Yu^ndaa Zungv Zuqc Dingc Zuiz

¹ Ziouv aengx gorngv mbuox yie, “Maiv gunv Mose caux Saa^mu^en souv jienv yie nyei nza'hmien, yie maiv maaih hnyouv mangc naaiv deix baeqc fingx. Zunc ninh mbuo cuotv mingh bun yie maiv zuqc buatc. Bun ninh mbuo mingh aqv. * Cuotv I^yipv 32:11-14 ; Saauv Mienh 14:13-19 ; 1 Saa^mu^en 7:5-9 ² Ninh mbuo haaix zanc naaic meih, ‘Yie mbuo oix zuqc mingh haaix?’ meih oix zuqc mbuox ninh mbuo, ‘Ziouv hnangv naaiv gorngv,

• “‘Bun maengc daaix zuqc wuon-baengc, ziouc zuqc wuon-baengc,
• bun maengc daaix zuqc nzuqc ndaauv daix, ziouc zuqc nzuqc ndaauv daix,
• bun maengc daaix zuqc ngorc hnaangx, ziouc zuqc ngorc hnaangx,
• bun maengc daaix zuqc guaatv mingh, ziouc zuqc guaatv mingh aqv. * Laauc Yaangh 13:10

³ “Ziouv gorngv, ‘Yie oix bun biei nyungc hoic ninh mbuo zuqc mietc. Maaih nzuqc ndaauv daix, maaih juv betv, maaih ndaamv-lungh nyei norqc caux ndau-beih nyei hieh zoih daaih nyanc zoux mietc. ⁴ Yie oix bun lungh ndiev maanc guoqv mienh buatc naaiv deix baeqc fingx, ziouc haeqv ninh mbuo gamh nziex haic, laaix Yu^ndaa nyei hungh, He^se^ki^yaa, nyei dorn, Maa^natv^se, yiem Ye^lu^saa^lem zoux nyei sic. * 2 Hungh Douh 21:1-16 ; 2 Zunh Doic Douh 33:1-9

