Singx Nzung 110

Ziouv Jiu Hatc Maaz Hungh Diex

Ndaawitv zoc nyei singx nzung

• ¹ Ziouv gorngv mbuox yie nyei Ziouv,
• “Zueiz jienv yie nyei mbiaauc maengx bung,
• zuov yie bun meih nyei win-wangv
• zoux meih lorngx zaux nyei dorngx.” * Matv^taai 22:44 ; Maako 12:36 ;
  Lugaa 20:42-43 ; Gong-Zoh 2:34-35 ; 1 Ko^lin^to 15:25 ; E^fe^so 1:20-22 ; Ko^lo^si 3:1 ;
  Hipv^lu 1:13 ; 8:1 ; 10:12-13
• ² Ziouv oix yiem Si^on sung cuotv meih nyei domh qaqv nyei biaav,
• bun meih yiem meih nyei win-wangv mbu'ndongx gunv.
• ³ Meih dorh meih nyei jun-baeng mingh cing-nzengc mbong gu'nguaaic wuov hnoi,
• meih nyei baeqc fingx a'hneiv zorqv ganh fungx bun meih.
• Hnangv lungh ndorm nyei mbiungc-suiv
• meih nyei mienh lunx mienh oix daaih lorz meih.
• ⁴ Ziouv laengz ngaengc waac gorngv,
• nqa'haav zungv maiv tiuv hnyouv,
• “Meih yietc liuz zoux sai mienh
• hnangv Men^ki^se^ndekc wuov nyungc sai mienh nor.” * Hipv^lu 5:6 ; 6:20 ; 7:17 , 21
• ⁵ Ziouv yiem meih nyei mbiaauc maengx.
• Taux ninh qiex jiez wuov hnoi,
• ninh oix mborqv baaic zuangx hungh.
• ⁶ Ninh oix dingc maanc guoqv mienh nyei zuiz,
• oix bun janx-daic nyei sei buangv nzengc naaiv deix guoqv.
• Ninh oix mborqv baaic ndau-beih norm-norm guoqv nyei hungh diex.
• ⁷ Ninh oix hopv jauv-hlen nyei ndoqv nyei wuom,
• ninh ziouc cau jiez m'nqorngv. * Naaiv yiemc se aqc duqv bieqc hnyouv nyei. Maaih deix sou gorngv “Hungh diex oix hopv jauv-hlen nyei wuom ziouc henv jiez daaih, duqv hingh win-wangv.”