1 ດາ^ວິດ ມີ່ງ ຢຽມ ສິກ^ລາກ ເຫວີ່ຍ ເປຢົ໋າ ຄີດ ເຍີຍ ຕອນ, ເຊົາ^ໂລ ຮູ່ງ. ນ້າຍ ເຊ ມີ່ງ ສິກ^ລາກ ກັນ ນິ່ນ ວົ້ວ ເຕີ໋ຍ ມ່ຽນ. ນິ່ນ ບົວ ໂຕສ໋ວ ເບ໊າະ ຈ໋າ ເຮ້ນ ເຍີຍ ແປງ, 2 ໄຮ່ ປ໊ວນ ຈວັງ-ຕສິ໋ນ ເຍີຍ ມ່ຽນ. ນິ່ນ ບົວ ໄຮ່ ຫລົ່ງ ຕສ໋າຍ ເຈັ໊ຍ ບຢ່າວ ເຈັ໊ຍ ປົ໌ວ ນັ້ນ ດົ໊ບ-ຮລາງ * ປູ໋ງ ຫລະເປຢີ໊ຍ ໄຟ ປ໊ວນ ຈວັງ-ຕສິ໋ນ ຢ່າ ຕຸ໊. ນິ່ນ ບົວ ຢຽດ ຕສູ໊ງ ເຊ ເຖສົາ ເຊົາ^ໂລ ຈວັ່ງ ຝີງ ເຍີຍ ເບນ^ຢາ^ມິນ ມ່ຽນ.
3 ມ່າຍ ນິ່ນ ບົວ ເຍີຍ ເປຢີ໊ຍ ເຕສີ໊ຍ, ອາ^ຫິ^ເຢ^ເຊ, ເຖສົາ ນິ່ນ ເຍີຍ ໂຢ໌ວ ໂຢ^ອາດ, ເຊ ກິ^ເບ^ອາ ມ່ຽນ, ເຊ^ມາ^ອາ, ເຍີຍ ຕອນ. ແອ໋ງ ມ່າຍ ອັດ^ມາ^ເວດ ເຍີຍ ຕອນ, ເຢ^ຊີ^ເອນ ເຖສົາ ເພ^ເຫລດ. ມ່າຍ ເບ^ລາ^ຄາ, ມ່າຍ ອາ^ນາ^ທົດ ມ່ຽນ, ເຢ^ຮູ, 4 ເຖສົາ ກິ^ເບ^ໂອນ ມ່ຽນ, ອິດ^ໄມ^ອາ, ຕົ້ງ ວົ້ວ ເຕີ໋ຍ ຟ່າ ຕສຽບ ເຕົ້າ ເຮ້ນ ໄຫ່ ເຍີຍ ຈຸນ-ເຕສີ໊ຍ ມ່ຽນ ເຍີຍ ຢຽດ ເຕົ້າ, ຢ່າ ໂຕສ໋ວ ວົ້ວ ເຕີ໋ຍ ຟ່າ ຕສຽບ ເຕົ້າ ເຍີຍ ຢຽດ ເຕົ້າ ເປຢີ໊ຍ ເຕສີ໊ຍ. ມ່າຍ ເຢ^ເລ^ມີ, ຢາ^ຮາ^ຊີ^ເອນ, ໂຢ^ຮາ^ນັນ, ເຖສົາ ເກ^ເດ^ລາ ມ່ຽນ, ໂຢ^ຊາ^ບາດ, 5 ເອ^ລູ^ໄຊ, ເຢ^ລີ^ມົດ, ເບ^ອັນ^ຢາ, ເຊ^ມາ^ລິ^ຢາ, ເຖສົາ ຮາ^ລູບ ມ່ຽນ, ເຊ^ຟາ^ທິ^ຢາ, 6 ເອນ^ຄາ^ນາ, ອິດ^ຊີ^ຢາ, ອາ^ຊາ^ເລນ, ໂຢ^ເອ^ເຊ, ເຖສົາ ໂຄ^ລາ ມ່ຽນ, ຢາ^ໂຊ^ເບ^ອຳ, 7 ຢ່າ ມ່າຍ ເກ^ໂດ ມ່ຽນ, ເຢ^ໂລ^ຮຳ ເຍີຍ ຕອນ, ໂຢ^ເອ^ລາ, ເຖສົາ ເສ^ບາ^ດິ^ຢາ.
