ໂຢ໊ບ 10 (Job 10)

ໂຢ໊ບ 10

ໂຢ໊ບ ກ໊ອງ ທິນ-ຮູ່ງ ໂຕສ໋ວ ໄມ້ ແປ້ງ ຟິມ

¹ “ເຢຍ ໂຢ໋ວ ໄຫ່ ເຢຍ ເຍີຍ ແໝ່ງ,

ເຢຍ ຕສ່ຽວ ເຊວີ່ຍ ຈ໊ຽນ ກ໊ອງ ເຢຍ ເຍີຍ ໜ່ານ ຕສີ້ງ.

ເຢຍ ໂຮຍ້ວ ກະຍົ໌ວ ໂຄ້ວ
ຕສ່ຽວ ອ໋ອຍ ກ໊ອງ ອ໊ະ.

² ເຢຍ ອ໋ອຍ ກ໊ອງ ບົ໋ວ ທິນ-ຮູ່ງ, ໄມ້ ຕູ໋ງ ຕີ່ງ ເຢຍ ມ່າຍ ຕສຸ໌ຍ.

ໂທ້ ປຸນ ເຢຍ ຮິ້ວ ເມີ່ຍ ເຫວີ່ຍ ຫາຍ ຕິ່ວ ເຖສົາ ເຢຍ ແດສງ.

³ ເມີ່ຍ ເຕສີ໋ຍ ມ່ຽນ ແອ໋ງ ໝັ່ງ ເຜຍ

ເມີ່ຍ ເຍີຍ ປົ໌ວ ເຕສີ໋ຍ ຕ້າຍ ເຍີຍ ກະນ້າຍ,

ຢ່າ ເທສງ ເອ໊າະ ມ່ຽນ ເຍີຍ ຕສະເອີ໋ຍ,

ນ້າຍ ເຕີ໋ຍ ສີ່ ເມີ່ຍ ໄຮ໌ ຫອບ ເຍີຍ ໄຟ?

⁴ ເມີ່ຍ ເຍີຍ ມຕສີງ ຮນັ້ງ ປ້າມ ມ່ຽນ ເຍີຍ ມຕສີງ ໄຟ?

ເມີ່ຍ ປວັດ ຮນັ້ງ ປ້າມ ມ່ຽນ ປວັດ ໄຟ?

⁵ ເມີ່ຍ ເຍີຍ ຮນອຍ * ຮນັ້ງ ປ້າມ ມ່ຽນ ເຍີຍ ຮນອຍ ໄຟ?

ເມີ່ຍ ເຍີຍ ຫຮຍັງ ຢ່າ ຮນັ້ງ ມ່ຽນ ເຍີຍ ຫຮຍັງ ໄຟ?

⁶ ຮນັ້ງ ໜ່າຍ ເມີ່ຍ ຖສີງ ຕ້າຍ ລໍ໌ ເຢຍ ໂຕສ໋ວ ຕ່ອງ ເຍີຍ ສີ່,

ແອ໋ງ ຕສິ້ມ ລໍ໌ ເຢຍ ເຍີຍ ຕສຸ໌ຍ,

⁷ ໄມ້ ກຸ໊ນ ເມີ່ຍ ຮິ້ວ ຕຸ໊ ເຢຍ ໄມ້ ມ່າຍ ຕ່ອງ ເຍີຍ ຕ໋ອງ,

ຢ່າ ໄມ້ ມ່າຍ ຫາຍ ເຕົ້າ ໂອຈ໋ວ ເຢຍ ເປຢົ໋າ ດຸ໊ດ ເມີ່ຍ ເຍີຍ ປົ໌ວ-ເດ໊ຍ.

ໂຢ໊ບ ກ໊ອງ ທິນ-ຮູ່ງ ໝັ່ງ ນິ່ນ, ອ໋ອຍ ໝຽດ ນິ່ນ

⁸ “ເມີ່ຍ ເຍີຍ ປົ໌ວ ນັ້ນ ເຢຍ, ເຕສີ໋ຍ ເຢຍ ທສວດ ຕ້າຍ,

ອີ້ ຕສັ່ນ ເມີ່ຍ ຕ໋າວ ອກາງ ຕ້າຍ ອ໋ອຍ ໝຽດ ເຢຍ.

⁹ ໂທ້ ຈັ໋ງ ຈ໊ຽນ ເມີ່ຍ ຫລົ່ງ ປະໄນ່ ເນຍ ເຕສີ໋ຍ ເຢຍ,

ເມີ່ຍ ຖສໍ່ ອ໋ອຍ ປຸນ ເຢຍ ດສ໋ວນ ເປ໋ນ ເນຍ-ບູງ ໄຟ?

¹⁰ ເມີ່ຍ ໂຕ໋ ເຢຍ ທສວດ ຕ້າຍ ຮນັ້ງ ຫຍໍ,

ແອ໋ງ ປຸນ ເຢຍ ກິ໊ດ ຕ້າຍ ຮນັ້ງ ຫຍໍ-ເຮມີຍ-ແຫງ່ງ ໄມ້ ເຕສີ໌ຍ?

¹¹ ເມີ່ຍ ຫລົ່ງ ດົ໊ບ ເຖສົາ ອໍ໊ ເປ໋ນ ລຸຍ ປຸນ ເຢຍ ຕສຸ໊,

ຢ່າ ຫລົ່ງ ບູ໊ງ ເຖສົາ ຈານ ຕ໋າວ ຈ໊ຽນ.

