Singx Nzung 31

Daux Gaux Bun Cing Kaux Ziouv

Jiu bun dorh nzung nyei mienh.
Ndaawitv zoc nyei singx nzung.

• ¹ Ziouv aac, yie ndaauh kaux meih.
• Tov bun yie yietc liuz maiv zuqc nyaiv.
• Meih se baengh fim nyei Tin-Hungh, tov meih njoux yie.
• ² Tov baeng m'normh muangx yie,
• siepv-siepv nyei njoux yie.
• Tov zoux yie ndaauh kaux nyei la'bieiv,
• zoux weih jienv wuonv nyei dorngx njoux yie.
• ³ Meih zoux yie nyei la'bieiv caux yie wuonv nyei dorngx.
• Weic meih ganh nyei mengh tov dorh yie, yienz yie nyei jauv.
• ⁴ Tov bun yie biaux ndutv mienh weic yie zaeng nyei mungz,
• weic zuqc meih zoux yie ndaauh kaux nyei dorngx.
• ⁵ Yie zorqv yie nyei lingh wuonh
• jiu bun yiem meih nyei buoz gu'nyuoz. * Lugaa 23:46
• O Ziouv, ziepc zuoqv nyei Tin-Hungh aah!
• Meih zungv zuoqc yie daaih aqv.
• ⁶ Meih * Maaih deix loz-hnoi sou gorngv yie. nzorng haic baaix maiv lamh longc nyei miuc-fangx wuov deix,
• mv baac yie kaux Ziouv.
• ⁷ Meih ziepc zuoqv nyei hnamv yie, yie ziouc njien-youh a'hneiv,
• weic zuqc meih buatc yie nyei kouv naanc,
• yaac hiuv duqv yie nyei hnyouv nzauh nyei jauv.
• ⁸ Meih yaac maiv zorqv yie jiu bun yiem win-wangv nyei buoz-ndiev.
• Meih bun yie nyei zaux caaiv jienv jangv nyei dorngx.
• ⁹ O Ziouv aac, tov meih korv-lienh yie, weic zuqc yie kouv haic.
• Yie nzauh nyiemv, m'zing zungv maiv njang aqv.
• Yie nyei sin caux hnyouv kouv nzengc.
• ¹⁰ Yie nyei maengc zuqc nzauh kouv hnangv,
• hnyangx jiex hnyangx kungx njunh jienv yiem.
• Laaix yie zuqc nyei kouv naanc * Hipv^lu waac gorngv zuiz. yie nyei qaqv mau jienv njiec,
• zungv kouv taux mbungv nqaai.
• ¹¹ Yie nyei yietc zungv win-wangv huotv yie,
• yie nyei juangc laangz mienh mangc piex yie.
• Hiuv duqv yie wuov deix gengh! gamh nziex yie.
• Liemh yiem jauv zaangc buangh yie wuov deix yaac biaux yie.
• ¹² Ninh mbuo la'kuqv yie,
  maiv jangx yie hnangv yie daic mi'aqv nor.
• Yie hnangv mborqv huv nyei nie-mor.
• ¹³ Yie haiz mienh camv nyei gorngv waac-sapv,
• maaih gamh nziex haic nyei sic weih gormx yie.
• Ninh mbuo caangh laangh hoic yie,
• daav za'eix zorqv yie nyei maengc.
• ¹⁴ Mv baac Ziouv aac, yie kaux meih.
• Yie gorngv, “Meih zoux yie nyei Tin-Hungh.”
• ¹⁵ Yie ziangh nyei hnoi-nyieqc yiem meih nyei buoz,
• tov njoux yie biaux ndutv yie nyei win-wangv
• caux zeix yie wuov deix mienh nyei buoz-ndiev.
• ¹⁶ Tov bun meih nyei hmien nyei njang ziux yie, meih nyei bou,
• weic zuqc meih ziepc zuoqv nyei hnamv yie, tov njoux yie.
• ¹⁷ O Ziouv aac, tov bun yie maiv zuqc nyaiv,
• weic zuqc yie heuc meih.
• Tov bun orqv mienh zuqc nyaiv,
• sekv nzieqc nyei mingh yiem yiemh gen.
• ¹⁸ Tov bun gorngv-baeqc mienh nyei nzuih,
• dongh ninh mbuo ceng-hlo, bungx waac-maux,
• gorngv doqc kuv mienh wuov deix nyei nzuih hngongx mingh, maiv haih gorngv waac.
• ¹⁹ Meih za'gengh longx haic.
• Meih siou longx nyei ga'naaiv yaac bungx-zuoqc,
• aengx yiem baamh mienh nyei nza'hmien
• bun taaih meih, ndaauh kaux meih nyei mienh.
• ²⁰ Meih dorh ninh mbuo bingx jienv meih nyei nza'hmien mbueiz nyei dorngx,
• biaux ndutv mienh daav waaic nyei za'eix.
• Meih bun ninh mbuo yiem norm dorngx beu jienv ninh mbuo,
• biaux ndutv gorngv doqc nzaeng jaax nyei waac.
• ²¹ Oix zuqc ceng Ziouv,
• weic zuqc yie yiem zuqc weih jienv nyei zingh nyei ziangh hoc,
• meih bun cing meih za'gengh! ziepc zuoqv nyei hnamv yie.
• ²² Yie zuqc haeqv gamh nziex nyei ziangh hoc yie gorngv,
• “Yie yiem meih nyei nza'hmien zuqc zunc leih go.”
• Mv baac yie heuc jienv tov meih tengx,
• meih yaac haiz yie tov nyei waac.
• ²³ Ziouv nyei zuangx cing-nzengc baeqc fingx aah!
• Oix zuqc hnamv Ziouv.
• Ninh beu jienv ziepc zuoqv nyei mienh,
• mv baac hniev-hniev nyei winh bun zoux maux nyei mienh.
• ²⁴ Da'faanh zuov jienv Ziouv nyei mienh
• oix zuqc henv, zungx jienv daamv.