×
Cong-Mengh Waac 27
-
1 Maiv dungx bungx waac-maux gorngv njang hnoi nyei sic,
- weic zuqc meih maiv hiuv duqv
- yietc hnoi yietc hnoi oix maaih haaix nyungc sic cuotv.
-
2 Bun ganh dauh ceng meih,
maiv zeiz longc meih ganh nyei nzuih.
- Bun nyiec nyei mienh ceng meih, maiv zeiz ganh nyei nzuih ceng.
-
3 La'bieiv se hniev, saa-ziou yaac maaih hniev-daauh,
- mv baac mienh hngongx mienh cuoqv mienh
- zungv gauh hniev naaiv deix i nyungc.
-
4 Mienh nouz se ciouv, mienh qiex jiez haih baaic waaic,
- mv baac mienh mueic jieqv, haaix dauh haih ngaengc duqv jienv?
-
5 Dorng jienv mienh gorngv-hemx,
- se gauh longx maiv bun mienh hiuv duqv meih hnamv ninh.
-
6 Loz-gaeng doic bun meih zuqc mun se ziepc zuoqv nyei zoux,
- mv baac win-wangv zom hmien jiex ndaangc zien nyei jauv.
-
7 Nyanc beuv nyei mienh ziouc youx mueiz-dorngh,
- mv baac hnyouv sie nyei mienh,
- liemh im nyei ga'naaiv yaac gaam nyei.
-
8 Mienh leih nqoi ganh nyei biauv,
- se hnangv norm norqc leih nqoi ninh nyei lauz.
-
9 Youh ndaang caux wuom-ndaang bun hnyouv a'hneiv.
- Loz-gaeng doic longc hnyouv kuinx bun hnyouv orn-lorqc.
-
10 Meih maiv dungx guangc meih nyei loz-gaeng doic caux meih nyei die nyei loz-gaeng doic.
- Zuqc zeqc naanc nyei hnoi yaac maiv dungx mingh meih nyei muoz-doic nyei biauv.
- Yiem fatv nyei juangc laangz mienh se gauh longx yiem go nyei muoz-doic.
-
11 Yie nyei dorn aac, meih oix zuqc zoux cong-mengh mienh,
- yaac bun yie nyei hnyouv njien-youh.
- Haaix dauh daanh yie, yie ziouc maaih waac dau.
-
12 Mienh guai mienh buatc haih maaih sic cuotv ziouc simv nqoi,
- mv baac maiv hiuv haaix nyungc nyei mienh hungx jienv mingh ziouc zuqc kouv aqv.
-
13 Se gorngv mienh beu ga'nyiec nyei mienh,
- oix zuqc zorqv laengz beu nyei mienh nyei lui daaih dorngx.
- Se gorngv ninh beu ganh fingx mienh,
- zungv oix zuqc zorqv ninh nyei lui dorngx jienv.
-
14 Haaix dauh jiez sin nziouv,
- qiex hlo nyei heuc jienv buang waac bun juangc laangz mienh,
- daaux nzuonx mienh funx benx zioux nyei waac.
-
15 Zanc-zanc nzaeng jaax nyei m'sieqv dorn,
- se hnangv duih mbiungc nyei hnoi maaih mbiungc zanc-zanc ndiepv njiec, maiv dingh.
-
16 Dangv jienv ninh se hnangv dangv jienv nziaaux,
- fai longc mbiaauc jieqv buoz nanv youh.
-
17 Hnangv hlieqv nzioux hlieqv laic daaih,
- laanh caux laanh
yaac hnangv wuov nor.
-
18 Haaix dauh goux ngongh nyorx ndiangx ziouc duqv nyanc ndiangx nyei biouv.
- Haaix dauh goux ninh nyei ziouv, wuov dauh ziouc duqv mienh taaih.
-
19 Mangc wuom buatc ganh nyei hmien,
- mienh nyei hnyouv fih hnangv nyei bun cing mienh hnangv haaix nor.
-
20 Yiemh gen caux zuqc mietc nyei mienh yiem nyei dorngx,
yietc liuz maiv buangv.
- Mienh nyei m'zing buatc oix duqv nyei, yietc liuz yaac maiv gaux.
-
21 Nyaanh korqv se weic sinx nyaanh, louh se weic sinx jiem,
- ceng nyei waac yaac haih seix duqv cuotv mienh.
-
22 Maiv gunv zorqv mienh hngongx mienh caux zong muonc nyei mbiauh
- dapv jienv da'komv aengx longc da'juih zong,
- mienh hngongx mienh m'daaih hnangv naaic hngongx aqv.
-
23 Meih oix zuqc hiuv duqv meih nyei ba'gi yungh guanh hnangv haaix nor,
- yaac mangc longx meih nyei ngongh guanh,
-
24 weic zuqc zinh zoih maiv haih yietc liuz maaih.
- Hungh ningv yaac haih yiem taux maanc gouv maanc doic fai?
-
25 Gaatv miev-nqaai mingh,
- miev-lunx aengx cuotv daaih,
- mbong zaangc nyei lai-miev yaac siou nzengc,
-
26 wuov zanc meih ziouc duqv ba'gi yungh dorn nyei biei
- weic zoux meih nyei lui-houx.
- Yungh yaac benx lingh deic nyei jaax-zinh.
-
27 Maaih yungh nyorx gaux zoux meih nyei nyanc hopv,
- yaac gaux meih nyei yietc biauv mienh,
- liemh meih nyei m'sieqv bou.
