Jetc^si Nyei Zeiv-Fun

• ¹ Jetc^si nyei gorn oix cuotv diuh cunx,
• ninh nyei nzungh oix cuotv nquaav nquaah yaac ziangh biouv. * Laauc Yaangh 5:5 ; 22:16
• ² Ziouv nyei Singx Lingh oix yiem ninh,
• Singx Lingh bun ninh maaih cong-mengh caux wuonh zaang,
• Singx Lingh bun ninh haih caangh laangh yaac maaih domh qaqv,
• Singx Lingh bun ninh haih mengh baeqc yaac bun ninh taaih Ziouv.
• ³ Ninh zungv oix buangv hnyouv taaih Ziouv.
• Ninh maiv zeiz ziux ganh nyei m'zing buatc nyei siemv,
• yaac maiv zeiz ziux ninh nyei m'normh haiz nyei dunx sic.
• ⁴ Ninh oix longc horpc nyei jauv siemv mienh jomc mienh,
• yaac baengh fim nyei dunx yiem lungh ndiev
• zuqc zatv njiec nyei mienh.
• Ninh oix njiec lingc dingc lungh ndiev mienh nyei zuiz, * Faan zaqc Hipv^lu waac gorngv “Ninh oix longc yiem ninh nyei nzuih nyei biaav mborqv lungh ndiev.”
• yaac daix orqv mienh. * Faan zaqc Hipv^lu waac gorngv “longc ninh nyei nzuih meix nyei qiex daix orqv mienh”. * 2 Te^saa^lo^ni^gaa 2:8
• ⁵ Ninh oix longc baengh fim nyei jauv dorngx houx-hlaang,
• yaac longc ziepc zuoqv nyei jauv zoux la'sin sai jienv. * E^fe^so 6:14
• ⁶ Hieh juv ziouc caux ba'gi yungh dorn yiem,
• nda'maauh mbeux yaac caux yungh dorn bueix,
• ngongh dorn caux sienh lunx juangc yiem juangc nyanc, * Fai “ngongh dorn, sienh lunx caux junc nyei ngongh dorn juangc nyanc”.
• fu'jueiv-faix yaac oix dorh ninh mbuo. * I^saa^yaa 65:25
• ⁷ Ngongh nyeiz zungv caux jiepv juangc nyanc,
• ninh mbuo nyei dorn juangc bueix,
• sienh yaac oix nyanc mbiauh nqaauv hnangv ngongh nor.
• ⁸ Corc hopv nyorx nyei gu'nguaaz oix yiem naang-jieqv nyei kuotv-ndaangc nyienx,
• guangc nyorx nyei gu'nguaaz oix lom bieqc naang-doqc nyei kuotv.
• ⁹ Da'faanh yiem yie nyei cing-nzengc mbong nyei dorngx,
• naaiv deix ga'naaiv maiv hoic, maiv zoux mietc.
• Weic zuqc hiuv Ziouv nyei mienh buangv nzengc lungh ndiev,
• hnangv wuom buangv koiv nor. * Haa^mbaa^gukc 2:14

Zuqc Guaatv Mingh Nyei Mienh
Duqv Nzuonx

¹⁰ Taux wuov hnoi, maaih dauh Jetc^si nyei Zeiv-Fun * Faan zaqc gorngv Jetc^si nyei Nzungh. oix liepc jiez zoux maanc fingx nyei jangx-hoc, maanc guoqv mienh ziouc daaih lorz ninh. Ninh hitv nyei dorngx maaih njang-laangc haic. * Lomaa 15:12

¹¹ Taux wuov hnoi, Ziouv oix sung da'nyeic nzunc buoz weic siou ninh zengc njiec nyei baeqc fingx, se yiem Atc^si^lie, I^yipv, Batc^lotv, * Se I^yipv Deic-Bung nyei wuov jiex wuonc. E^ti^o^bie, * Se Kutv. Elaam, Mbaa^mbi^lon, * Se Sinaa. Haamatv caux koiv-nzou nyei mienh.

• ¹² Ninh oix liepc jiez domh geh * Fai jangx-hoc. bun maanc guoqv mienh,
• aengx dorh I^saa^laa^en zuqc guaatv mingh nyei mienh daaih zunv.
• Ninh oix yiem ndau-beih nyei biei bung lungh gorn,
• bun zuqc yiem nzaanx nyei
  Yu^ndaa Mienh gapv zunv.
• ¹³ E^faa^im mueic jieqv nyei sic ziouc jiex mi'aqv,
• hoic Yu^ndaa nyei mienh yaac zuqc pai guangc.
• E^faa^im ziouc maiv mueic jieqv
  Yu^ndaa,
• Yu^ndaa yaac maiv hoic E^faa^im aqv.
• ¹⁴ Ninh mbuo oix njiec mingh mborqv * Faan zaqc gorngv “tiux njiec ninh mbuo nyei mba'dauh”. yiem fai bung nyei
  Fi^li^saa^die Mienh.
• Ninh mbuo lomh nzoih mingh luv yiem dong bung nyei mienh.
• Ninh mbuo oix mingh caangv
  E^ndom caux Mo^apc.
• Ammon Mienh yaac zuqc yiem ninh mbuo nyei buoz-ndiev.
• ¹⁵ Ziouv yaac oix bun
• I^yipv nyei koiv-congx nqaai.
• Ninh oix huangx buoz bun nziaaux-jorm buonc jiex
• Yu^fe^ditc Ndaaih gu'nguaaic.
• Ndaaih ziouc bun nqoi benx siec diuh ndoqv,
• bun mienh haih jiex mingh, zaux yaac maiv ndorn. * Laauc Yaangh 16:12
• ¹⁶ Maaih diuh domh jauv bun ninh nyei baeqc fingx
• zengc njiec nyei mienh yiem Atc^si^lie nzuonx,
• hnangv zinh ndaangc I^saa^laa^en Mienh
• yiem I^yipv Deic-Bung nzuonx nyei jauv nor.