• ⁵ “Ye^lu^saa^lem aah! Haaix dauh oix korv-lienh meih?
• Haaix dauh oix weic meih nzauh?
• Haaix dauh oix huin mingh naaic, ‘Meih longx nyei fai?’”
• ⁶ Ziouv gorngv, “Meih nqemh yie,
• meih kungx zanc-zanc tuix bouc hnangv.
• Yie ziouc sung buoz mborqv meih, bun meih zuqc mietc.
• Yie nyaangc gau, youx nzengc mi'aqv.
• ⁷ Yie oix yiem deic-bung nyei norm-norm zingh, * Faan zaqc gorngv zingh gaengh.
• zoux bun yie nyei baeqc fingx hnangv longc ga'naaiv-cenv cenv mbiauh nor.
• Yie oix bun ninh mbuo zuqc guangc fu'jueiv, bun yie nyei baeqc fingx zuqc mietc,
• laaix ninh mbuo maiv guangc ninh mbuo nyei jauv.
• ⁸ Yie bun ninh mbuo nyei auv-guaav gauh camv koiv nyei saa-ziou.
• Lungh aanx zanc zoux mietc nyei mienh
• daaih hoic mienh lunx mienh nyei maa.
• Yie bun ninh mbuo liemh zeih
• zuqc kouv, zuqc haeqv gamh nziex.
• ⁹ Yungz jiex siec dauh fu'jueiv nyei m'sieqv dorn nyei qaqv mau jienv njiec,
• zungv meih mi'aqv.
• Ninh nyei lungh hnoi zanc tiuv hmuangx mingh, * Faan zaqc gorngv “Lungh hnoi zanc ninh nyei mba'hnoi muotv mingh.”
• ninh zuqc nyaiv, zuqc baaic hmien.
• Zengc njiec nyei mienh yie bun yiem ninh mbuo nyei win-wangv nyei nza'hmien zuqc nzuqc ndaauv daix.”
• Naaiv se Ziouv gorngv nyei waac.
• ¹⁰ Yie nyei maa aac, yie zuqc kouv aqv,
• weic zuqc meih yungz yie daaih.
• Yie zuqc caux deic-bung gu'nyuoz nyei mienh
• fiuv-nzaeng fiuv-congx.
• Yie maiv bun mienh gaav yie nyei,
• yie yaac maiv gaav mienh nyei,
• yietc zungv mienh corc zioux yie.
• ¹¹ Ziouv aac, * Hipv^lu waac gorngv Ziouv gorngv. se gorngv yie maiv tengx meih tov bun ninh mbuo duqv longx, * Yiem naaiv norm dorngx Hipv^lu waac se maiv nangc mengh.
• yaac se gorngv doix zuqc sic, zuqc zeqc naanc nyei ziangh hoc
• yie maiv weic win-wangv tengx meih tov, gunv bun hnangv naaic.
• ¹² “Mienh haih wuotv hlieqv nauv,
• se baqv bung daaih nyei hlieqv caux dongh siqv fai?
• ¹³ Laaix yiem gormx meih nyei deic gu'nyuoz norm-norm dorngx,
• baamz nyei yietc zungv zuiz,
• yie oix zorqv meih nyei zinh zoih caux jaaix nyei ga'naaiv
• bun win-wangv baeqc baeqc luv mingh.
• ¹⁴ Yie oix bun meih yiem meih maiv hiuv nyei deic-bung
• fu-sux meih nyei win-wangv,
• weic zuqc yie qiex jiez hnangv njopc douz nor.
• Douz yietc liuz zieqc jienv maiv daic.” * Maaih deix sou faan daaih gorngv buov jienv meih mbuo.
• ¹⁵ Ziouv aac, meih hiuv nyei.
• Tov jangx yie, daaih mangc yie,
• yaac tengx yie jaauv win hoic yie wuov deix win-wangv.
• Weic meih nyei hnyouv haih nyienz duqv,
• tov maiv dungx dorh yie mingh.
• Tov meih hnamv taux
• yie weic meih diev mienh nqemh.
• ¹⁶ Ziouv, Nernh Jiex nyei Tin-Hungh aac,
• yie duqv meih nyei waac se dorngx yie nyei nyanc hopv.
• Meih nyei waac bun yie njien-youh
• yaac bun yie hnyouv a'hneiv,
• weic zuqc yie se gan meih nyei mbuox heuc nyei mienh.
• ¹⁷ Yie maiv zueiz nauc nyitc nyei mienh mbu'ndongx,
• yie ganh yaac maiv zoux njien-youh.
• Yie ganh nduqc dauh zueiz hnangv,
• weic zuqc meih hatc jienv yie, * Faan zaqc gorngv “Weic zuqc meih nyei buoz yiem jienv yie”
• yaac weic meih bun yie qiex jiez! haic.
• ¹⁸ Yie weic haaix diuc maiv dingh liouh nyei mun jienv yiem?
• Yie zuqc siang nyei dorngx weic haaix diuc zorc maiv haih longx?
• Meih weic yie oix hnangv maiv maaih wuom liouc nyei ndoqv, * Faan zaqc gorngv “hnangv nduov mienh nyei ndoqv”.
• yaac hnangv nqaai mingh nyei wuom-zingv fai?

¹⁹ Weic naaiv Ziouv hnangv naaiv gorngv,

• “Se gorngv meih nzuonx daaih, yie bun meih duqv longx hnangv loz wuov nor,
• meih yaac duqv souv yie nyei nza'hmien.
• Se gorngv meih gorngv jaaix nyei waac,
• maiv gorngv maiv lamh longc nyei waac
• meih ziouc dorngx yie nyei nzuih.
• Ninh mbuo ziouc huin daaih lorz meih,
• mv baac meih maiv dungx huin mingh lorz ninh mbuo.
• ²⁰ Yie ziouc bun meih weic naaiv deix baeqc fingx
• benx wuonv nyei dongh siqv laatc.
• Ninh mbuo oix caux meih mborqv jaax
• mv baac mborqv maiv hingh meih,
• weic zuqc yie caux meih yiem,
• oix njoux meih, tengx meih biaux ndutv.”
• Naaiv se Ziouv nyei waac.
• ²¹ “Yie oix njoux meih biaux ndutv orqv mienh nyei buoz-ndiev,
• yaac zuoqc meih cuotv mienh doqc mienh nyei buoz.”