไฝ ฟิม โอ่. เม่ย บัว ฮิ้ว ตุ๊ เซว่ย ปิ่น หญั่น หาย หญู่ง หย่า ตุ๊, มป่า ไม้ ตู๋ง หลาย น้าย ติ่ว เจ๊า ปุน เสียน ไม้ เฮ้น เญย เมี่ยน ป์าม ฒุ์ย. * 10 สี ก๊อง ม่าย เต้า เฮญี้ยว ไฝ เญย เมี่ยน ปวัด เม่ย, ต้ง ม่าย ว่วน ฒาง เญย เมี่ยน, เยียม หมิ่ว-เปย๊า หญั่น นอ, น้าย ไม้ เฒ์ย ดั๊ว นิ่น อ๋อย เหธา เจี๊ยน หญั่น เหฒี่ย ปุน หมิ่ว-ฝัง เญย หญั่น ฮบ ไฟ? 11 กี^ตู่ เหว่ย น้าย เต้า เสียน ไม้ เฮ้น เญย ก๋อ-โย์ว ไต่, มป่า วั้ว เต้า ก๋อ-โย์ว หลาย เม่ย ``ม่าย ว่วน ฒาง'' หฒุ เหมียด. 12 เม่ย ฮนั้ง หน่าย โหฒว, เม่ย โหฒว ต่อง เม่ย เญย ก๋อ-โย์ว, เหว่ย หฒุ นิ่น เฮญี้ยว ไฝ, เม่ย หย่า ห่อย นิ่น โหฒว ต่อง. น้าย หย่า โหฒว ต่อง กี^ตู่. 13 วั้ว หญู่ง, สี ก๊อง หญั่น ฮบ ไฮ่ ดั๊ว เยีย เญย ก๋อ-โย์ว ป์าม ฒุ์ย, * เยีย ฯฒฯ เหยียด ลิ์ว ไม้ หญั่น อ๊อ อ๊ะ. เฑ่า เหย ดั๊ว เยีย เญย ก๋อ-โย์ว ป์าม ฒุ์ย.