8 ມ່າຍ ເຕີ໋ຍ ກາດ ມ່ຽນ ເປຢົ໋າ ມີ່ງ ດາ^ວິດ ຢຽມ ວົ້ວ ນອມ ວ້ວນ ເຍີຍ ຕ໋ອງ, ເຕີ່ຍ-ປູງ-ຮວາງ ວົ້ວ. ນິ່ນ ບົວ ເຊ ໄຮ່ ເບ໊າະ ຈ໋າ ເຮ້ນ ເຍີຍ ແປງ, ໄຮ່ ຫລົ່ງ ທ້ອງ-ປ້າຍ ເຖສົາ ທສັງ ຫລ່ຽວ ເຍີຍ. ນິ່ນ ບົວ ເຍີຍ ຮມຽນ ຮນັ້ງ ຊ່ຽນ ເຍີຍ ຮມຽນ, ຢ່າ ໄຮ່ ຖິວ ຊຽບ ຮນັ້ງ ຢຽມ ບົງ ເຍີຍ ໄອຈ້ ນໍ.
9 ເອ^ເຊ ໂຕສ໋ວ ເປຢີ໊ຍ ເຕສີ໊ຍ,
ໂອ^ບາ^ດີ ໂຕສ໋ວ ຕະເຫຍີ່ຍ,
ເອ^ລີ^ອັບ ໂຕສ໋ວ ຕະຟາມ,
10 ມິດ^ມັນ^ນາ ໂຕສ໋ວ ຕະເຝີຍ,
ເຢ^ເລ^ມີ ໂຕສ໋ວ ຕະຮມ໌,
11 ອັດ^ໄທ ໂຕສ໋ວ ຕະຫລົວະ,
ເອ^ລີ^ເອນ ໂຕສ໋ວ ຕະທສຽດ,
12 ໂຢ^ຮາ^ນັນ ໂຕສ໋ວ ຕະເປ໊ດ,
ເອນ^ຊາ^ບາດ ໂຕສ໋ວ ຕະຈົ໊ວ,
13 ເຢ^ເລ^ມີ ໂຕສ໋ວ ຕະຕສຽບ,
ມັກ^ບັນ^ໄນ ໂຕສ໋ວ ຕສຽບ ຢ໊ຽດ ວົ້ວ ເຕົ້າ.
14 ນ້າຍ ເຕີ໋ຍ ກາດ ມ່ຽນ ໂຕສ໋ວ ແປງ-ເປຢີ໊ຍ. ໂຕສ໋ວ ເກົ້າ ໄຝ ວົ້ວ ເຕີ໋ຍ ຕີ໊ ຕຸ໊ ຢຽດ ແປ໊ະ ເຕົ້າ. ໂຕສ໋ວ ໂຮລ ວົ້ວ ເຕີ໋ຍ ຕີ໊ ຕຸ໊ ຢຽດ ທສິນ ເຕົ້າ. * 15 ເຊ ຕົ້ງ ນ້າຍ ເຕີ໋ຍ ແປງ-ເປຢີ໊ຍ ເຈ໋ຍ ຈໍ^ແດນ ດ້າຍ ຕ໋ອຍ ຕສຸ ຕສີ້ ຫຮລາ ວວມ ໂຮລ ປວັ໊ງ ຂຳ, ຕສ່ຽວ ປຸນ ໂດ໊ະ-ເຮລນ ເຍີຍ ມ່ຽນ ຕົງ ເຕົ້າ ໄຟ ເຕົ້າ ເຍີຍ ເປຢົ໋າ ດສ໋ານ ເດສ່ງ.
