Tipv Deix Saa^lo^morn Nyei
Cong-Mengh Waac
1 Yiem naaiv mingh yaac benx Saa^lo^morn nyei cong-mengh waac, dongh Yu^ndaa hungh, He^se^ki^yaa, nyei mienh ceu daaih.
-
2 Zorqv sic gem jienv benx Tin-Hungh nyei njang-laangc,
- mv baac hungh diex nyei njang-laangc se ninh zorqv sic zaah cuotv daaih.
-
3 Lungh ndongc haaix hlang, ndau ndongc haaix ndo,
- hungh diex nyei hnyouv yaac hnangv wuov nor zaah maiv toux.
-
4 Zorqv cuotv nyaanh nqaiv,
- nyaanh zaangc ziouc duqv nyaanh daav cuotv ga'naaiv.
-
5 Zorqv nqoi yiem hungh diex nyei nza'hmien nyei orqv mienh,
- ninh nyei hungh weic ziouc bangc baengh fim nyei jauv liepc gorn-ndoqv wuonv.
-
6 Yiem hungh diex nyei nza'hmien maiv dungx taaih ganh hlo,
- fai souv jienv zoux hlo nyei mienh nyei dorngx,
-
7 weic zuqc maaih mienh gorngv, “Faaux naaiv oc,”
- se gauh longx dorng jienv zoux hlo nyei mienh zuqc mienh heuc meih tuix njiec.
-
8 Meih nyei m'zing buatc nyei
- maiv dungx siepv-siepv nyei
- dorh mingh wuov sic dorngh.
- Nziex maaih ganh nyei juangc laangz mienh daaih bun meih zuqc nyaiv,
- setv mueiz meih hnangv haaix nor zoux?
-
9 Se gorngv meih caux dauh juangc laangz mienh nzaeng,
- oix zuqc caux ninh mbenc sung,
- yaac maiv dungx dorh ninh gem jienv nyei sic mingh gorngv.
-
10 Nziex muangx haiz nyei mienh bun meih zuqc nyaiv.
- Meih waaic nyei mengh dauh yaac maiv haih longx aqv.
-
11 Gorngv yietc joux waac puix duqv horpc ziangh hoc,
- se hnangv norm longc jiem zoux daaih nyei biouv lorqc jienv nyaanh lorqc.
-
12 Cong-mengh mienh kuinx maaih m'normh oix muangx nyei mienh
- se hnangv jiem-buoz-ndoqv-nzaeng fai zien jiem zoux daaih nyei siou-setv.
-
13 Ziepc zuoqv nyei douc fienx mienh
- bun paaiv ninh wuov deix ziouv nyei hnyouv fingv,
- hnangv siou gaeng-zuangx nyei ziangh hoc maaih sorng tengx laangh.
-
14 Mienh bungx waac-maux gorngv oix fungx zingh nyeic mv baac maiv fungx,
- se hnangv maaih mbuonx maaih nziaaux yaac maiv maaih mbiungc.
-
15 Longc noic yuoqc duqv zoux hlo nyei mienh.
- Gorngv waac suonc zungv haih bun ninh nyei hnyouv mau njiec.
-
16 Se gorngv meih duqv mueiz-dorngh oix zuqc nyanc horpc.
- Nyanc camv jiex jaax nor, nziex haih lov cuotv.
-
17 Meih oix zuqc lauh lauh mingh nzunc meih nyei juangc laangz mienh nyei biauv hnangv.
- Maiv zei aeqv, nziex meih bun ninh haiz kouv ninh ziouc nzorng meih aqv.
-
18 Zoux jaav zorng-zengx hoic juangc laangz mienh wuov dauh
- se hnangv mborqv jaax nyei ndiangx-ndonx
- fai nzuqc ndaauv fai forng-cang laic.
-
19 Zuqc zeqc naanc nyei ziangh hoc kaux maiv ziepc zuoqv nyei mienh
- se hnangv nyaah nquaqv fai zaux waaic.
-
20 Haaix dauh baaux nzung bun hnyouv mun hnyouv nzauh nyei mienh muangx,
- se hnangv juangv nyei hnoi jaiv lui,
- yaac hnangv zorqv wuom-sui dox njiec zuqc mun nyei dorngx.
-
21 Se gorngv meih nyei win-wangv hnyouv sie, oix zuqc bun hnaangx ninh nyanc.
- Se gorngv ninh jaang nqaatv, oix zuqc bun wuom ninh hopv.
-
22 Meih hnangv naaiv zoux ninh ziouc nyaiv aqv,
- Ziouv
yaac oix bun zingh nyeic meih.
-
23 Baqv bung nyei nziaaux dorh mbiungc daaih,
- mienh gorngv waac-huv yaac cuoqv mienh qiex jiez.
-
24 Yiem biauv-ngorh gu'nguaaic nyei gorqv
- corc gauh longx caux zanc-zanc nzaeng jaax nyei m'sieqv dorn juangc biauv yiem.
-
25 Maaih longx nyei fienx yiem go nyei deic-bung daaih,
- se hnangv jaang nqaatv nyei ziangh hoc hopv wuom-namx nor.
-
26 Kuv mienh nyiemc suei bun orqv mienh
- se hnangv njoqc nyei wuom-nyuonh fai laih hlopv nyei wuom-zingv.
-
27 Nyanc mueiz-dorngh camv se maiv yaauc.
- Lorz mienh taaih ganh yaac maiv benx.
-
28 Mienh maiv haih gunv maiv duqv ganh,
- se hnangv mbaang waaic nyei zingh maiv maaih zingh laatc.
