¹ Wuov nyungc, Yiutai Mienh maaih haaix nyungc gauh longx? Jiex gaatv nyei leiz maaih haaix nyungc maaih lamh longc nyei fai? ² Maaih nyei lorqc. Weic nyungc-nyungc maaih lamh longc nyei. Da'yietv, Tin-Hungh zorqv ninh ganh nyei waac jiu bun Yiutai Mienh goux. ³ Se gorngv maaih deix maiv ziepc zuoqv hnangv haaix nor? Wuov nyungc ninh mbuo zoux bun Tin-Hungh ziepc zuoqv nyei jauv maiv lamh longc fai? ⁴ Maiv zeiz! Maiv gunv lungh ndiev mienh dauh dauh gorngv-baeqc, Tin-Hungh kungx haih gorngv zien hnangv. Hnangv Ging-Sou fiev jienv gorngv,

• “Meih gorngv nyei waac bun cing meih horpc.
• Meih zuqc siemv nyei ziangh hoc meih yaac duqv hingh.” * Singx Nzung 51:4

⁵ Ih zanc yie oix gorngv naaiv deix waac se hnangv baamh mienh hnamv cuotv daaih gorngv nor. Nziex maaih mienh gorngv, “Se gorngv mbuo zoux nyei waaic sic bun cing Tin-Hungh zoux duqv horpc, wuov nyungc mbuo oix zuqc hnangv haaix nor gorngv? Tin-Hungh nouz mbuo se ninh maiv baengh fim fai?” ⁶ Zungv maiv zeiz! Se gorngv Tin-Hungh maiv baengh fim, ninh hnangv haaix nor haih siemv lungh ndiev mienh? ⁷ Nziex maaih mienh haih gorngv, “Se gorngv yie zoux maiv zingx gauh haih bun cing Tin-Hungh zoux duqv zingx, ziouc bun mienh gauh duqv buatc Tin-Hungh nyei njang-laangc. Hnangv naaic, Tin-Hungh weic haaix diuc corc dingc yie zoux zuiz-mienh?” ⁸ Weic haaix diuc maiv gorngv, “Oix zuqc zoux waaic sic cingx daaih haih cuotv kuv sic?” Maaih deix gorngv waac-huv mbuox mienh yie mbuo hnangv naaiv nor gorngv. Ninh mbuo zuqc dingc zuiz se horpc haic aqv.

Maiv Maaih Haaix Dauh
Zoux Duqv Horpc Nzengc

⁹ Wuov nyungc, mbuo Yiutai Mienh gauh longx Janx fai? Maiv zeiz. Zungv gorngv jiex nyei, Yiutai Mienh caux Janx, yietc zungv zuqc zuiz nyei qaqv gunv jienv. ¹⁰ Hnangv Ging-Sou fiev jienv gorngv,

• “Maiv maaih haaix dauh caux Tin-Hungh horpc hnyouv,
• yietc dauh yaac maiv maaih. * Singx Nzung 14:1-3 ; 53:1-3
• ¹¹ Maiv maaih haaix dauh mengh baeqc,
• yaac maiv maaih haaix dauh oix lorz Tin-Hungh.
• ¹² Dauh dauh huin nqaang leih Tin-Hungh.
• Yietc zungv ziouc waaic nzengc mi'aqv.
• Maiv maaih haaix dauh zoux longx,
• yietc dauh yaac maiv maaih.” * Gorngv Seix Zaangc 7:20
• ¹³ “Ninh mbuo nyei jaang-hoh hnangv wetv tong nyei janx-daic zouv nor.
• Ninh mbuo longc mbietc gorngv waac nduov mienh.” * Singx Nzung 5:9
• “Nzuih meix yaac gorngv waac-doqc hnangv naang-doqc nyei ndie nor.” * Singx Nzung 140:3
• ¹⁴ “Maaih im haic, zioux mienh nyei waac buangv nzengc nzuih.” * Singx Nzung 10:7
• ¹⁵ “Ninh mbuo hungh hec zoux doqc daix mienh siepv,
• ¹⁶ mingh taux haaix yaac kungx zoux waaic bun mienh kouv hnangv.
• ¹⁷ Baengh orn nyei jauv ninh mbuo maiv hiuv.” * I^saa^yaa 59:7-8
• ¹⁸ “Ninh mbuo yaac maiv hiuv duqv gamh nziex Tin-Hungh.” * Singx Nzung 36:1