16 ແອ໋ງ ມ່າຍ ເຕີ໋ຍ ເບນ^ຢາ^ມິນ ມ່ຽນ ເຖສົາ ຢູ^ດາ ມ່ຽນ ມີ່ງ ເຖົາ ດາ^ວິດ ເວີ່ຍ ວ້ວນ ເຍີຍ ຕ໋ອງ ວົ້ວ. 17 ດາ^ວິດ ທສວດ ມີ່ງ ຕສິ໊ບ ນິ່ນ ບົວ ຢ່າ ກ໊ອງ ບົ໋ວ ນິ່ນ ບົວ, “ເຊ ກ໊ອງ ເມີ່ຍ ບົວ ຕ້າຍ ໂຕສ໋ວ ຫລົງ, ເຖງ ເຢຍ, ເຢຍ ອະເຮນີ້ຍ ເຖສົາ ເມີ່ຍ ບົວ ຈິວ ຕສົວະ. ມປ່າ ເຊ ກ໊ອງ ເມີ່ຍ ບົວ ອ໋ອຍ ເຕສ໊າະ ເຢຍ ໝ່າຍ ປຸນ ວິນ-ວັ້ງ ໄມ້ ກຸ໊ນ ເຢຍ ໄມ້ ມ່າຍ ຕສຸ໌ຍ ນໍ, ໂທ້ ບົວ ເຍີຍ ອົງ-ຖາຍ ເຍີຍ ທິນ-ຮູ່ງ ໝັ່ງ ປວັດ ຢ່າ ຕີ່ງ ເມີ່ຍ ບົວ ເຍີຍ ຕສຸ໌ຍ.”
18 ວົ້ວ ຕສັ່ນ ສີງ ລີ່ງ ເອຈ່ຍ ວົ້ວ ເຕີ໋ຍ “ຟ່າ ຕສຽບ ເຕົ້າ” ເຍີຍ ເປຢີ໊ຍ ເຕສີ໊ຍ, ອາ^ມາ^ໄສ. ນິ່ນ ຕສ່ຽວ ກ໊ອງ,
ດາ^ວິດ ຕສ່ຽວ ຕສິ໊ບ ນິ່ນ ບົວ ແອ໋ງ ຫລຽບ ນິ່ນ ບົວ ໂຕສ໋ວ ຈຸນ-ແປງ ເຍີຍ ແປງ-ເປຢີ໊ຍ.
19 ມ່າຍ ເຕີ໋ຍ ມະ^ນັດ^ເສ ມ່ຽນ ຢ່າ ເປຢົ໋າ ມີ່ງ ເປັຍ ດາ^ວິດ, ຕົ້ງ ນິ່ນ ເຖສົາ ຟິ^ລິ^ສະ^ເຕຍ ມ່ຽນ ທສວດ ມີ່ງ ເບ໊າະ ເຊົາ^ໂລ ວົ້ວ ຕສັ່ນ. (ມປ່າ ດາ^ວິດ ບົວ ໄມ້ ຕຸ໊ ເຖງ ຟິ^ລິ^ສະ^ເຕຍ ມ່ຽນ, ເຫວີ່ຍ ຕສຸ ຟິ^ລິ^ສະ^ເຕຍ ມ່ຽນ ເຍີຍ ເປຢີ໊ຍ ເຕສີ໊ຍ ທສ່າງ ລ່າງ ລິ໌ວ ຕສ່ຽວ ກ໊ອງ, “ເຊ ກ໊ອງ ນິ່ນ ບົວ ກວັ່ງ ບົວ, ເປຢົ໋າ ມີ່ງ ເຖງ ເຊົາ^ໂລ ນໍ, ເດສ໋ຍ ດາ^ວິດ ບົວ ເຕສ໊າະ ບົວ ເຍີຍ ມອກ໊ອງ ໝ່າຍ ປຸນ ເຊົາ^ໂລ.”) 20 ດາ^ວິດ ມີ່ງ ສິກ^ລາກ ເຍີຍ ຕສຢັ້ງ ໂຫ່, ນ້າຍ ເຊ ເປຢົ໋າ ມີ່ງ ກັນ ນິ່ນ ວົ້ວ ເຕີ໋ຍ ມະ^ນັດ^ເສ ມ່ຽນ. ມ່າຍ ຢຽມ ມະ^ນັດ^ເສ ກຸ໊ນ ຢຽດ ທສິນ ເຕົ້າ ແປງ ເຍີຍ ແປງ-ເປຢີ໊ຍ, ອັດ^ນາ, ໂຢ^ຊາ^ບາດ, ເຢ^ດີ^ຢາ^ເອນ, ມີ^ຄາ^ເອນ, ໂຢ^ຊາ^ບາດ, ເອ^ລີ^ຮູ ເຖສົາ ສິນ^ເລ^ໄທ. 21 ນ້າຍ ເຕີ໋ຍ ມ່ຽນ ເຖງ ດາ^ວິດ ເບ໊າະ ກວັ້ນໆ ຕສະ ແປງ, ເຫວີ່ຍ ຕສຸ ນິ່ນ ບົວ ຢຽດ ຕສູ໊ງ ເຊ ເຮ້ນ ໄຫ່ ເຍີຍ ເບ໊າະ ຈ໋າ ແປງ, ຢ່າ ໂຕສ໋ວ ນິ່ນ ເຍີຍ ແປງ-ເປຢີ໊ຍ. 22 ຮນອຍໆ ມ່າຍ ມ່ຽນ ຕ້າຍ ເຖງ ດາ^ວິດ, ເຖົາ ນິ່ນ ມ່າຍ ຕົ້ມ ແປງ-ກວັ້ນ ຮນັ້ງ ທິນ-ຮູ່ງ ເຍີຍ ແປງ-ກວັ້ນ ນໍ. *
23 ນ້າຍ ເຊ ມ່າຍ ດສ້ອຍ ເບ໊າະ ຈ໋າ ເຍີຍ ຫວົວະ ກິ່ນ ມີ່ງ ເຮ^ໂບ^ລົນ ລໍ໌ ດາ^ວິດ ວົ້ວ ເຕີ໋ຍ ແປງ ເຍີຍ ໂສວ ໂໝ່ວ. ນິ່ນ ບົວ ອ໋ອຍ ເຕສ໊າະ ເຊົາ^ໂລ ເຍີຍ ກົ໊ວະ ຈິວ ປຸນ ດາ^ວິດ ຕສິ໋ວ ຕສ໊ຽວ ກ໊ອງ ເຍີຍ ຫວ່າ. 24 ຢູ^ດາ ມ່ຽນ ນັ້ນ ທ້ອງ-ປ້າຍ ເຖສົາ ທສັງ ຫລິ່ວ ເລີ໌ຍ ຕສຢັ໋ງ ເບ໊າະ ຈ໋າ, ມ່າຍ ຈຸ໊ ທສິນ ເປ໊ດ ແປ໊ະ ເຕົ້າ. 25 ສິ^ເມ^ໂອນ ມ່ຽນ ເບ໊າະ ຈ໋າ ເຮ້ນ ໄຫ່ ເຍີຍ ແປງ, ມ່າຍ ເສ່ຍ ທສິນ ຢຽດ ແປ໊ະ ເຕົ້າ. 26 ເລ^ວີ ມ່ຽນ, ມ່າຍ ເປຢີຍ ທສິນ ຫລົວະ ແປ໊ະ ເຕົ້າ, 27 ລ່ຽມ ອາ^ລົນ ເຍີຍ ໂຕ້ວ ຕສົງ ເຍີຍ ເປຢີ໊ຍ ເຕສີ໊ຍ, ເຢ^ໂຮ^ຢາ^ດາ, ເຖສົາ ກັນ ນິ່ນ ວົ້ວ ເຕີ໋ຍ ປົວ ທສິນ ທສຽດ ແປ໊ະ ເຕົ້າ. 28 ແອ໋ງ ມ່າຍ ເຕົ້າ ຫຮຍັງ-ເຈີ໊ຍ ຫລຸນ, ເບ໊າະ ຈ໋າ ເຮ້ນ ເຍີຍ ມ່ຽນ, ບົ໋ວ ເຫ່ວ ສາ^ດົກ, ແອ໋ງ ເຖສົາ ນິ່ນ ຈວັ່ງ ຝີງ ເຍີຍ ແປງ-ເປຢີ໊ຍ ຫຍີ່ ຕສຽບ ເຫຍີ່ຍ ເຕົ້າ. 29 ເຖສົາ ເຊົາ^ໂລ ຈວັ່ງ ຝີງ ເຍີຍ ເບນ^ຢາ^ມິນ ມ່ຽນ ມ່າຍ ປົວ ທສິນ ເຕົ້າ. ນ້າຍ ເຕີ໋ຍ ເກົ້າ ທສ້ຳ ເຈ໋ຍ ຕສິ້ນ ດ່າງ ເຖງ ເຊົາ^ໂລ. 30 ເອ^ຟາ^ອິມ ຝີງ ເຮ້ນ ໄຫ່ ເຍີຍ ແປງ, ເຊ ຢຽມ ນິ່ນ ບົວ ກັ້ນ ເຍີຍ ປູ້ງ ປ່ວນ ມ່າຍ ເມ່ງ ເຕົ້າ ເຍີຍ ມ່ຽນ, ມ່າຍ ອີ ຫວ່ານ ເປ໊ດ ແປ໊ະ ເຕົ້າ. 31 ມະ^ນັດ^ເສ ເຍີຍ ດ໊າມ-ຝີງ, ຕົ້ງ ຕສິ໋ວ ບົ໋ວ ພ້າຍ ມີ່ງ ຫລຽບ ດາ^ວິດ ໂຕສ໋ວ ຮູ່ງ ວົ້ວ ເຕີ໋ຍ, ມ່າຍ ຢຽດ ຫວ່ານ ຫຮຢຽດ ທສິນ ເຕົ້າ. 32 ອິດ^ສາ^ຄາ ມ່ຽນ, ຕົ້ງ ໄຮ່ ສຳ ຕຸ໊ ທສວດ ວົ້ວ ຈ໋າ ລູ່ງ ເດ໊ຍ ເຍີຍ ຕສຢັ້ງ ໂຫ່ ຢ່າ ຮິ້ວ ຕຸ໊ ອິ^ສະ^ລາ^ເອນ ມ່ຽນ ອ໋ອຍ ຕສຸ ຮນັ້ງ ຫາຍ ນໍ ໂຕສ໋ວ, ມ່າຍ ຫຍີ່ ແປ໊ະ ເຕົ້າ ເປຢີ໊ຍ ເຕສີ໊ຍ ເຖສົາ ຢຽມ ນ້າຍ ເຕີ໋ຍ ເປຢີ໊ຍ ເຕສີ໊ຍ ເຍີຍ ປົ໌ວ-ເດ໊ຍ ເຍີຍ ຈວັ່ງ ຝີງ ມ່ຽນ. 33 ເສ^ບູ^ລຸນ ມ່ຽນ ມ່າຍ ປຢາ ຫວ່ານ ເຕົ້າ ໂຫະ ລິ໌ວ ຢ່າ ຫລິ່ວ ເລີ໌ຍ ຕສຢັ໋ງ ທສວດ ມີ່ງ ເບ໊າະ ຈ໋າ. ນິ່ນ ບົວ ມ່າຍ ດສ້ອຍ ຫຍູ່ງໆ ເບ໊າະ ຈ໋າ ເຍີຍ ຫວົວະ ກິ່ນ. ນິ່ນ ບົວ ມ່າຍ ດຸ ຕິ່ວ ໂຮຍ້ວ ເຖງ ດາ^ວິດ. 34 ນັບ^ທາ^ລີ ມ່ຽນ ມ່າຍ ຢຽດ ທສິນ ເຕົ້າ ແປງ-ເປຢີ໊ຍ ເຖສົາ ຈ໊ຽນ ປົວ ຫວ່ານ ເສ່ຍ ທສິນ ເຕົ້າ ນັ້ນ ທ້ອງ-ປ້າຍ ເຖສົາ ທສັງ ເບ໊າະ ຈ໋າ ເຍີຍ ແປງ. 35 ດານ ຝີງ ມ່າຍ ເບ່ນ ຕສຢັ໋ງ ເບ໊າະ ຈ໋າ ເຍີຍ ມ່ຽນ ອີ ຫວ່ານ ຫຮຢຽດ ທສິນ ຫລົວະ ແປ໊ະ ເຕົ້າ. 36 ອາ^ເຊ ຝີງ ໂຫະ ລິ໌ວ ເບ່ນ ຕສຢັ໋ງ ເບ໊າະ ຈ໋າ ເຍີຍ ມ່ຽນ ມ່າຍ ເປຢີຍ ຫວ່ານ ເຕົ້າ. 37 ຢຽມ ຈໍ^ແດນ ດ້າຍ ຕົງ ປູງ ແໝງ ເຍີຍ ລູ^ເບນ ມ່ຽນ, ກາດ ມ່ຽນ ເຖສົາ ມະ^ນັດ^ເສ ເຍີຍ ດ໊າມ-ຝີງ ມ່ຽນ ມ່າຍ ຈ໊ຽນ ຫຍູ່ງໆ ເບ໊າະ ຈ໋າ ເຍີຍ ຫວົວະ ກິ່ນ ເຍີຍ ແປງ, ມ່າຍ ຢຽດ ສິນ ອີ ຫວ່ານ ເຕົ້າ.
