1 ຕສ໊ຽວ ກ໊ອງ ບົ໋ວ ໂມ^ເຊ, 2 “ອ໋ອຍ ຕສຸ ບົ໋ວ ອິ^ສະ^ລາ^ເອນ ມ່ຽນ ຕໍ້ ກະນ້າຍ ຕ້າຍ ຝົ່ງ ຫໍ່ ປຸນ ເຢຍ. ຫາຍ ເຕົ້າ ອກອຍ ຟິມ ອກອຍ ເອີ໋ຍ ຝົ່ງ ຫໍ່, ເມີ່ຍ ອ໋ອຍ ຕສຸ ຕສິ໊ບ ຕ້າຍ ເຫວີ່ຍ ເຢຍ. 3 ເມີ່ຍ ອ໋ອຍ ຕສຸ ຕສິ໊ບ ນິ່ນ ບົວ ຝົ່ງ ຫໍ່ ເຍີຍ ກະນ້າຍ ເຊ ຈຽມ, ຍ່ານ, ຕົ້ງ ຊິ, 4 ປະກີ ສຸຍ ເຊດ ບົ໊ວ, ຫລົວະ, ຊິ-ຫົ່ງ, ຫລະມ່າ ເດຍ-ໝ່ວນ, ຢູ້ງ ເປຢີຍ, 5 ຫຍົ່ມ ຕ້າຍ ຊິ ເຍີຍ ຢູ້ງ ໂກ໊ວ ດົ໊ບ ເຖສົາ ຟົວະ ຕ້າຍ ຫລົງ ເຍີຍ ແຊງ-ຄູ້ ດົ໊ບ, * ຕະຊຸ ດຢັ໋ງ, 6 ເຖສົາ ປົ໊ວ ຕັງ ເຍີຍ ກະລັ້ນ ໂຢ້ວ, ດາງ ເຍີຍ ຫລາບ ຫລິ່ວ ເຫວີ່ຍ ຕສອບ ອອນ ມ່ຽນ ເຍີຍ ໂຢ້ວ ເຖສົາ ຮູງ, 7 ເຖສົາ ຢຽດ ຫຍູ່ງ ຈ໋າຍ ໄຫ່ ເຍີຍ ຫລະເປຢີ໊ຍ-ຊິ ເດສວີ່ຍ ເຍີຍ, ເຖສົາ ເຕສ໋ຍ ຫຍູ່ງ ຫລະເປຢີ໊ຍ ເຫວີ່ຍ ຕີ໋ງ ຈ໊ຽນ ຕົ້ມ ໄຊ ມ່ຽນ ເຍີຍ ເອ^ຟົດ ເຖສົາ ປວັງ ຫລະຄວດ ວົ້ວ ຄວ້າຍ ກະນ້າຍ.
8 “ຕສວັ໋ງ ມ່ຽນ ອ໋ອຍ ຕສຸ ເຫວີ່ຍ ເຢຍ ໂຕສ໋ວ ນອມ ສີງ ຕິ່ນ, ເຢຍ ຕສ່ຽວ ຢຽມ ນິ່ນ ບົວ ບຸດົ໋ງ. 9 ນ້າຍ ນອມ ຕສັ່ງ ທິນ-ຮູ່ງ ເຍີຍ ດົ໊ບ-ລິ່ວ ເຖສົາ ດົ໊ບ-ລິ່ວ ກະຍົ໌ວ ເຍີຍ ຈາ-ຕ໋ອງ ອ໋ອຍ ຕສຸ ຮນັ້ງ ເຢຍ ບົ໋ວ ເມີ່ຍ ວົ້ວ ນໍ ໂຕສ໋ວ.
