Yo^su^waa Nzipc Jienv Zoux
Mose Nyei Gong

¹ Mose aengx gorngv naaiv deix yietc zungv waac mbuox
I^saa^laa^en nyei zuangx mienh. ² Ninh gorngv, “Yie ih zanc buangv yietc baeqv nyic ziepc hnyangx aqv. Yie maiv haih dorh maiv duqv meih mbuo. Ziouv mbuox yie, ‘Meih maiv duqv jiex Jor^ndaen Ndaaih.’ * Saauv Mienh 20:12 ³ Ziouv, meih mbuo nyei Tin-Hungh ganh, oix mingh ndaangc yienz meih mbuo, yiem meih mbuo nyei wuov ndaangc maengx mietc nzengc wuov deix fingx-fingx mienh. Meih mbuo ziouc duqv ninh mbuo nyei deic-bung benx meih mbuo nyei buonc deic-bung. Yo^su^waa oix mingh ndaangc dorh meih mbuo hnangv Ziouv gorngv wuov nor. ⁴ Ziouv oix zoux bun wuov deix fingx-fingx mienh hnangv ninh zoux bun Aa^mo^lai Mienh nyei hungh, Si^honx caux Okc, liemh ninh mbuo nyei deic-bung mietc nzengc. * Saauv Mienh 21:21-35 ⁵ Ziouv oix zorqv ninh mbuo jiu bun meih mbuo. Meih mbuo oix zuqc ziux yie hatc meih mbuo nyei yietc zungv waac zoux bun ninh mbuo. ⁶ Meih mbuo oix zuqc henv, zungx jienv daamv. Maiv dungx gamh nziex ninh mbuo ziouc haeqv ganh, weic zuqc Ziouv, meih mbuo nyei Tin-Hungh, caux meih mbuo mingh. Ninh yietc liuz maiv bungx ndortv meih mbuo yaac maiv guangc meih mbuo.”

⁷ Mose heuc Yo^su^waa daaih dorng jienv I^saa^laa^en nyei zuangx mienh gorngv mbuox ninh, “Meih oix zuqc henv, daamv hlo nyei, weic zuqc meih oix zuqc caux naaiv deix baeqc fingx bieqc Ziouv caux ninh mbuo nyei ong-taaix laengz jiu bun ninh mbuo nyei deic-bung. Meih oix zuqc dorh ninh mbuo bieqc mingh duqv wuov norm deic-bung benx ninh mbuo nyei buonc. ⁸ Ziouv ganh oix yiem meih nyei wuov ndaangc maengx. Ninh yietc liuz maiv bungx ndortv meih yaac maiv guangc meih. Maiv dungx gamh nziex yaac maiv dungx hnyouv huaang.” * Yo^su^waa 1:5 ; Hipv^lu 13:5

Siec Hnyangx Oix Zuqc
Doqc Nzunc Leiz-Latc Sou

⁹ Mose ziouc fiev naaiv deix leiz-latc jiu bun Lewi sai mienh, dongh gaeng Ziouv nyei Laengz Ngaengc Waac Faang nyei sai mienh, caux
I^saa^laa^en Mienh nyei zuangx mienh gox. ¹⁰ Mose hatc ninh mbuo, “Mouz nzunc buangv siec hnyangx wuov hnyangx, * Lewi 25:1-7 ; Nzamc Leiz-Latc 15:12 se dongh guangc zaeqv nyei hnyangx, doix Mbiorv Liuh Zipv nyei ziangh hoc, * Nzamc Leiz-Latc 16:13-15 ¹¹ I^saa^laa^en nyei zuangx mienh gapv zunv yiem Ziouv, meih mbuo nyei Tin-Hungh, nyei nza'hmien, se yiem ninh ginv daaih nyei dorngx wuov zanc, meih oix zuqc doqc naaiv deix leiz-latc bun ninh mbuo muangx. ¹² Oix zuqc heuc zuangx mienh, liemh m'jangc m'sieqv caux fu'jueiv, liemh yiem meih mbuo nyei zingh nyei ganh fingx mienh, daaih gapv zunv weic bun ninh mbuo duqv haiz yaac hoqc linc taaih Ziouv, meih mbuo nyei Tin-Hungh, yaac gan longx naaiv deix leiz-latc nyei yietc zungv waac. ¹³ Ninh mbuo nyei zeiv-fun, dongh maiv haiz jiex naaiv deix leiz-latc wuov deix, ziouc duqv haiz yaac hoqc linc taaih Ziouv, meih mbuo nyei Tin-Hungh, da'faanh meih mbuo duqv yiem jienv meih mbuo ih zanc oix jiex wuov ngaanc ziqc Jor^ndaen Ndaaih duqv benx meih mbuo nyei buonc wuov norm deic-bung.”

Ziouv Paaiv Bun Mose
Nqa'haav Laai Nyei Waac

¹⁴ Ziouv gorngv mbuox Mose, “Meih guei seix nyei hnoi-nyieqc taux fatv aqv. Oix zuqc heuc Yo^su^waa caux meih mingh Wuic Buangh nyei Ndopv-Liuh, yie ziouc paaiv ninh.” Mose caux Yo^su^waa ziouc bieqc Wuic Buangh nyei Ndopv-Liuh gu'nyuoz.