¹² ເມີ່ຍ ປຸນ ເຢຍ ມ່າຍ ແໝ່ງ ຕສຢັ້ງ

ຢ່າ ຕສຽບ ຕສົ໊ວະ ເຍີຍ ຮນ້ຳ ເຢຍ.

ເມີ່ຍ ຢ່າ ຫລົງໆ ເຍີຍ ເປວ ຈ໊ຽນ ເຢຍ ເຍີຍ ແໝ່ງ.

¹³ “ມປ່າ ນ້າຍ ເຕີ໋ຍ ສີ່ ເມີ່ຍ ປີ໋ງ ຈ໊ຽນ ຢຽມ ໂຮຍ້ວ,

ເຢຍ ຢ່າ ຮິ້ວ ຕຸ໊ ນ້າຍ ເຊ ເມີ່ຍ ເຍີຍ ຕສະເອີ໋ຍ ອ໊ະ.

¹⁴ ເຊ ກ໊ອງ ເຢຍ ປ໌າມ ຕສຸ໌ຍ
ເມີ່ຍ ໝັ່ງ ຈ໊ຽນ ເຢຍ.

ເມີ່ຍ ຕສູ໊ງ ອ໋ອຍ ຕີ່ງ ເຢຍ ເຍີຍ ຕສຸ໌ຍ, ໄມ້ ປູ໋ງ ກວັ່ງ.

¹⁵ ເຊ ກ໊ອງ ເຢຍ ໂຕສ໋ວ ເອ໊າະ,
ເຢຍ ຕສຸ ໂຄ້ວ ອ໊ະ.

ເຊ ກ໊ອງ ເຢຍ ໂຕສ໋ວ ຫອບ,
ເຢຍ ເທສົາ ໄມ້ ເຈ໌ຍ ມອກ໊ອງ.

ເຢຍ ຕສະເກ້ງ! ໄຍ້ ເດສ່ງ,

ຢ່າ ໝັ່ງ ຈ໊ຽນ ເຢຍ ກັ້ນ ເຍີຍ ໂຄ້ວ ໜ່ານ.

¹⁶ ເຊ ກ໊ອງ ເຢຍ ໂປ້ວ ເຢຍ ກັ້ນ ຝາວ,

ເມີ່ຍ ຕສຸ່ນ ເຢຍ ຮນັ້ງ ຊ່ຽນ ຕສຸ່ນ ນໍ.

ເມີ່ຍ ແອ໋ງ ໂຕສ໋ວ ບົວະ ຮ່ອງ ເຍີຍ ສີ່ ຫ່ອຍ ເຢຍ.

¹⁷ ເມີ່ຍ ແອ໋ງ ຈາ ຫລຽບ ຕສອງ-ເຕສ໋ງ ມ່ຽນ ຕ້າຍ ໂກ໋ ເຢຍ,

ຢ່າ ຈາ ເຖຈຍ ເຈ໌ຍ ເຢຍ.

ເມີ່ຍ ຕໍ້ ຊຢັງ-ຈຸນ-ແປງ ທິ້ວ ຈ໊ຽນ ເບ໊າະ ເຢຍ.

ໂຢ໊ບ ໂທ້ ທິນ-ຮູ່ງ ປູ໋ງ ອກອຍ ນິ່ນ
ເຫວີ່ຍ ຕສຸ ນິ່ນ ອ໊າ ລ່ຳ ໄຕ່

¹⁸ “ທິນ-ຮູ່ງ ອ້າ! ເມີ່ຍ ເຫວີ່ຍ ຫາຍ ຕິ່ວ ຕໍ້ ເຢຍ ທສວດ ມາ ເຍີຍ ກະເຊຍ?

ເຝີຍ ຕຸ໊ ເຢຍ ໄຕ່ ດ່າງ ມ່ຽນ ເຍີຍ ມຕສີງ ປວັດ ເຢຍ,

¹⁹ ຕສ່ຽວ ຮນັ້ງ ໄມ້ ມ່າຍ ເຈ໋ຍ ເຢຍ,

ເຊ ຢຽມ ມາ ເຍີຍ ກະເຊຍ ມີ່ງ ເຖົາ ໂຕສ໊ວ ໝີ່ ອ໊ະ.

²⁰ ເຢຍ ຕສຢັ້ງ ເສີຍ ເຍີຍ ຮນອຍ-ເຫຍັຍ ໂຕສະ ໄຫ່ ໄມ້ ເຕສີ໌ຍ?

ໂທ້ ປູ໋ງ ເຢຍ ກັ້ນ ຢຽມ, ປຸນ ເຢຍ ຕຸ໊ ເຕີ໋ຍ ອຈຽນ-ໂຢ້ວ

²¹ ດ່າງ ເຢຍ ມີ່ງ ໄມ້ ດສ໋ວນ ເຍີຍ ຕ໋ອງ,

ເຊ ມີ່ງ ຢ້ຽມ ເກນ, ມັບ ຫຮມວັງ ເຍີຍ ເຕີ່ຍ-ປູງ.

²² ນ້າຍ ນອມ ເຕີ່ຍ-ປູງ ເຊ ຫຮມວັງ ໄຫ່, ຫລຸ່ນ ເດສ່ງ,

ຢຽມ ວົ້ວ ເຍີຍ ອຈັງ ຢ່າ ຫຮມວັງ ໝີ່ ອ໊ະ.”