Singx Nzung 141

Daux Gaux Tov Ziouv
Dangv Jienv Orqv Nyei Jauv

Ndaawitv zoc nyei singx nzung.

• ¹ O Ziouv aac, yie heuc jienv meih. Tov siepv-siepv nyei daaih tengx yie.
• Yie heuc meih nyei ziangh hoc, tov baeng m'normh muangx yie nyei sing-qiex.
• ² Tov bun yie daux gaux nyei waac hnangv hung yiem meih nyei nza'hmien. * Laauc Yaangh 5:8
• Yie sung jienv nyei buoz hnangv lungh maanz-hmuangx ziec nyei ga'naaiv.
• ³ O Ziouv aac, tov gunv yie nyei nzuih hnangv zuov gaengh mienh zuov gaengh nor.
• Tov goux jienv yie nyei nzuih meix nyei gaengh.
• ⁴ Tov bun yie maiv maaih hnyouv zoux orqv sic,
• bun yie maiv dungx caux zoux orqv nyei mienh juangc jienv zoux waaic sic,
• yaac maiv dungx bun yie nyanc ninh mbuo kuv haic nyei lai-hnaangx.
• ⁵ Tov bun kuv mienh mborqv yie. Naaiv se weih zoux longx.
• Tov bun ninh gorngv-hemx yie, se hnangv zorqv youh dox yie nyei m'nqorngv.
• Tov bun yie nyei m'nqorngv maiv nqemh.
• Weic zuqc yie daux gaux nyei waac zanc-zanc ngaengc jienv orqv mienh nyei orqv sic. * Naaiv deix buo yiemc ziux Hipv^lu waac se aqc duqv bieqc hnyouv nyei. Ih jaax mienh aqc duqv zorqv eix leiz.
• ⁶ Ninh mbuo nyei siemv zuiz jien zuqc zoi njiec la'bieiv-mbaengx wuov zanc,
• mienh ziouc hoqc hiuv Ziouv nyei waac se zien nyei.
• ⁷ Hnangv mienh laih ndau cenv muonc nzengc,
• ninh mbuo nyei mbungv oix zuqc nzaanx mingh taux yiemh gen nyei kuotv-ndaangc.
• ⁸ O Ziouv Tin-Hungh aac, yie nyei m'zing mangc jienv meih.
• Yie ndaauh kaux meih.
• Maiv dungx guangc yie, bun yie maiv lamh kaux dorngx.
• ⁹ Tov beu jienv yie biaux ndutv ninh mbuo zaeng weic hlopv yie nyei koux,
• caux orqv mienh zaeng nyei hlaang.
• ¹⁰ Tov bun orqv mienh ndortv njiec ninh mbuo ganh zaeng nyei mungz,
• mv baac tov bun yie duqv biaux ndutv mingh.