E^li^fatv Gorngv Da'faam Nzunc Waac
E^li^fatv Gox Yopv Gorngv
Ninh Dorngc Mienh Jomc Mienh
1 Temaan Mienh, E^li^fatv, ziouc dau,
-
2 “Mienh haih weic Tin-Hungh maaih lamh longc nyei fai?
- Cong-mengh mienh weic ninh maaih lamh longc nyei fai?
-
3 Se gorngv meih zoux kuv mienh,
- haih zoux bun Nernh Jiex Wuov Dauh a'hneiv fai?
- Fai se gorngv meih zoux dunh yunh nyei mienh,
- haih bun Tin-Hungh duqv haaix nyungc?
-
4 “Se weic zuqc meih taaih ninh, ninh cingx gorngv meih
- yaac siemv meih nyei zuiz fai?
-
5 Se meih zoux nyei orqv sic hlo haic maiv zeiz?
- Meih zoux nyei zuiz yaac maiv maaih jomc nyei dorngx.
-
6 Meih aapv gorx-youz an dorngx-daauh yaac maiv maaih gorn-baengx.
- Zungv zorqv nzengc ninh mbuo nyei lui-houx bun ninh mbuo laengh gaengv nyei yiem.
-
7 Kouv nyei mienh meih maiv bun wuom ninh mbuo hopv,
- hnyouv sie nyei mienh meih yaac maiv bun hnaangx nyanc.
-
8 Meih longc meih nyei hatc maaz duqv lingh deic,
- maaih mengh dauh nyei mienh duqv yiem naaic.
-
9 Meih zunc auv-guaav kungx-buoz baeqc zaux nyei nzuonx
- yaac zoux doqc guh hanh fu'jueiv.
-
10 Weic naaiv maaih mungz zaeng weih gormx meih.
- Meih jangx maiv zaaic nyei ziangh hoc liemh zeih zuqc gamh nziex nyei sic.
-
11 Hmuangx om jienv meih, meih ziouc mangc maiv buatc,
- wuom yaac yiemx jienv meih.
E^li^fatv Gorngv Yopv Hnamv Daaih
Tin-Hungh Maiv Buatc Ninh
Zoux Nyei Zuiz
-
12 “Tin-Hungh maiv zeiz yiem gu'nguaaic lungh hlang nyei dorngx fai?
- Mangc hlang jiex nyei hleix, ninh mbuo ndongc haaix hlang!
-
13 Meih corc gorngv, ‘Tin-Hungh hiuv duqv haaix nyungc?
- Ndongc naaic hmuangx, Tin-Hungh hnangv haaix nor haih mangc duqv tong siemv zuiz?
-
14 Mbuonx-hoz om jienv ninh, ninh ziouc mangc maiv buatc.
- Ninh yaac youh lungh gu'nguaaic.’
E^li^fatv Gorngv Yopv
Gan Orqv Mienh Nyei Jauv Yangh
-
15 “Meih corc oix gan loz-jauv fai?
- Naaiv se orqv mienh yangh jiex nyei jauv.
-
16 Maiv gaengh taux daic nyei ziangh hoc, ninh mbuo zuqc zorqv mingh mi'aqv.
- Ninh mbuo nyei gorn-ndoqv zuqc wuom guaatv mingh.
-
17 Ninh mbuo gorngv mbuox Tin-Hungh, ‘Leih nqoi yie mbuo maah!’
- yaac gorngv, ‘Nernh Jiex Wuov Dauh haih zoux haaix nyungc bun yie mbuo?’
-
18 Mv baac Tin-Hungh corc bun longx nyei ga'naaiv buangv nzengc ninh mbuo nyei biauv.
- Orqv mienh hnamv nyei jauv yie yaac maiv haih mengh baeqc.
-
19 “Kuv mienh buatc ninh mbuo zuqc baaic ziouc a'hneiv,
- maiv zoux dorngc nyei mienh yaac kuh jatv
-
20 gorngv, ‘Mbuo nyei win-wangv ndongc haaix zungv zuqc pai guangc.
- Ninh mbuo zengc njiec nyei ga'naaiv zuqc douz buov qui nzengc.’
E^li^fatv Kuinx Yopv Guangc Orqv Sic
Nzuonx Daaih Lorz Tin-Hungh
Duqv Baengh Orn
-
21 “Yopv aac, meih oix zuqc caux Tin-Hungh zoux horpc, caux ninh baengh orn,
- Tin-Hungh ziouc bun meih duqv longx.
-
22 Oix zuqc zipv ninh nyei nzuih njaaux nyei waac,
- siou ninh nyei waac yiem meih nyei hnyouv gu'nyuoz.
-
23 Se gorngv meih nzuonx daaih lorz Nernh Jiex Wuov Dauh
- meih ziouc duqv ceix jiez hnangv loz wuov nor.
- Se gorngv meih guangc orqv sic leih meih nyei ndopv-liuh go,
-
24 se gorngv meih zorqv jiem guangc jienv nie-mbung,
- zorqv Ofi nyei zien jiem guangc wuov ndoqv-zuonx nyei la'bieiv-qangx,
-
25 se gorngv Nernh Jiex Wuov Dauh benx meih nyei jiem,
- yaac benx meih jaaix haic nyei nyaanh,
-
26 hnangv naaiv meih ziouc a'hneiv Nernh Jiex Wuov Dauh
- yaac cau hmien lorz Tin-Hungh.
-
27 Meih ziouc daux gaux jouh ninh, ninh yaac oix muangx meih.
- Meih yaac jaauv sung meih laengz nyei ngaengc waac.
-
28 Meih dingc hnyouv zoux haaix nyungc, meih ziouc haih zoux duqv cuotv nyei.
- Njang yaac oix ziux meih nyei jauv.
-
29 Weic zuqc Tin-Hungh zatv jienv zoux maux nyei mienh,
- mv baac njoux nyiemc ganh zoux faix nyei mienh.
-
30 Liemh zoux dorngc nyei mienh ninh yaac oix njoux.
- Se gorngv meih zoux duqv horpc
meih ziouc duqv njoux.”