¹⁹ Mbuo hiuv duqv leiz-latc fiev daaih gorngv nyei yietc zungv se gorngv bun yiem leiz-latc ga'ndiev nyei mienh. Hnangv naaiv bun mouz laanh mienh maiv maaih waac gorngv, yaac bun lungh ndiev mienh zuqc Tin-Hungh siemv zuiz. ²⁰ Weic zuqc ei Tin-Hungh mangc, maiv maaih yietc dauh mienh weic ei jienv leiz-latc zoux haih duqv caux Tin-Hungh horpc hnyouv. Leiz-latc kungx bun mienh hiuv duqv ganh maaih zuiz hnangv. * Singx Nzung 143:2 ; Gaa^laa^tie 2:16

Tin-Hungh Hnangv Haaix Nor Bun Mienh Caux Ninh Horpc Hnyouv

²¹ Ih zanc Tin-Hungh bun mienh hiuv duqv hnangv haaix nor haih duqv caux ninh horpc hnyouv daaih. Se maiv zeiz kaux leiz-latc. Mv baac Leiz-Latc caux Douc Waac Mienh nyei Sou zoux zorng-zengx gorngv naaiv maiv kaux leiz-latc nyei za'eix. ²² Weic zuqc mienh sienx kaux Yesu Giduc, Tin-Hungh cingx bun dauh dauh sienx ninh wuov deix duqv caux ninh horpc hnyouv. Yaac maiv maaih haaix dauh ganh nyungc, * Gaa^laa^tie 2:16 ²³ weic zuqc mouz laanh mienh zungv baamz zuiz, leih duqv Tin-Hungh nyei njang-laangc go. ²⁴ Mv baac Tin-Hungh baeqc baeqc ceix en, longc Giduc Yesu zuoqc mienh nzuonx ziouc bun mienh caux ninh horpc hnyouv daaih. ²⁵ Tin-Hungh jiu Yesu zoux ziec nyei ga'naaiv weic bun mienh sienx kaux Yesu nyei nziaamv ziouc duqv Tin-Hungh guangc zuiz. Tin-Hungh hnangv naaiv nor zoux, biux mengh ninh se baengh fim nyei. Zinh ndaangc Tin-Hungh zoux hnyouv ndaauv, maiv gaengh zorqv mienh nyei zuiz. ²⁶ Mv baac ih zanc Tin-Hungh bun cing ninh baengh fim nyei, weic zuqc mienh baamz zuiz mv baac haaix dauh sienx kaux Yesu Giduc, Tin-Hungh bun wuov dauh caux ninh horpc hnyouv.

²⁷ Hnangv naaic, mbuo dorh haaix nyungc daaih bungx waac-maux? Maiv maaih haaix nyungc. Weic haaix diuc maiv maaih? Weic zuqc mbuo ei jienv leiz-latc zoux fai? Maiv zeiz. Se weic zuqc mbuo sienx hnangv. ²⁸ Mbuo hiuv duqv Tin-Hungh bun mienh caux ninh horpc hnyouv se weic mbuo sienx kaux Yesu, maiv zeiz weic ei leiz-latc zoux.

²⁹ Tin-Hungh kungx zoux Yiutai Mienh nyei Tin-Hungh hnangv fai? Ninh maiv zoux Janx nyei Tin-Hungh? Zoux nyei lorqc. Ninh yaac zoux Janx nyei Tin-Hungh. ³⁰ Kungx maaih nduqc dauh Tin-Hungh hnangv. Ninh oix bun liemh Yiutai Mienh, * Faan zaqc gorngv “jiex gaatv nyei leiz nyei mienh”. liemh Janx * Faan zaqc gorngv “maiv jiex gaatv nyei leiz nyei mienh”. caux ninh horpc hnyouv. Yietc zungv duqv caux ninh horpc se weic ninh mbuo sienx kaux Yesu. * Nzamc Leiz-Latc 6:4 ; Gaa^laa^tie 3:20 ³¹ Wuov nyungc, mbuo sienx Yesu ziouc bun leiz-latc ndortv fai? Maiv zeiz. Daaux nzuonx mbuo zoux bun leiz-latc gauh wuonv.