Singx Nzung 101

Laengz Gan Horpc Nyei Doz-Leiz

Ndaawitv zoc nyei singx nzung.

• ¹ Yie oix baaux nzung gorngv ziepc zuoqv nyei caux baengh fim nyei jauv.
• O Ziouv aac, yie oix baaux nzung bun meih.
• ² Yie oix longc hnyouv yangh maiv maaih dorngx nqemh nyei jauv.
• Meih taux haaix zanc cingx daaih yie naaiv?
• Yie oix hnyouv zingx nyei
• yiem yie nyei biauv.
• ³ Orqv haic nyei ga'naaiv yie zungv
• maiv bun doix hmien doix minc.
• Yie nzorng leih Tin-Hungh nyei mienh zoux nyei sic,
• yie zungv maiv bun guoqv zuqc yie.
• ⁴ Yie yaac maiv nyiemc hnyouv njuotv nyei mienh,
• maiv bun haaix nyungc orqv sic guen zuqc yie.
• ⁵ Haaix dauh beic ndiev gorngv doqc ninh juangc laangz nyei gorx-youz
• yie oix mietc nzengc.
• Zoux maux, ceng-hlo nyei mienh
• yie diev maiv duqv.
• ⁶ Yie nyei m'zing oix mangc jienv yiem deic-bung ziepc zuoqv nyei mienh,
• weic bun ninh mbuo duqv caux yie yiem.
• Haaix dauh yangh maiv maaih dorngx nqemh nyei jauv,
• ziouc duqv fu-sux yie.
• ⁷ Haaix dauh zoux nduov mienh nyei mienh
• maiv duqv yiem yie nyei biauv.
• Haaix dauh gorngv-baeqc,
• maiv duqv yiem yie nyei nza'hmien.
• ⁸ Ndorm-ndorm yie oix mietc
• yiem deic-bung nyei yietc zungv orqv mienh.
• Yie oix zorqv dauh dauh zoux waaic sic nyei mienh pai guangc,
• maiv bun yiem Ziouv nyei zingh.