10 “ອ໋ອຍ ຕສຸ ຫລົ່ງ ຕະຊຸ ດຢັ໋ງ ໂຕສ໋ວ ນອມ ຟາງ, ດ໊າວ ອີ ເດາະ ປ໋ຽນ, ຈັ໊ງ ເດາະ ປ໋ຽນ, ຮລັງ ເດາະ ປ໋ຽນ. 11 ຫລົ່ງ ຈຽມ ປວັງ ຈ໊ຽນ ກະເຫຍ່ຍ ເຖສົາ ກະຍົ໌ວ. ແອ໋ງ ຫລົ່ງ ຈຽມ ໂຕສ໋ວ ປິນ ຮ່ອມ ກ໋ອມ. 12 ອ໋ອຍ ຕສຸ ໂຕ໋ ເປຢີຍ ນອມ ຈຽມ-ຄວີງ ຕີ໋ງ ຈ໊ຽນ ເປຢີຍ ເຈັ໊ຍ ຟາງ-ເຕສົ໋າ ເຍີຍ ກູ້ ຫງວ່າຍ, ຢຽດ ປູງ ຟາງ ມ່າຍ ອີ ນອມ. 13 ຫລົ່ງ ຕະຊຸ ດຢັ໋ງ ໂຕສ໋ວ ອີ ຕິ້ວ ແກງ ຟາງ ເຍີຍ ດຢັ໋ງ ຢ່າ ປວັງ ຈ໊ຽນ ຈຽມ. 14 ເຕສ໊າະ ຕ້າຍ ຖສຸນ ຈ໊ຽນ ຟາງ ກະເຮລນ ເຍີຍ ຄວີງ ເຫວີ່ຍ ແກງ ຟາງ. 15 ນ້າຍ ເຕີ໋ຍ ແກງ ຟາງ ເຍີຍ ດຢັ໋ງ ອ໋ອຍ ຕສຸ ຕສັ່ນໆ ຖສຸນ ຈ໊ຽນ, ໄມ້ ຕູ໋ງ ແປງ ທສວດ. 16 ແອ໋ງ ເຕສ໊າະ ເຢຍ ອ໋ອຍ ຈິວ ປຸນ ເມີ່ຍ ວົ້ວ ເຕີ໋ຍ ອີ ຄວ້າຍ ແລ໌ງ ແຫງ່ງ ຫວ່າ ເຍີຍ ຫລະເປຢີ໊ຍ-ເປ໊ນ ຕັ໊ບ ຈ໊ຽນ ຟາງ ກະຍົ໌ວ.
17 “ອ໋ອຍ ຕສຸ ຫລົ່ງ ຈຽມ ໂຕສ໋ວ ເຖສີຍ ເອນ ເຍີຍ ເຫວີ່ຍ ວົ້ວ ນອມ ຟາງ-ອກ໋າຍ, ດ໊າວ ອີ ເດາະ ປ໋ຽນ, ຈັ໊ງ ເດາະ ປ໋ຽນ. * 18 ຫລົ່ງ ຈຽມ ຕ໊າ ອີ ເຕົ້າ ເຄ^ລູ^ບິມ ຕ້າຍ ອັນ ອີ ປູງ ຟາງ-ຕ້າວ. 19 ຢຽດ ປູງ ມ່າຍ ເຕົ້າ. ປຸນ ອີ ປູງ ຟາງ-ຕ້າວ ເຍີຍ ເຄ^ລູ^ບິມ ຕສຢັ້ງ ຈ໊ຽນ ເຖສົາ ຟາງ-ອກ໋າຍ ເປ໋ນ ຢຽດ ຄວ້າຍ ໝີ່ ອ໊ະ. 20 ນ້າຍ ເຕີ໋ຍ ອີ ເຕົ້າ ເຄ^ລູ^ບິມ ອ໋ອຍ ຕສຸ ຮມຽນ ຕ໋ອຍ ຮມຽນ, ຢັງ ດ໊າດ ເດສຍ ຈ໊ຽນ ຟາງ ກູ້ ຫງວ່າຍ. ອີ ເຕົ້າ ຕສູ໊ງ ໝັ່ງ ຈ໊ຽນ ຟາງ-ອກ໋າຍ. 21 ເຕສ໊າະ ເຢຍ ອ໋ອຍ ຈິວ ປຸນ ເມີ່ຍ ວົ້ວ ເຕີ໋ຍ ອີ ຄວ້າຍ ແລ໌ງ ແຫງ່ງ ຫວ່າ ເຍີຍ ຫລະເປຢີ໊ຍ-ເປ໊ນ ຕັ໊ບ ຈ໊ຽນ ຟາງ ກະຍົ໌ວ ແອ໋ງ ເຕສ໊າະ ອກ໋າຍ ກົ໊ມ ຈ໊ຽນ. 22 ເຢຍ ອ໋ອຍ ຢຽມ ແລ໌ງ ແຫງ່ງ ຫວ່າ ຟາງ, ເຖສີຍ ເອນ ເຍີຍ ເຫວີ່ຍ ກູ້ ຫງວ່າຍ ວົ້ວ ເຕີ໋ຍ ອີ ເຕົ້າ ເຄ^ລູ^ບິມ ບຸດົ໋ງ, ປວັ້ງ ເມີ່ຍ, ຢ່າ ເຕສ໊າະ ເຢຍ ອ໋ອຍ ຫັດ ອິ^ສະ^ລາ^ເອນ ມ່ຽນ ເຍີຍ ຢຽດ ຕສູ໊ງ ເລີ໌ຍ ຈິວ ປຸນ ເມີ່ຍ.
23 “ອ໋ອຍ ຕສຸ ຫລົ່ງ ຕະຊຸ ດຢັ໋ງ ໂຕສ໋ວ ນອມ ເຕ້ຍ, ດ໊າວ ອີ ເດາະ, ຈັ໊ງ ຢຽດ ເດາະ, ຮລັງ ເດາະ ປ໋ຽນ. 24 ແອ໋ງ ຫລົ່ງ ຈຽມ ປວັງ ຈ໊ຽນ ເຕ້ຍ, ຢ່າ ຫລົ່ງ ຈຽມ ໂຕສ໋ວ ປິນ ຮ່ອມ ກ໋ອມ ເຕ້ຍ ເຮລນ. 25 ຢ່າ ຫລົ່ງ ຈຽມ ຮ່ອມ ເຕ້ຍ ເຮລນ ຝາວ ຢຽດ ແວ່ງ ຕສ໊າງ ຮລັງ, ແອ໋ງ ຫລົ່ງ ຈຽມ ໂຕສ໋ວ ປິນ ຮ່ອມ ກ໋ອມ. 26 ໂຕ໋ ເປຢີຍ ນອມ ຈຽມ-ຄວີງ ຕີ໋ງ ຈ໊ຽນ ເປຢີຍ ປູງ ເຕ້ຍ ເກ໊າະ ແຕສ໋ງ ເຕ້ຍ ເຕສົ໋າ ວົ້ວ ນອມ ຕ໋ອງ. 27 ນ້າຍ ເຕີ໋ຍ ຄວີງ ອ໋ອຍ ຕສຸ ຕີ໋ງ ນິດ ຈ໊ຽນ ເຕ້ຍ ປິນ ເຫວີ່ຍ ຖສຸນ ແກງ ເຕ້ຍ ເຍີຍ ດຢັ໋ງ. 28 ແກງ ເຕ້ຍ ເຍີຍ ດຢັ໋ງ ອ໋ອຍ ຕສຸ ຫລົ່ງ ຕະຊຸ ດຢັ໋ງ ໂຕສ໋ວ ຕ້າຍ ຢ່າ ປວັງ ຈ໊ຽນ ຈຽມ. 29 ອ໋ອຍ ຕສຸ ຫລົ່ງ ຈຽມ ໂຕສ໋ວ ເຕ້ຍ ເຍີຍ ຈາ-ຕ໋ອງ, ເຊ ປ້ຽນ, ຕົ້ມ ປະເກນ, ດສ່ອມ ເຖສົາ ເທສ້ຍ ອະຫງຸ່ນ ຕິ໊ວ ເຍີຍ ງວ່າ ແປ້ງ. 30 ອ໋ອຍ ຕສຸ ເຕສ໊າະ ເກ໋ງ ທິນ-ຮູ່ງ ເຍີຍ ອຈົ໊ວ ອັນ ຈ໊ຽນ ເຕ້ຍ ກູ້ ຫງວ່າຍ, ເຢຍ ເຍີຍ ດສະຮມຽນ, ຕສັ່ນໆ ເກ໋ງ ເຢຍ. *
31 “ອ໋ອຍ ຕສຸ ຫລົ່ງ ຈຽມ ໂຕສ໋ວ ນອມ ຕັງ. ຕັງ-ຈ໋າ ຕັງ-ຊິນ ອ໋ອຍ ຕສຸ ຕ໊າ ຕ້າຍ. ຕັງ ເຍີຍ ຕສ໊ານ ເຖສົາ ປຢັ້ງ ເຍວີ໌ຍ ປຢັ້ງ ເອີຍ ຢ່າ ອ໋ອຍ ຕສຸ ຈວັ່ງ ນ້າຍ ດຸ້ນ ຈຽມ ຕ໊າ ທສວດ ຕ້າຍ. 