¹⁵ Ziouv hinc daaih yiem mbuonx-ndiouh gu'nyuoz, Ndopv-Liuh nyei gaengh ndaangc gu'nguaaic. ¹⁶ Ziouv aengx gorngv mbuox Mose, “Maiv lauh meih oix zuqc guei seix. * Hipv^lu waac gorngv “oix zuqc mingh caux meih nyei ong-taaix mbuo yiem.”
Eix leiz se daic. Nqa'haav naaiv deix baeqc fingx ziouc maiv ziepc zuoqv nyei gan yie. Ninh mbuo oix mingh zaangc dongh ninh mbuo mingh yiem wuov norm deic-bung nyei ganh fingx mienh nyei zienh. Ninh mbuo oix guangc yie yaac baamz yie caux ninh mbuo liepc jiez nyei ngaengc waac. ¹⁷ Taux wuov hnoi yie ziouc qiex jiez haic ninh mbuo yaac guangc ninh mbuo. Yie oix buang jienv yie nyei hmien, maiv mangc ninh mbuo. Ninh mbuo ziouc zuqc mietc, zuqc ciouv nyei sic caux domh zeqc naanc hoic ninh mbuo. Taux wuov hnoi ninh mbuo ziouc naaic, ‘Mbuo zuqc naaiv deix zeqc naanc laaix mbuo nyei Tin-Hungh maiv caux mbuo yiem maiv zeiz?’ ¹⁸ Taux wuov hnoi yie zungv oix buang jienv yie nyei hmien, maiv mangc ninh mbuo, laaix ninh mbuo zoux yietc zungv waaic sic, baaix nyiec nyei zienh.

¹⁹ “Ih zanc meih mbuo oix zuqc fiev naaiv diuh nzung njaaux I^saa^laa^en Mienh hoqc taux zuoqc weic bun yie longc zoux zorng-zengx gox ninh mbuo. ²⁰ Yie oix dorh ninh mbuo bieqc wuov norm ndau-touv longx nyei deic-bung, * Beiv mangc Cuotv I^yipv 3:8 . se dongh yie caux ninh mbuo nyei ong-taaix houv jienv laengz bun nyei deic-bung. Yiem wuov norm deic-bung ninh mbuo duqv nyanc beuv yaac kuh yiem. Ninh mbuo ziouc huin mingh zaangc nyiec nyei zienh guangc yie, yaac baamz yie caux ninh mbuo laengz nyei ngaengc waac. ²¹ Ninh mbuo zuqc ziex nyungc zeqc naanc caux ciouv nyei sic nyei ziangh hoc, naaiv diuh nzung ziouc zoux zorng-zengx gox ninh mbuo, weic zuqc ninh mbuo nyei zeiv-fun zanc-zanc buih naaiv diuh nzung, maiv la'kuqv. Maiv gunv yie maiv gaengh dorh ninh mbuo bieqc yie houv bun ninh mbuo nyei deic-bung, ninh mbuo nyei hnyouv oix hnangv haaix nor zoux yie zungv hiuv mi'aqv.” ²² Dongh wuov hnoi Mose ziouc fiev naaiv diuh nzung daaih aengx njaaux I^saa^laa^en Mienh.

²³ Ziouv hnangv naaiv nor paaiv Nun nyei dorn, Yo^su^waa, “Meih oix zuqc henv, daamv hlo nyei, weic zuqc meih zungv oix zuqc dorh I^saa^laa^en Mienh bieqc yie houv bun ninh mbuo nyei deic-bung. Yie ganh oix caux meih yiem.” * Saauv Mienh 27:23 ; Yo^su^waa 1:6

²⁴ Mose zorqv naaiv deix leiz-latc nyei waac yiem gorn taux setv mueiz fiev njiec sou nzengc mi'aqv. ²⁵ Ninh ziouc paaiv gaeng Ziouv nyei Laengz Ngaengc Waac Faang nyei Lewi Mienh. ²⁶ Ninh gorngv, “Zorqv naaiv njunc Leiz-Latc Sou an jienv Ziouv, meih mbuo nyei Tin-Hungh, nyei Laengz Ngaengc Waac Faang ga'hlen. An jienv naaic weic zoux zorng-zengx gox meih mbuo I^saa^laa^en Mienh. ²⁷ Yie hiuv duqv meih mbuo ndongc haaix hnyouv ngaengc, m'normh hoz. Yie corc ziangh jienv caux meih mbuo yiem nyei ziangh hoc, meih mbuo ndongc naaic ngaengc Ziouv, yie daic mingh nyei ziangh hoc, meih mbuo oix ndongc haaix ngaengc maiv hiuv aqv. ²⁸ Oix zuqc heuc meih mbuo fingx-fingx nyei zuangx mienh gox caux meih mbuo nyei yietc zungv jien daaih gapv zunv. Yie ziouc gorngv naaiv deix waac bun ninh mbuo muangx yaac heuc lungh caux ndau zoux zorng-zengx gox ninh mbuo. ²⁹ Weic zuqc yie hiuv dingc, yie daic mingh, nqa'haav meih mbuo oix guangc yie hatc meih mbuo nyei yietc zungv waac, mingh zoux waaic sic. Ziouv buatc meih mbuo zoux nyei orqv sic caux meih mbuo nyei buoz zoux cuotv nyei ga'naaiv, ziouc cuoqv ninh qiex jiez haic cingx daaih nqa'haav hingv meih mbuo oix zuqc domh zeqc naanc.”

Mose Nyei Nzung

³⁰ Mose ziouc doqc dorng naaiv diuh nzung nyei waac bun I^saa^laa^en nyei zuangx mienh muangx.