38 ນ້າຍ ເຕີ໋ຍ ຢຽດ ຕສູ໊ງ ແປງ ຫລິ່ວ ເລີ໌ຍ ຕສຢັ໋ງ ເບ໊າະ ຈ໋າ. ນິ່ນ ບົວ ຕ້າຍ ເຖົາ ເຮ^ໂບ^ລົນ ປວັ໊ງ ໂຮຍ້ວ ອ໋ອຍ ຫລຽບ ດາ^ວິດ ໂຕສ໋ວ ຮູ່ງ, ກຸ໊ນ ເດສ່ງ ອິ^ສະ^ລາ^ເອນ ເຕີ່ຍ-ປູງ. ເຕສ່ງ ເອຈ່ຍ ເຍີຍ ອິ^ສະ^ລາ^ເອນ ມ່ຽນ ຢຽດ ຕສູ໊ງ ຟີ່ ຮນັ້ງ ເຍີຍ ຢ່າ ຕົ້ງ ໂຮຍ້ວ ອ໋ອຍ ຫລຽບ ດາ^ວິດ ໂຕສ໋ວ ຮູ່ງ. 39 ນິ່ນ ບົວ ເຖສົາ ດາ^ວິດ ຢຽມ ວົ້ວ ປົວ ຮນອຍ, ຫຍັ່ນ ເຍີຍ ຮົບ ເຍີຍ, ເຫວີ່ຍ ຕສຸ ນິ່ນ ບົວ ເຍີຍ ມົ໌ວ-ຕ່ອຍ ເບ່ນ ຕສຢັ໋ງ ປຸນ ນິ່ນ ບົວ. 40 ຢຽມ ນິດ ຟັດ ນິ່ນ ບົວ ເຍີຍ ມ່ຽນ ເຖສົາ ຢຽມ ໂກ ເຍີຍ ມ່ຽນ, ເຊ ຢຽມ ອິດ^ສາ^ຄາ, ເສ^ບູ^ລຸນ ເຖສົາ ນັບ^ທາ^ລີ ວົ້ວ ເຕີ໋ຍ, ຫລົ່ງ ມາ^ລີ ເຖສົາ ລໍ່ ເຖສົາ ລໍ່ ທໍ່ ເຖສົາ ງົ່ງ ທໍ ຈ໊ຽນ ຫຍັ່ນ ຮົບ ຕ້າຍ. ມ່າຍ ບ໊ວນ, ງົ່ງ ຫຍໍ ປ໊ຽວ-ອກາຍ, ອະຫງຸ່ນ ປ໊ຽວ-ອກາຍ, ອະຫງຸ່ນ ຕິ໊ວ, ກະລັ້ນ ໂຢ້ວ, ງົ່ງ ເຖສົາ ປະກີ ຢູ້ງ, ເຫວີ່ຍ ຕສຸ ອິ^ສະ^ລາ^ເອນ ມ່ຽນ ອຈຽນ-ໂຢ້ວ ໄຫ່.