×
Ho^se^yaa 7
-
1 Yie oix zorc I^saa^laa^en nyei ziangh hoc,
- E^faa^im nyei zuiz-nipc
- caux Saa^maa^lie zoux orqv nyei sic biux mengh cuotv daaih.
- Ninh mbuo zoux sic jaav,
- maaih janx-zaqc borngz bieqc biauv,
- yaac maaih luv nyei mienh yiem ga'nyiec luv.
-
2 Ninh mbuo maiv hnamv taux
- yie jangx ninh mbuo zoux nyei yietc zungv orqv sic.
- Ih zanc ninh mbuo nyei zuiz weih gormx ninh mbuo,
- yaac yiem yie nyei nza'hmien.
-
3 Ninh mbuo zoux nyei orqv sic bun hungh diex a'hneiv,
- ninh mbuo gorngv-baeqc nyei waac bun jien buangv hnyouv.
-
4 Ninh mbuo yietc zungv benx hienx nyei mienh,
- ninh mbuo se hnangv jorm haic nyei douz-louh,
- dongh yiem zoux njuov zaangc jiez gorn caix njuov
- taux njuov butv daaih, ninh maiv zeih douz hiaangx.
-
5 Houc yie mbuo nyei hungh diex wuov hnoi,
- jien laaix a'ngunc diuv nyei qaqv butv baengc.
- Hungh caux jienv huotv nyei mienh sung buoz.
-
6 Ninh mbuo jorm hnyouv hnangv douz-louh nor jorm, beic ndiev daav waaic nyei za'eix,
- ninh mbuo ziangh muonz qiex jiez, hnangv opv jienv douz,
- lungh ndorm ga'qiex baetv cuotv hnangv njopc douz nor.
-
7 Ninh mbuo yietc zungv jorm hnangv douz-louh,
- ninh mbuo yaac naqv gunv ninh mbuo wuov deix.
- Ninh mbuo nyei yietc zungv hungh diex king njiec daic,
- yaac maiv maaih ninh mbuo yietc dauh daaih heuc yie.
-
8 “E^faa^im ganh mingh zorpc ziex fingx mienh,
- E^faa^im hnangv ziqv mv baac maiv mbienv nyei njuov nor.
-
9 Ganh fingx mienh naqv ninh nyei qaqv,
- ninh yaac maiv hiuv.
- Ninh nyei mba'biei zungv baeqc deix,
- ninh yaac maiv hiuv.
-
10 I^saa^laa^en Mienh zoux maux nyei jauv
- zoux zorng-zengx gorngv ninh mbuo,
- mv baac ninh mbuo maiv nzuonx daaih lorz Ziouv,
- ninh mbuo nyei Tin-Hungh.
- Maiv gunv buangh naaiv deix yietc zungv sic,
- ninh mbuo maiv lorz ninh.
-
11 “E^faa^im se hnangv norm baeqc gopv,
- hngongx yaac hnamv maiv hiuv haaix nyungc,
- ziouc heuc I^yipv yaac mingh lorz Atc^si^lie.
-
12 Ninh mbuo mingh nyei ziangh hoc,
- yie oix zorqv yie nyei mungz zaaux jienv ninh mbuo.
- Yie oix baeng ninh mbuo njiec
- hnangv yiem ndaamv-lungh nyei norqc.
- Yie oix ziux ninh mbuo zoux nyei orqv sic
- mborqv njaaux ninh mbuo.
-
13 Weic zuqc ninh mbuo leih yie,
- ninh mbuo zuqc kouv aqv.
- Weic zuqc ninh mbuo ngaengc jienv yie,
- ninh mbuo oix zuqc mietc.
- Yie oix zuoqc ninh mbuo nzuonx,
- mv baac ninh mbuo longc
- gorngv-baeqc nyei waac gorngv taux yie.
-
14 Ninh mbuo maiv longc hnyouv heuc yie,
- mv baac ninh mbuo yiem ninh mbuo nyei coux qaqv nyiemv.
- Ninh mbuo gaatv ninh mbuo nyei sin
- weic tov mbiauh caux siang-a'ngunc diuv,
- yaac ngaengc jienv yie.
-
15 Maiv gunv yie njaaux ninh mbuo hoqc linc,
- bun ninh mbuo nyei buoz maaih qaqv henv,
- ninh mbuo daav za'eix zoux orqv bun yie.
-
16 Ninh mbuo huin mingh lorz Mbaa^an zienh,
- ninh mbuo hnangv buonv maiv ziangx nyei juang-zinx.
- Ninh mbuo nyei jien zuqc nzuqc ndaauv daix
- laaix ninh mbuo nyei nzuih bungx nyei waac-maux.
- Weic naaiv deix sic
- yiem I^yipv Deic-Bung nyei mienh jatv ninh mbuo.
