Zuqc Zeix,
Maiv Maaih Mienh Orn Hnyouv

¹ Yie aengx mangc ziouc buatc yiem seix zaangc yietc zungv zeix mienh nyei sic.

• Mangc maah! Yie buatc zuqc zeix nyei mienh nyei wuom-mueic liouc njiec,
• ninh mbuo yaac maiv maaih haaix dauh orn hnyouv.
• Zeix mienh wuov deix maaih lingc maaih qaqv nyei,
• yaac maiv maaih haaix dauh orn zuqc zeix nyei mienh nyei hnyouv.
• ² Weic naaiv yie hnamv daaih, daic liuz nyei mienh daic mingh,
• zungv gauh longx ziangh jienv nyei mienh nangh mienh.
• ³ Mv baac gauh longx jiex naaiv deix i nyungc
• se maiv gaengh duqv cuotv seix nyei mienh,
• weic zuqc ninh mbuo maiv duqv buatc
• yiem naaiv seix zaangc nyei haaix nyungc orqv sic.

Zoux Gong Nyei Jauv

⁴ Yie aengx buatc yietc zungv laauh luic caux cuotv buoz-dauh zoux nyei gong se weic zuqc mienh caux ninh nyei juangc laangz mienh, laanh mueic jieqv laanh. Naaiv se fih hnangv nyei kungx-morngh. Se kungx bun nziaaux saaux hnangv.

• ⁵ Mienh hngongx mienh qopv jienv buoz,
• zuov jienv ngorc daic.
• ⁶ Duqv yietc nyau ziouc hnyouv nqaai
• se gauh longx oix zuqc laauh luic weic duqv i nyau.
• Naaiv se kungx bun nziaaux saaux hnangv.

⁷ Yie aengx buatc yietc nyungc yiem lungh ndiev kungx-morngh.

• ⁸ Maaih nduqc laanh mienh ganh yiem hnangv.
• Ninh maiv maaih fu'jueiv,
  maiv maaih muoz-doic,
• mv baac ninh maiv dingh hitv nyei laauh luic zoux.
• Ninh nyei m'zing mangc ninh nyei zinh zoih haaix zanc yaac maiv gaux.
• Ninh maiv naaic ganh, “Yie weic haaix dauh laauh luic zoux gong,
• hoic ganh maiv duqv njien-youh?”
• Naaiv yaac kungx-morngh,
• se kouv jienv yiem hnangv.
• ⁹ I laanh mienh se gauh longx yietc laanh
• weic zuqc i laanh laauh luic zoux, ninh mbuo gauh duqv longx.
• ¹⁰ Se gorngv yietc laanh ndorpc,
• ninh nyei doic haih ken ninh jiez sin daaih.
• Mv baac yietc laanh mienh ganh yiem,
• ninh ndorpc njiec, maiv maaih mienh ken ninh jiez sin,
• ninh ziouc kouv aqv.
• ¹¹ Aengx maaih nyungc. Se gorngv i laanh juangc jienv bueix, ninh mbuo haih siouv.
• Mv baac yietc laanh mienh ganh bueix, hnangv haaix nor haih siouv?
• ¹² Maiv gunv yietc laanh mienh haih mborqv duqv hingh yietc laanh,
• i laanh ndongc haaix zungv haih mborqv duqv hingh ninh.
• Buo gouv gitv daaih nyei hlaang-sietv,
• maiv hungh hec dangx.

¹³ Jomc mv baac maaih cong-mengh nyei mienh lunx mienh se gauh longx gox nyei, hngongx nyei hungh diex, dongh ih zanc maiv kangv muangx mienh kuinx nyei waac, ¹⁴ maiv gunv ninh yiem loh cuotv daaih faaux weic zoux hungh fai yiem ninh ganh nyei guoqv cuotv seix benx mienh jomc mienh. ¹⁵ Yie buatc yiem seix zaangc jiex mingh jiex daaih nyei mienh, yaac buatc nzipc jienv zoux hungh wuov dauh mienh lunx mienh. ¹⁶ Ninh gunv nyei zuangx mienh camv, zungv maiv maaih soux mouc. Mv baac yiem ninh nqa'haav daaih nyei mienh, maiv maaih haaix dauh a'hneiv ninh. Za'gengh zien nyei, naaiv se kungx-morngh. Se kungx bun nziaaux saaux hnangv.