1 Yotaam faaux weic zoux hungh wuov zanc, ninh nyei hnyangx-jeiv duqv nyic ziepc hmz hnyangx. Ninh yiem Ye^lu^saa^lem gunv ziepc luoqc hnyangx. Ninh nyei maa nyei mbuox heuc Ye^lu^saa, se Saax^ndokc nyei sieqv. 2 Ziux Ziouv mangc, ninh zoux duqv horpc hnangv ninh nyei die, Utc^si^yaa nor, cuotv liuz ninh maiv hnangv ninh nyei die borngz bieqc zaangc Ziouv nyei biauv buov hung. * * Mv baac baeqc fingx corc ei jienv waaic nyei za'eix zoux. 3 Yotaam aengx ceix jiez zaangc Ziouv nyei biauv Wuov Jiex nyei Gaengh. Yiem Ofen Deic nyei zingh laatc ninh yaac zorc camv nyei. 4 Ninh yiem Yu^ndaa nyei mbong-aiv dorngx ceix zingh yaac yiem ndiangx-lomc nyei dorngx ceix weih wuonv nyei dorngx caux laauh.
5 Yotaam mingh caux Ammon Mienh nyei hungh mborqv jaax yaac mborqv hingh mi'aqv. Wuov hnyangx Ammon Mienh cuotv i cin yietc baeqv joih * nyaanh, mbiauh witv yietc sinx yietc waanc tongv, * mbiauh mbaali yietc sinx caux yietc waanc tongv bun ninh. Da'nyeic caux da'faam hnyangx yaac cuotv fih hnangv nyei.
6 Yotaam henv jienv faaux weic zuqc ninh yiem Ziouv nyei nza'hmien ziepc zuoqv nyei zoux.
7 Yotaam zoux nyei sic, liemh ninh mborqv nyei yietc zungv jaax, caux zoux zengc njiec nyei sic, fiev jienv yiem I^saa^laa^en caux Yu^ndaa nyei hungh douh daan. 8 Ninh faaux weic zoux hungh wuov zanc ninh nyei hnyangx-jeiv duqv nyic ziepc hmz hnyangx. Ninh yaac yiem Ye^lu^saa^lem Zingh gunv ziepc luoqc hnyangx. 9 Yotaam guei seix mi'aqv, * yaac zangx jienv Ndaawitv nyei Zingh. Ninh nyei dorn, Aa^hatc, nzipc jienv ninh zoux hungh.