32 ຕັງ-ຊິນ ອ໋ອຍ ຕສຸ ປຸນ ໂຕສ໋ວ ຈຸ໊ ຖສາ ອກວ້າ, ຢຽດ ປູງ ມ່າຍ ປົວ ຖສາ. 33 ນ້າຍ ເຕີ໋ຍ ອກວ້າ, ຢຽດ ຖສາ ອ໋ອຍ ຕສຸ ມ່າຍ ປົວ ນອມ ຕສ໊ານ ຮນັ້ງ ອັນ^ມັນ ປຢັ້ງ ນໍ, ນອມໆ ມ່າຍ ປຢັ້ງ ເຍວີ໌ຍ ເຖສົາ ປຢັ້ງ ເອີຍ. ຕະເຫຍີ່ຍ ຖສາ ຟີ່ ຮນັ້ງ ເຍີຍ. ຢຽມ ຕັງ-ຊິນ ທສວດ ເຍີຍ ຈຸ໊ ຖສາ ຟີ່ ຮນັ້ງ ເດສ່ງ. 34 ຕັງ-ຊິນ ມ່າຍ ເປຢີຍ ນອມ ຕສ໊ານ ຮນັ້ງ ອັນ^ມັນ ປຢັ້ງ, ນອມໆ ມ່າຍ ປຢັ້ງ ເຍວີ໌ຍ ເຖສົາ ປຢັ້ງ ເອີຍ. 35 ຈຸ໊ ຖສາ ອກວ້າ, ຖສາໆ ອກວ້າ ກອນ ກະເດ໊ຍ ແໝງ ມ່າຍ ນອມ ປຢັ້ງ ເຍວີ໌ຍ. 36 ປຢັ້ງ ເຍວີ໌ຍ ເຖສົາ ຖສາໆ ອກວ້າ, ເຖສົາ ຕັງ-ຈ໋າ ຕັງ-ຊິນ, ອ໋ອຍ ຕສຸ ຈວັ່ງ ຢຽດ ດຸ້ນ ຈຽມ ຕ໊າ ທສວດ ຕ້າຍ ເປ໋ນ ຢຽດ ນອມ.
37 “ອ໋ອຍ ຕສຸ ໂຕສ໋ວ ເສ່ຍ ນອມ ຕັງ-ຕສ໊ານ ຕົນ ຈ໊ຽນ ເສ່ຍ ຖສາ ອກວ້າ ເຕວີ໊ຍ-ເມວີ໌ຍ ປຸນ ຕັງ ຕສິ໋ວ ອຈັງ ຕັງ-ຈ໋າ ເຍີຍ ດສະຮມຽນ ແໝງ. 38 ຫລົ່ງ ຈຽມ ຕ໊າ ອຈິ໊ວ ຈັ໊ບ ຕັງ-ໂທສ້ ເຖສົາ ອັນ ອຈິ໊ວ ເຍີຍ ປ້ຽນ. 39 ຕັງ ເຖສົາ ຕັງ ເຍີຍ ຈາ-ສີ່ ອ໋ອຍ ຕສຸ ຫລົ່ງ ຫຍີ່ ຕສຽບ ຢ໊ຽດ ຈ້ອຍ * ຈຽມ ຕ໊າ ຕ້າຍ. 40 ໂຕສ໋ວ ນ້າຍ ເຕີ໋ຍ ກະນ້າຍ ອ໋ອຍ ຕສຸ ໄຝ ຟິມ, ເອີຍ ຈ໊ຽນ ຢຽມ ບົງ ບົ໋ວ ເມີ່ຍ ເຍີຍ ຫຍູ່ງ ເຕສີ໊ຍ ໂຕສ໋ວ. *