Tin-Hungh Heuc Apc^laam
Cuotv Jauv

¹ Ziouv gorngv mbuox Apc^laam, “Oix zuqc leih nqoi meih nyei buonv-deic, meih nyei cien-ceqv caux meih nyei die nyei biauv mingh taux yie oix bun meih hiuv nyei deic-bung. * Gong-Zoh 7:2-3 ; Hipv^lu 11:8

• ² Yie oix ceix fuqv bun meih,
• bun meih zoux yietc fingx hlo nyei mienh.
• Yie oix bun meih maaih mengh hoc.
• Meih yaac haih bun mienh duqv fuqv. * Tin Deic Douh 15:5 ; 17:4-5 ; 18:18 ; 22:17 ; 28:14 ; 32:12 ; 35:11 ; 46:3
• ³ Haaix dauh buang waac meih,
• yie ziouc ceix fuqv bun wuov dauh.
• Haaix dauh zioux meih,
• yie oix zioux wuov dauh.
• Weic meih yie oix ceix fuqv bun
• lungh ndiev fingx-fingx mienh.” * Tin Deic Douh 18:18 ; 22:17-18 ; 26:4 ; 28:14 ; Gaa^laa^tie 3:8

⁴ Apc^laam ziouc ziux Ziouv nyei waac cuotv jauv. Lotv yaac caux jienv mingh. Cuotv Haalaan wuov zanc Apc^laam duqv cietv ziepc hmz hnyangx. ⁵ Apc^laam dorh jienv ninh nyei auv, Saalaai, caux ninh nyei fun, Lotv, liemh ninh yiem Haalaan zornc daaih nyei nyungc-nyungc ga'naaiv caux duqv daaih nyei dauh dauh mienh cuotv jauv mingh Kaa^naa^an Deic-Bung. Ninh mbuo ziouc mingh taux Kaa^naa^an mi'aqv.

⁶ Apc^laam gan jienv deic-bung jiex taux Sekem Zingh, taux diuh domh mba'ong zuei ndiangx, Mo^le wuov. Wuov zanc Kaa^naa^an Mienh yiem jienv wuov norm deic-bung nyei. ⁷ Ziouv hinc cuotv daaih gorngv mbuox Apc^laam, “Naaiv norm deic-bung yie oix jiu bun meih nyei fun-faqv.” * Tin Deic Douh 13:15 ; 15:18 ; 17:8 ; 24:7 ; 26:3 ; 28:4 , 13; 35:12 ; 48:4 ;
Gong-Zoh 7:5 ; Gaa^laa^tie 3:16 Apc^laam ziouc ceix norm ziec-dorngh daaih ziec dongh hinc cuotv bun ninh buatc wuov dauh Ziouv.

⁸ Nqa'haav Apc^laam aengx suiv mingh taux Mbetc^en Zingh nyei dong bung maengx, mbong-aiv nyei dorngx, corng ndopv-liuh. Mbetc^en Zingh yiem ninh mbuo nyei fai bung, Ai Zingh yiem ninh mbuo nyei dong bung. Yiem wuov ninh aengx ceix norm ziec-dorngh daaih gorngv cuotv Ziouv nyei mbuox zaangc Ziouv. ⁹ Apc^laam aengx cuotv jauv hungx jienv Negepc mingh.

Apc^laam Yiem I^yipv Deic-Bung

¹⁰ Kaa^naa^an Deic-Bung buangh zuqc domh huaang domh ngorc. Mienh ngorc duqv kouv haic, Apc^laam ziouc mingh yiem douc I^yipv Deic-Bung. * Tin Deic Douh 20:1-18 ; 26:7-11 ¹¹ Aav lamh deix bieqc I^yipv Deic-Bung wuov zanc, Apc^laam gorngv mbuox ninh nyei auv, Saalaai, “Yie hiuv duqv meih se nzueic haic nyei m'sieqv dorn. ¹² I^yipv Mienh buatc meih, ninh mbuo ziouc gorngv, ‘Naaiv se ninh nyei auv,’ ziouc daix yie mv baac liouh meih. ¹³ Meih oix zuqc mbuox ninh mbuo meih zoux yie nyei muoc, * Apc^laa^ham caux Saalaa juangc die, maiv juangc maa. Beiv mangc Tin Deic Douh 20:12 . ninh mbuo ziouc weic meih zoux longx bun yie yaac weic meih liouh yie nyei maengc.” * Tin Deic Douh 20:2 ; 26:7

¹⁴ Apc^laam bieqc I^yipv Deic-Bung wuov zanc, I^yipv Mienh buatc ninh nyei auv za'gengh nzueic haic. ¹⁵ Faalo Hungh nyei jien buatc liuz Saalaai ziouc mingh ceng bun hungh diex muangx. Nqa'haav dorh Saalaai mingh yiem hungh diex nyei dinc. ¹⁶ Weic Saalaai, hungh diex zoux longx bun Apc^laam. Apc^laam duqv ngongh, duqv ba'gi yungh, lorh gouv lorh nyeiz, nouh gauv nouh beiz caux lorh torh.

¹⁷ Mv baac laaix Apc^laam nyei auv, Saalaai, Ziouv bun hungh diex caux ninh nyei biauv zong mienh butv ciouv haic nyei baengc. ¹⁸ Hungh diex heuc Apc^laam daaih ziouc gorngv, “Meih weic haaix diuc hnangv naaiv nor zoux bun yie? Meih fungc maiv gorngv zaqc ninh zoux meih nyei auv? ¹⁹ Meih weic haaix diuc gorngv ninh zoux meih nyei muoc, nduov yie dorh daaih zoux yie nyei auv? Naaiv meih nyei auv. Dorh jienv ninh mingh aqv.” ²⁰ Hungh diex yaac paaiv ninh nyei mienh dorh Apc^laam caux ninh nyei auv, liemh ninh nyei nyungc-nyungc ga'naaiv, cuotv deic-bung.