¹ Gorx-youz aac, yie za'gengh! oix Tin-Hungh njoux caux yie juangc fingx nyei mienh haic aqv, ziouc njiec qaqv tengx ninh mbuo tov Tin-Hungh. ² Yie tengx ninh mbuo zoux zorng-zengx gorngv ninh mbuo weic Tin-Hungh jorm hnyouv haic, mv baac ninh mbuo maiv mengh baeqc Tin-Hungh nyei jauv. ³ Ninh mbuo maiv hiuv duqv Tin-Hungh hnangv haaix nor bun mienh caux ninh horpc hnyouv ziouc daav ganh nyei za'eix oix caux Tin-Hungh horpc. Ninh mbuo maiv longc Tin-Hungh nyei za'eix. ⁴ Giduc zoux bun leiz-latc nzengc mi'aqv. Hnangv naaic, haaix dauh sienx kaux Giduc ziouc duqv caux Tin-Hungh horpc hnyouv.

Tin-Hungh Oix Njoux
Dauh Dauh Mienh

⁵ Mose fiev jienv gorngv mienh gan leiz-latc duqv caux Tin-Hungh horpc hnyouv nyei za'eix. Ninh gorngv,

• “Haaix dauh ei jienv leiz-latc zoux,
• wuov dauh ziouc duqv ei leiz-latc ziangh jienv.” * Lewi 18:5

⁶ Mv baac Ging-Sou yaac gorngv weic sienx Giduc ziouc duqv caux Tin-Hungh horpc hnyouv nyei za'eix. Ging-Sou gorngv,

• “Maiv dungx yiem hnyouv hnamv,
• ‘Haaix dauh oix faaux tin-dorngh?’”(Naaiv se weic dorh Giduc njiec.) * Nzamc Leiz-Latc 30:12-14
• ⁷ “Yaac maiv dungx hnamv,
• ‘Haaix dauh oix mingh yiemh gen?’” * Nzamc Leiz-Latc 30:13
  (Naaiv se weic bun Giduc yiem daic mingh nyei mienh nyei dorngx cuotv daaih.)

⁸ Ging-Sou hnangv naaiv nor gorngv,

• “Tin-Hungh nyei waac yiem nitv meih fatv nyei,
• zungv yiem jienv meih nyei nzuih yaac yiem jienv meih nyei hnyouv.” * Nzamc Leiz-Latc 30:14

Naaiv se yie mbuo zunh mbuox mienh oix zuqc sienx Ziouv wuov deix waac. ⁹ Se gorngv meih nyei nzuih nyiemc, “Yesu zoux Ziouv,” meih yaac longc hnyouv sienx Yesu daic mingh, Tin-Hungh aengx bun ninh nangh daaih, meih ziouc duqv njoux aqv. ¹⁰ Weic zuqc mbuo longc hnyouv sienx ziouc duqv caux Tin-Hungh horpc. Mbuo longc nzuih nyiemc Yesu zoux Ziouv, mbuo ziouc duqv njoux aqv. ¹¹ Ging-Sou maaih joux waac gorngv,

• “Haaix dauh sienx kaux ninh,
• wuov dauh zungv maiv nyaiv.” * I^saa^yaa 28:16

¹² Weic zuqc Yiutai Mienh caux Janx fih hnangv nyei, maiv ganh nyungc. Yietc zungv juangc dauh Ziouv hnangv, dongh zoux maanc mienh nyei Ziouv wuov dauh. Haaix dauh tov Ziouv, Ziouv ziouc camv-camv nyei ceix fuqv bun wuov dauh. ¹³ Hnangv Ging-Sou gorngv nor,

• “Haaix dauh heuc Ziouv nyei mbuox,
• wuov dauh duqv njoux aqv.” * Yo^en 2:32
  

¹⁴ Se gorngv mienh maiv gaengh sienx Yesu Giduc, ninh mbuo hnangv haaix nor haih heuc ninh? Se gorngv maiv gaengh haiz haaix dauh gorngv jiex Yesu nyei jauv-louc, ninh mbuo hnangv haaix nor haih sienx? Se gorngv maiv maaih haaix dauh zunh kuv fienx bun ninh mbuo muangx, ninh mbuo hnangv haaix nor haih duqv haiz kuv fienx? ¹⁵ Se gorngv maiv maaih haaix dauh paaiv mienh mingh zunh kuv fienx, mienh hnangv haaix nor haih mingh zunh? Hnangv Ging-Sou gorngv nor,

• “Buatc mienh daaih zunh kuv fienx gengh a'hneiv haic aqv.” * Faan zaqc Gikc waac nor, oix zuqc gorngv “dorh kuv fienx daaih zunh wuov deix mienh nyei zaux za'gengh! nzueic haic”. * I^saa^yaa 52:7

¹⁶ Mv baac maiv zeiz I^saa^laa^en Mienh dauh dauh zipv kuv fienx weic zuqc I^saa^yaa gorngv,

• “Ziouv aac, haaix dauh sienx yie mbuo zunh nyei waac?” * I^saa^yaa 53:1

¹⁷ Hnangv naaic, mienh sienx weic zuqc ninh mbuo haiz Giduc nyei doz. Ninh mbuo duqv haiz weic zuqc maaih mienh mingh zunh bun ninh mbuo muangx.

¹⁸ Mv baac yie oix naaic gaax, ninh mbuo za'gengh maiv haiz jiex Giduc nyei doz fai? Haiz jiex nyei lorqc. Hnangv Ging-Sou gorngv nor,

• “Zunh doz mienh nyei qiex sing gormx baamh gen.
• Ninh mbuo nyei waac zunh jomc lungh ndiev.” * Singx Nzung 19:4

¹⁹ Yie oix aengx naaic gaax, I^saa^laa^en Mienh maiv mengh baeqc fai? Mose ganh longc Tin-Hungh nyei waac dau ndaangc. Ninh gorngv,

• “Yie oix bun meih mbuo mueic jieqv yietc fingx Janx.
• Yie oix longc yietc fingx hngongx nyei mienh cuoqv meih mbuo qiex jiez.” * Nzamc Leiz-Latc 32:21

²⁰ I^saa^yaa yaac longc Tin-Hungh nyei waac gauh bungx laangc nyei gorngv. Ninh gorngv,

• “Maiv lorz yie wuov deix duqv buatc yie.
• Maiv naaic taux yie wuov deix, yie bun ninh mbuo hiuv duqv yie.” * I^saa^yaa 65:1

²¹ I^saa^yaa yaac fiev jienv Tin-Hungh nyei waac gorngv taux I^saa^laa^en Mienh. Ninh gorngv,

• “Yie ziangh hnoi sung jienv buoz oix zipv
• maiv muangx waac, hnyouv ngaengc nyei mienh.” * I^saa^yaa 65:2